SEPTEMBA 1, 2021
URUSI

HABARI ZA KARIBUNI | Ndugu Aleksey Khabarov Anapata Ujasiri Kupitia Sala na Kutegemea Neno la Mungu

CHEZA

Juni 27, 2022, Mahakama ya Wilaya ya Porkhovskiy ya Eneo la Pskov haikumpata na hatia Ndugu Aleksey Khabarov. Aliondolewa mashtaka yote ya uhalifu.

Mfuatano wa Matukio

Novemba 26, 2021, Mahakama ya Wilaya ya Pskov ilichunguza rufaa aliyokata Aleksey. Kesi yake ilirudishwa mahakamani ili kusikilizwa na hakimu mwingine. Hatahitaji kwenda gerezani wakati huu
Septemba 7, 2021

Mahakama ya Wilaya ya Porkhovskiy iliyo katika Eneo la Pskov ilimhukumu Aleksey kifungo cha nje cha miaka mitatu
Oktoba 29, 2020

Kesi ya uhalifu dhidi ya Aleksey ilianza kusikilizwa
Agosti 28, 2020

Aleksey alishtakiwa rasmi kwamba alishiriki “katika mkutano wa kidini” ambapo waliokuwepo ‘walizungumza kuhusu imani yao, wakasoma Biblia, wakazungumzia mambo kuhusu Maandiko, na kuimba nyimbo za dini’
Februari 7, 2020

Aleksey alihojiwa mara ya pili. Wakati wa mahojiano hayo, ilifunuliwa kwamba katika mwaka wa 2018 wenye mamlaka walikuwa wakisikiliza na kurekodi mazungumzo yake ya simu
Januari 31, 2020

Aleksey alishtakiwa kuwa mhalifu
Mei 24, 2019

Aleksey alimwandikia barua ya kukata rufaa Ofisa Anayeshughulikia Haki za Kibinadamu katika Eneo la Pskov. Aleksey alieleza kwamba yeye si mhalifu, badala yake alikuwa mwamini mnyoofu. Ofisa huyo aliunga mkono kwamba Aleksey alikuwa na haki ya kuwa na imani na kutenda kupatana na imani hiyo
Aprili 3, 2019

Nyumba ya Aleksey ilifanyiwa upekuzi, baadhi ya vitu vyake vikachukuliwa, naye akahojiwa na maofisa wa usalama

Maelezo Mafupi Kumhusu

Aleksey Khabarov

Alizaliwa: 1975 (Burtsevskaya, Eneo la Arkhangelsk)

Maisha Yake: Anafurahia kwenda matembezi pamoja na rafiki zake. Anafanya kazi ya kurekebisha na kukarabati nyumba. Alipokuwa jeshini, alianza kujiuliza ni nini kusudi la uhai. Kutafuta majibu kulimfanya aanze kujifunza Biblia na Mashahidi wa Yehova. Alibatizwa katika mwaka wa 2000

Maelezo ya Kibinafsi

Je, kuna jambo lolote lenye kutia moyo ambalo liligusa moyo wako na kukusaidia kuvumilia?

Nyumba yangu ilipovamiwa, nilifikiria kumhusu Harold King, ambaye aliwekwa katika kifungo cha upweke kwa miaka minne nchini China. Sasa ilikuwa zamu yangu. Hakuna wakati ambapo nilifikiria kuacha kumtumikia Yehova ili kukomesha mateso yangu! Nilirudia maneno hayo mara nyingi: ‘Sasa ni zamu yangu. Nitafanya nini?’ Kufikiria mambo kama hayo kulinipa nguvu.

Umemwomba nini Yehova katika kipindi hiki?

Nilisali kwamba wasiwasi wangu usionekane na wengine . . . na kwamba kwa nje wengine wanione kuwa na uhakika na mtulivu. Nilitaka wanaotutesa waone kwamba . . . hawajafaulu kunivunja moyo, sijashindwa, na siko peke yangu. Yehova ananisaidia kutimiza hilo! Hata sasa wakati wa kusikilizwa kwa kesi yangu, nyakati nyingine ninaweza kutumia ucheshi wangu kutuliza hali, naye hakimu hufurahishwa na hilo.

Ni andiko gani ambalo limekusaidia kuwa jasiri na kuvumilia kwa shangwe?

Zaburi 27:14 . . . imenisaidia kuelewa vizuri zaidi ni nini ninachohitaji kufanya ninapokabili majaribu. Maneno “mtumaini Yehova” yanapatikana mara mbili katika mstari huo . . . Niliporudia mstari huo nilipokuwa nikienda mahakamani, nilijihisi nikiwa jasiri na nikiwa nimetiwa moyo.

Tunakubaliana kabisa na Aleksey kwamba sikuzote Yehova huwasaidia washikamanifu Wake ‘wawe jasiri na wawe na moyo mkuu.’—Zaburi 27:14.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI