Septemba 7, 2021, Mahakama ya Eneo la Krasnoyarsk ilikataa ombi la rufaa la Andrey na kuunga mkono hukumu yake.

Juni 3, 2021, Mahakama ya Wilaya ya Zheleznodorozhny iliyoko Krasnoyarsk ilimhukumu Andrey kifungo cha miaka sita gerezani. Alipelekwa kizuizini moja kwa moja kutoka mahakamani.

Andrey Stupnikov

• Alizaliwa: 1973 (Norilsk, Eneo la Krasnoyarsk)

• Maisha Yake: Alisomea taaluma ya kuchimba mafuta. Alifunga ndoa na Olga mwaka wa 1993. Wote wanapenda mambo yanayohusiana na sanaa na kwenda matembezi

  Tangu alipokuwa kijana alipenda kumjua Mungu. Alijionea matendo ya kikatili alipokuwa akiishi Chechnya wakati wa vita vya kwanza vya Chechnya. Alijiuliza kwa nini mambo mabaya hutokea na jinsi anavyoweza kupata ulinzi wa Mungu. Yeye na Olga walijifunza Biblia pamoja na Mashahidi wa Yehova. Walishangaa kujifunza jinsi unabii wa Biblia ulivyotimizwa na jinsi Biblia inavyotoa mwongozo bora wa kukabiliana na hali ngumu

Julai 3, 2018, maofisa wa Idara ya Usalama wa Taifa (FSB) walimkamata Ndugu Andrey Stupnikov alipokuwa kwenye Uwanja wa Ndege wa Kimataifa wa Krasnoyarsk. Yeye ndiye Shahidi wa kwanza katika eneo la Krasnoyarsk kushtakiwa kwa uhalifu. Siku iliyofuata, Mahakama ya Wilaya ya ya Zheleznodorozhny iliyoko Krasnoyarsk iliagiza Andrey awekwe mahabusu.

Olga, mke wa Andrey, alimtumia barua za kumtia moyo. Hata hivyo, Andrey alianza kuhangaika alipoacha ghafla kupokea barua kutoka kwake. Wasiwasi wake uliongezeka wakati ambapo, kama Andrey anavyoeleza: “Mwanamume fulani alikuja na kuniuliza: ‘Kwa hiyo, mke wako amepatwa na nini? Je, unajua?’” Baada ya muda, Andrey alitambua kwamba wenye mamlaka wa gereza walikuwa wakizuia kimakusudi barua za Olga. Andrey anasema hivi: “Waliniambia ningeweza kurudi kuwa na mke wangu upesi ikiwa ningeonyesha ushirikiano au ikiwa ningekubali nina hatia.” Andrey alimtegemea Yehova na hakulegeza msimamo. Baada ya kukaa kizuizini kwa miezi nane, alihamishiwa kwenye kifungo cha nyumbani kwa miezi minne.

Julai 2, 2019, Andrey alifunguliwa kutoka kifungo cha nyumbani. Amezuiwa kutuma au kupokea barua na kutumia Intaneti. Pia, wenye mamlaka wamemwekea vizuizi kuhusu watu anaoweza kuwasiliana nao.

Kadiri matatizo yake ya kisheria yanavyoendelea, Andrey anakazia fikira na kuthamini wakfu wake kwa Yehova. Anasema hivi kwa usadikisho: “Ninajivunia kumjua Yehova na kuwa naye kila wakati.”

Tunashukuru kuwa na mfano mzuri wa Andrey wa kumtegemea Yehova kikamili ili kupata msaada.​—Zaburi 28:7.