JANUARI 24, 2022 | HABARI ZIMEONGEZWA: DESEMBA 29, 2023
URUSI

HABARI ZA KARIBUNI—NDUGU WAMEHUKUMIWA | Ndugu Aleksandr Polozov na Stepan Shevelev Wamepata Baraka Nyingi Licha ya Mateso

CHEZA

Desemba 29, 2023, Mahakama ya Jiji la Norilsk katika Eneo la Krasnoyarsk ilimhukumu Ndugu Aleksandr Polozov na Ndugu Stepan Shevelev. Kila mmoja wao alihukumiwa kifungo cha nje cha miaka sita. Hawahitaji kwenda gerezani wakati huu.

Mfuatano wa Matukio

Oktoba 20, 2019

Maofisa wa usalama walizunguka kambi katika jiji la Norilsk. Zaidi ya Mashahidi 50 walizuiliwa
Oktoba 26, 2019

Aleksandr alikamatwa na kuwekwa mahabusu
Januari 21, 2020

Aleksandr aliachiliwa baada ya kuzuiliwa kwa miezi mitatu hivi
Februari 19, 2020

Aleksandr aliwekwa kwenye orodha ya watu wenye msimamo mkali na akaunti zake za benki zikazuiliwa
Mei 6, 2021

Stepan alishtakiwa kwa “kupanga njama ya uhalifu” pamoja na Aleksandr. “Uhalifu” ambao Stepan anadaiwa kuwa alitenda unatia ndani kusali na kuhubiri

Maelezo Mafupi Kuwahusu

Aleksandr Polozov

Alizaliwa: 1970 (Torzhok, Eneo la Tver)

Maisha Yake: Alipokuwa kijana, alipenda mchezo wa mpira wa magongo na kuogelea. Alifanya kazi katika kituo cha huduma za dharura za kuokoa uhai. Alifunga ndoa na Svetlana mwaka wa 1998. Wanapenda kuendesha baiskeli na kusafiri

Alianza kujifunza Biblia na Mashahidi wa Yehova katika miaka ya 1990. Alibatizwa mwaka wa 1995

Maelezo ya Kibinafsi

Yehova alikutegemezaje ulipokuwa mahabusu?

Baada ya kuhojiwa mara ya kwanza nilipelekwa kwenye jela moja. . . . Mfungwa mwenzangu aliniuliza kwa nini nilikamatwa. Nilimweleza kwamba nilikuwa nimeshtakiwa kwa sababu ya imani yangu katika Mungu. . . . Alisema hivi: “Angalia chini ya meza.” Nilipoangalia, niliona Biblia mbili. Nisingeweza kuamini nilichokuwa nikiona! . . . Tangu siku ya kwanza kabisa, nilikuwa na Neno la Mungu. Ninamshukuru Yehova kwa kunitegemeza kwa njia kama hiyo yenye kupendeza sana.

Umenufaikaje kutokana na utegemezo wa akina ndugu na dada?

Siwezi kuelezea thamani ya utegemezo ambao ndugu na dada zetu wanaandaa. Asubuhi moja yenye baridi sana, akina ndugu walinisalimu kwa kunipigia makofi nilipokuwa nikisafirishwa kutoka mahabusu kuingia mahakamani. Kisha saa 12:00 jioni, walinipigia makofi nilipokuwa nikirudishwa kwenye gari la gereza. Kwangu, hilo lilikuwa jambo lenye thamani sana, na lilitoa ushahidi mkubwa sana.

Stepan Shevelev

Alizaliwa: 1982 (Maslyanino, Eneo la Novosibirsk)

Maisha Yake: Anafanya kazi ya kuunganisha mifumo ya umeme. Alifunga ndoa na Oksana mwaka wa 2013. Wanapenda kusoma na kusafiri

Mwaka wa 1996, mama na dada ya Stepan walianza kujifunza Biblia. Ingawa hakuna yeyote kati yao aliyekubali kweli, Stepan alianza kujifunza na alivutiwa na mafundisho ya Mashahidi wa Yehova. Alipendezwa na jinsi Biblia ilivyobadili maisha ya watu na kuyaboresha. Alibatizwa mwaka wa 2001

Maelezo ya Kibinafsi

Kuwa na ratiba nzuri ya kiroho kumekusaidiaje wewe na mke wako?

Tunathamini sana ibada yetu ya familia. Miaka mingi iliyopita, tulichagua siku hususa ya kuifanya, na haturuhusu chochote kingine kiingilie muda huo. Kwa sababu hiyo, nina uhakika kwamba mke wangu mpendwa atafaulu kudumisha imani yake ikiwa imara. Mbali na hilo, ninajaribu kufanya usomaji wangu wa Biblia kila siku uwe wenye kufurahisha. Kwa mfano, mwaka mmoja nilisoma tu Biblia kuanzia mwanzo hadi mwisho. Mwaka uliofuata, nikaisoma kulingana na mfuatano wa matukio. Kisha, nikaisoma kwa kuunganisha vitabu vya mwandikaji mmoja, na kadhalika. Kwa njia hiyo, usomaji wangu wa Biblia hauchoshi, na ninaweza kuona mawazo yanayofanana kwa njia mpya.

Mtazamo wako kuwaelekea wale wanaokutesa umebadilikaje?

Yehova ananisaidia kuwa na maoni kama yake kuwaelekea. Mara nyingi sana mimi na mke wangu tumeona kwamba hawa ni watu wa kawaida wanaofanya kazi yao tu. Wanapambana na matatizo yao wenyewe na wanahitaji tumaini lenye kufariji ambalo tunahubiri.

Tuna uhakika kwamba Yehova ataendelea kuwategemeza ndugu zetu wapendwa ambao kwa uaminifu ‘wanaendelea kufuatia’ uadilifu licha ya mateso.—Waamuzi 8:4.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI