MACHI 27, 2024 | HABARI ZIMEONGEZWA: MEI 13, 2024
URUSI

HABARI ZA KARIBUNI—NDUGU WAHUKUMIWA | Walikuwa na Uhakika, Walijitayarisha, na Walikuwa na Mtazamo Mzuri

CHEZA

Mei 13, 2024, Mahakama ya Leninskiy ya Wilaya ya Barnaul iliyo katika Eneo la Altai iliwahukumu Ndugu Yuriy Kolotinskiy, Ndugu Mikhail Reshetnikov, na Ndugu Anatoliy Sarychev. Kila mmoja alipokea kifungo cha nje cha miaka miwili na miezi mitatu. Hawahitaji kwenda gerezani wakati huu.

Maelezo Mafupi Kuwahusu

Yuriy Kolotinskiy

Alizaliwa: 1955 (Moldova)

Maisha Yake: Alifanya kazi akiwa mwendeshaji wa mashine kubwa kwenye machimbo ya madini

Alifunga ndoa na Nataliya mwaka wa 1977

Alijiuliza kwa nini kuna mateso mengi. Alipata majibu yenye kuridhisha baada ya kujifunza Biblia na Mashahidi wa Yehova. Yuriy na Nataliya walibatizwa mwaka wa 1995

Maelezo ya Kibinafsi

Ni simulizi gani la Biblia ambalo limekusaidia kuwa na uhakika kwamba Yehova anakusaidia?

Mara nyingi mimi huwafikiria Waisraeli baada ya kuondoka Misri. Yehova aliwaongoza na kuwalinda wakati wote walipokuwa nyikani. Ninahisi kwamba anafanya jambo kama hilo pia kunielekea. Kila wakati ninapoitwa mahakamani, ninawazia Yehova akiwa mbele yangu. Kuhisi msaada wake kunanihakikishia kwamba ananipenda na kwamba atanipa ujasiri wa kuvumilia na kudumisha ushikamanifu wangu hata nini kitokee. Kwa sasa nina imani yenye nguvu kuliko wakati mwingine wowote na ninajua kwamba ninafanya jambo sahihi na nimejitayarisha kufanya jambo lolote ili kutetea jina la Yehova.

Mikhail Reshetnikov

Alizaliwa: 1949 (Maksiner, Eneo la Kirov)

Maisha Yake: Alifanya kazi akiwa dereva kwa zaidi ya miaka 50

Yeye na mke wake wa kwanza ambaye alikufa kwa ugonjwa wa kansa walimlea mwana wao na binti zao wawili. Mwaka wa 2021 alifunga ndoa na Antonina

Alikuwa na maswali kuhusu Biblia lakini hakupata majibu katika kanisa lake. Alifurahi sana kujua ukweli kupitia kujifunza Biblia na Mashahidi wa Yehova. Alibatizwa mwaka wa 2000

Maelezo ya Kibinafsi

Kujitayarisha kwa Ajili ya Mateso Kumekusaidiaje?

Muda mfupi baada ya ndugu na dada zetu kuanza kukamatwa, nilisali kwa Yehova anipe hekima na uwezo wa kujidhibiti ili nijitayarishe. Kujionea Yehova akinisaidia tena na tena kumenihakikishia kwamba mara zote atajibu sala zangu kwa wakati unaofaa. Sina shaka kwamba yuko upande wangu. Na matokeo ni kwamba, sina shaka kuhusu uamuzi wowote ambao mahakama itafanya katika kesi yangu. Ninajua kwamba kwa msaada wa Yehova, nitaweza kubaki nikiwa mshikamanifu.

Anatoliy Sarychev

Alizaliwa: 1949 (Karpovo, Eneo la Altai)

Maisha Yake: Alifanya kazi akiwa mbunifu wa ramani kabla ya kustaafu

Alifunga ndoa na Nadezhda mwaka wa 1990. Wana mwana mmoja

Alitembelewa na Mashahidi wa Yehova muda mfupi baada ya kufanyiwa upasuaji. Alifurahi sana kujifunza kuhusu ahadi za Yehova za kuondoa jeuri na mateso. Nadezhda alibatizwa mwaka wa 2001 na Anatoliy akabatizwa mwaka wa 2002

Maelezo ya kibinafsi

Ni nini kinachokusaidia kudumisha mtazamo mzuri?

Ninafikiria kuhusu andiko la 1 Petro 3:14 linalosema: “Lakini hata mkiteseka kwa ajili ya uadilifu, ninyi ni wenye furaha.” Mafarisayo waliwatesa mitume kwa sababu walikataa kuacha kuhubiri. Mitume walivumilia kuvunjiwa heshima kwa ajili ya jina la Yesu na waliona hiyo ni sababu ya kuwa na shangwe. Nataka kufuata mfano wao. Sioni sababu yoyote ya kuvunjika moyo eti kwa kuwa ninakabili mateso. Badala yake, ninapata faraja nyingi kujua kwamba ninafuata hatua za Wakristo wa mapema na za Yesu Kristo.

Tunafurahi sana kuwa na ndugu kama hawa, ambao ni mifano mizuri ya imani na kumtegemea Yehova katika siku zetu. Tuna uhakika kwamba wataendelea kunufaika na upendo mshikamanifu wa Yehova na uaminifu.—Zaburi 25:10.

Mfuatano wa Matukio

Mei 25, 2021

Kesi ya uhalifu ilifunguliwa dhidi ya Mikhail
Mei 27, 2021

Nyumba ya Mikhail ilifanyiwa msako. Yeye na Antonina walihojiwa. Mikhail aliwekewa vizuizi vya kusafiri
Oktoba 6, 2022

Kesi ya uhalifu ilifunguliwa dhidi ya Anatoliy na Yuriy na ikaunganishwa pamoja na kesi ya Mikhail
Oktoba 7, 2022

Anatoliy na Yuriy waliwekewa vizuizi vya kusafiri
Januari 19, 2023

Kesi ya uhalifu ilianza

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI