Aprili 15, 2022, Mahakama ya Wilaya ya Ussuriyskiy katika Eneo la Primorye ilimhukumu Vitaliy kifungo cha nje cha miaka miwili.

Vitaliy Ilinykh

• Alizaliwa: 1974 (Ussuriysk, Eneo la Primorye)

• Maisha Yake: Alihitimu katika shule ya polisi na kufanya kazi katika idara ya upelelezi wa ndani. Sikuzote alijiuliza kwa nini watu wanakufa na ni nini hutupata tunapokufa. Alianza kujifunza na Mashahidi wa Yehova katika miaka ya katikati ya 1990. Alibatizwa mwaka wa 1999. Kwa sasa ameajiriwa kusafisha barabara. Alifunga ndoa na Irina mwaka wa 2006

Februari 2019, nyumba ya Ndugu Vitaliy Ilinykh ilifanyiwa upekuzi kama sehemu ya kesi ya uhalifu dhidi ya Wakristo wenzake katika jiji la Spassk-Dalniy. Septemba 18, 2019, wenye mamlaka wa Urusi walianzisha uchunguzi dhidi ya Vitaliy. Oktoba 23, 2019, maofisa waliichunguza nyumba yake kwa mara nyingine, lakini pindi hii walimkamata na kumweka mahabusu kwa siku mbili. Alipokuwa mahabusu, Vitaliy alisali kwa Yehova. Anasema hivi: “Niliposali, hisia za wasiwasi zilibadilishwa na kuwa utulivu na amani.” 

Alipoachiliwa, aliwekwa chini ya vizuizi kutoka kwa mahakama vilivyomzuia asisafiri. Mama yake, Dada Olga Opaleva, ameshtakiwa katika kesi nyingine.

Vitaliy amejifunza mengi kutokana na mambo aliyojionea. Anaeleza hivi: “Awali, nilijua kwamba Yehova haruhusu tupatwe na majaribu ambayo hatuwezi kuhimili. Sasa, nimejionea hilo maishani mwangu. Kadiri maisha yetu yanavyokuwa magumu, ndivyo tunavyomkaribia Yehova. Yehova ndiye Mfinyanzi, na akiruhusu moto kadiri fulani unipate maishani, hilo linamaanisha atanitegemeza na anaweza kutumia hali hiyo kunifinyanga. Ikionekana kwamba siwezi kuvumilia hali hiyo ngumu, huo ndio wakati wa kumsihi Yehova anipe ‘nguvu zinazopita zile za kawaida.’”​—2 Wakorintho 4:7.

Ingawa kiasili Vitaliy ni mwenye haya, amepata ujasiri kwa kutafakari 1 Petro 5:9. Pia, ametiwa moyo na ndugu na dada wengi nchini Urusi ambao wamefaulu kuvumilia mateso. Vitaliy anasema hivi kwa usadikisho: “Hali yoyote ambayo Yehova ataruhusu katika kesi yangu, . . . ni pendeleo kutoa ushahidi mbele ya wenye mamlaka katika siku hizi za mwisho.”

Kama Vitaliy, sisi tunachochewa na mifano mingi ya imani na ujasiri tunayopata miongoni mwa watu wa Yehova. Na tunaendelea kumshukuru Yehova kwa kutupatia ‘vifaa vyote vyema ili tufanye mapenzi yake.’​—Waebrania 13:20, 21.