MACHI 29, 2023 | HABARI ZILIONGEZWA: APRILI 18, 2023
URUSI

HABARI ZA KARIBUNI—NDUGU WANAFUNGWA | Yehova Anawasaidia Ndugu Zetu Gerezani

CHEZA

Aprili 17, 2023, Mahakama ya Wilaya ya Ahktubinskiy iliyo katika Eneo la Astrakhan iliwahukumu Ndugu Rinat Kiramov, Ndugu Sergey Korolev, na Ndugu Sergey Kosyanenko kifungo cha miaka saba gerezani kila mmoja. Ndugu wote watatu wamekuwa mahabusu tangu Novemba 2021 na wamebaki humo.

Maelezo ya Kibinafsi

Rinat Kiramov

Alizaliwa: 1987 (Moscow, Eneo la Moscow)

Maisha Yake: Alikuwa akisomea ustadi wa kusanidi programu za tovuti. Ana kipaji cha muziki. Alifanya kazi ya kupeleka barua kwenye nyumba za watu kama sehemu ya utumishi wa badala wa kiraia

Alijifunza kweli kutoka kwa mama yake. Aliguswa moyo na upendo na umoja wa Mashahidi wa Yehova. Alibatizwa mwaka wa 2001

Alifunga ndoa na Galina mwaka wa 2009

Maelezo ya Kibinafsi ya mke wa Rinat, Galina a

Ni nini kinachomsaidia Rinat kuvumilia maisha ya gerezani?

Rinat amejiwekea mradi wa kusali kwa ajili ya kila ndugu au dada aliye gerezani kwa kutaja majina yao. Kila mwezi ninampelekea majina ya ndugu na dada wote waliofungwa katika sehemu mbalimbali ulimwenguni kwa sababu ya imani yao. Kwa kuwa anatumia wakati wa kutosha kusali kwa ajili ya kila mmoja wao, hilo linamsaidia kuimarisha uhusiano wake na Yehova na kumsaidia asikazie fikira kupita kiasi matatizo anayokabili. Hata tunakumbushana uvumilivu wetu unatimiza nini: Tunatoa ushahidi mzuri na kuunga mkono enzi kuu ya Yehova. Rinat alielezea hili katika barua moja: “Hata adui yetu aonekane kuwa mwenye nguvu kadiri gani, kwa msaada wa Baba yetu tutashinda. Huenda ushindi usimaanishe kuwekwa huru. Kwetu ushindi ni kuendelea kuwa waaminifu hadi mwisho.”

Unahisi Yehova amekusaidia kwa njia gani?

Rinat aliniandikia hivi katika barua aliyonitumia, nami nimejionea ukweli wa maneno haya: “Kwa sababu sina uwezo wa kukutunza kwa sasa, Yehova amechukua jukumu hilo yeye mwenyewe.” Nimejionea mkono wa Yehova wenye nguvu tangu hali hii ilipotupata. Zaburi 91:1 inaahidi hivi: “Yeyote anayekaa mahali pa siri pa Aliye Juu Zaidi ataishi katika kivuli cha Mweza-Yote.” Hapo awali, nilisoma kuhusu “mahali [hapo] pa siri,” lakini sasa ninajionea jinsi Yehova anavyonilinda kuliko wakati mwingine wowote. Hilo linanisaidia kumtegemea kikamili na kuvumilia huku nikiwa na shangwe.

Sergey Korolev

Alizaliwa: 1973 (Penza, Eneo la Penza)

Maisha Yake: Anapenda kupiga picha na kutengeneza fanicha.

Alibadili maoni yake kuhusu dini alipoanza kushirikiana na Mashahidi wa Yehova na kujifunza kumhusu Muumba. Alibatizwa mwaka wa 1996

Alifunga ndoa na Yekaterina mwaka wa 2005

Maelezo ya Kibinafsi

Je, uhusiano wako na Yehova umeimarika katika kipindi hiki?

Unapokuwa gerezani, ni rahisi kusitawisha maoni yasiyofaa kuhusu hali unayopitia. Ninahitaji kufanya jitihada nyingi ili kuendelea kuwa na uvumilivu, imani, tumaini, na upendo. Jambo linalonisaidia sana ni sala. Nina muda mwingi sana wa kuwa na mazungumzo yenye kufariji pamoja na Baba yangu. Tangu nilipoingia gerezani, nimesali mara nyingi kutoka moyoni kuliko wakati mwingine wowote maishani mwangu! Sasa ninaelewa kwa nini Yesu aliweza kukaa usiku kucha akisali kwa Baba yake. Kuwa katika hali hii kumenifundisha kumtegemea Mungu kikamili, na huenda hiyo ndiyo faida kubwa zaidi ambayo nimepata katika kipindi chote ambacho nimefungwa.

Sergey Kosyanenko

Alizaliwa: 1961 (Yelan, Eneo la Volgograd)

Maisha Yake: Ni mwalimu wa michezo

Alifunga ndoa na Olga mwaka wa 1983. Alivutiwa na usahihi wa unabii na historia iliyo katika Biblia. Alibatizwa mwaka wa 2002

Maelezo ya Kibinafsi ya mke wa Sergey, Olga b

Umewezaje kukabiliana na hali ya kuvunjika moyo?

Ninajitahidi kuwa na shughuli nyingi katika kufanya mambo yenye manufaa. Ninasoma machapisho yanayotegemea Biblia na kusali kwa Yehova, ninamwomba Yehova anipe nguvu ili niweze kukabiliana na hisia za kuvunjika moyo. Ninasoma barua za Sergey tena na tena na kuwazia itakavyokuwa nitakapokutana naye baada ya matatizo haya kwisha. Pia, ninaposikiliza nyimbo zetu zinazotegemea Biblia na kufuatana nazo zinapocheza ninahisi vizuri.

Je, kuna andiko hususa katika Biblia lililokusaidia kuvumilia?

Ninapenda maneno ya 1 Wakorintho 10:13 ambapo Mungu anasema ‘hatatuacha tujaribiwe kupita tunavyoweza kuhimili.’ Ninaelewa kwamba sina uwezo wa kukabiliana na mambo yote haya kwa uwezo wangu mwenyewe na sina shaka Yehova atanisaidia kuvumilia. Kwa kuwa majaribu haya yametupata, tunaweza kuyavumilia. Hatutakabiliana na hali hii milele.

Tunafarijika kujua kwamba Yehova anaendelea kuthibitisha yeye ni kimbilio la watumishi wake waaminifu na kwamba ameweka ‘mikono yake ya milele chini yetu.’—Kumbukumbu la Torati 33:27.

Mfuatano wa Matukio

Novemba 9, 2021

Kesi ya uhalifu ilifunguliwa. Maofisa wa polisi walifanya msako kwenye nyumba 15 za Mashahidi wa Yehova zilizo Akhtubinsk na Znamensk, kutia ndani nyumba za Ndugu Kiramov, Ndugu Korolev, na Ndugu Kosyanenko
Novemba 10, 2021

Sergey Korolev alikamatwa
Novemba 11, 2021

Rinat Kiramov na Sergey Kosyanenko walikamatwa. Ndugu hao wote watatu walipelekwa mahabusu
Novemba 14, 2022

Kesi ya uhalifu ilianza

a b Hatukuweza kupata maelezo kutoka kwa Ndugu Kiramov na Ndugu Kosyanenko.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI