DESEMBA 20, 2021
URUSI

HABARI ZA KARIBUNI | Ndugu Wanne Wanasubiri Matokeo ya Kesi Baada ya Nyumba Zao Kuvamiwa Katika Eneo la Trans-Baikal

CHEZA

Septemba 20, 2022, Mahakama ya Eneo la Trans-Baikal ilikataa ombi la rufaa la Ndugu Vladimir Ermolaev, Sergey Kirilyuk, Igor Mamalimov, na Aleksandr Putintsev. Vladimir, Igor, na Aleksandr bado wako gerezani. Sergey hahitaji kwenda gerezani wakati huu.

Juni 6, 2022, Mahakama ya Wilaya ya Kati ya Chita ilitangaza hukumu ya Vladimir, Sergey, Igor, na Aleksandr. Sergey alihukumiwa kifungo cha nje cha miaka sita. Vladimir, Igor, na Aleksandr walihukumiwa kifungo cha miaka sita na nusu gerezani. Vifungo vyao vitaanza mara moja.

Mfuatano wa Matukio

Machi 16, 2021

Kesi inaanza kusikilizwa
Februari 2, 2021

Vladimir, Sergey, Igor, na Aleksandr walishtakiwa kwamba wanapanga utendaji wa shirika lililopigwa marufuku
Aprili 3, 2020

Vladimir aondolewa kifungo cha nyumbani
Februari 15, 2020

Sergey aachiliwa baada ya kuwa mahabusu kwa siku tano
Februari 12, 2020

Igor na Aleksandr waachiliwa kutoka kizuizini. Sergey alizuiliwa kwa saa 72 zaidi. Vladimir alifungwa kifungo cha nyumbani kwa siku 52
Februari 10, 2020

Maofisa wa FSB, walifanya msako katika nyumba 50 za Mashahidi wa Yehova, katika Eneo la Trans-Baikal. Msako huu ulitia ndani nyumba za Mashahidi wazee-wazee na walio na ulemavu. Katika familia mmoja, mtoto aliye Shahidi alipigwa mbele ya mama yake na dada yake mdogo. Ndugu mmoja aliteswa. Mwishoni mwa msako huo, maofisa waliwakamata ndugu kumi kutia ndani Igor, Aleksandr, Sergey, na Vladimir

Maelezo Mafupi Kuwahusu

Sergey Kirilyuk

Alizaliwa: 1972 (Cheremkhovo, Eneo la Irkutsk)

Maisha Yake: Alilelewa katika familia kubwa yenye watoto sita. Anafanya kazi ya kuchomelea vyuma. Alifunga ndoa na Olga mwaka wa 1992. Wana watoto watatu

Sergey na Olga walianza kupendezwa na Biblia baada ya mwaka wa 1995 hivi. Alibatizwa mwaka wa 1998

Maelezo ya Kibinafsi

Mwenendo wako ukiwa mahabusu uliwaathirije wengine?

Niliwekwa katika seli moja na mtu aliyekuwa amefungwa mara nyingi gerezani. Ni kama alikuwa ametumia maisha yake yote akiwa mtu mzima, gerezani. . . . Kila mara niliporudi kwenye seli baada ya kuhojiwa, aliniuliza: “Je, umesalimu amri?” nami nilimjibu: “La.” Kwa kweli aliniheshimu. [Wenye mamlaka] wangenihoji siku nzima bila kunipa chakula chochote. Lakini mfungwa huyo mwenzangu angeniwekea chakula ambacho ningekula baada ya kurudi kwenye seli. Sikupatwa na njaa.

Igor Mamalimov

Alizaliwa: 1976 (Wilaya ya Ilishevsky, Jamhuri ya Bashkortostan)

Maisha Yake: Alilelewa kwenye shamba kubwa pamoja na ndugu zake wawili. Anacheza ala ya kodiani. Anafanya kazi ya muda akiwa mjenzi na pia fundi wa magari. Alifunga ndoa na Natalya mwaka wa 2007. Wana watoto watatu

Katika mwaka wa 2000 hivi, afya yake ilizorota na dada yake mdogo akafa. Mambo hayo yalimfanya aanze kujiuliza maswali kuhusu Mungu, uhai na kifo. Alipata majibu alipojifunza Biblia pamoja na Mashahidi wa Yehova. Alibatizwa mwaka wa 2008

Maelezo ya Kibinafsi

Familia yako imekaribiaje Yehova katika kipindi hiki kigumu?

Familia yetu imekuwa na ukaribu zaidi, na pia tumemkaribia Yehova zaidi. Watoto wetu wameimarisha uhusiano wao na Yehova. Wanampenda sana. . . . Maelezo yao kwenye mikutano yamekuwa bora zaidi na wanauliza maswali mazuri. . . . Wanasali sana kwa Yehova na wanatuambia jinsi anavyojibu sala zao. Jaribu hili limebadili sana maisha yetu, na kila mtu katika familia yetu amenufaika kutokana nalo.

Aleksandr Putintsev

Alizaliwa: 1974 (Verkhnyaya Khila, Eneo la Trans-Baikal)

Maisha Yake: Alikuwa mtoto pekee. Anapenda kusoma na kupiga picha. Alifunga ndoa na Galina mwaka wa 1994. Wana biashara yao na wana mwana mmoja

Katika mwaka wa 1990 hivi, alitambua kwamba kunywa kwake kileo kupita kiasi kulikuwa kunaiathiri familia yake. Alianza kujifunza Biblia na akaona kwamba kutumia hekima ya Biblia kunabadili maisha yake. Alibatizwa mwaka wa 1997

Maelezo ya Kibinafsi

Sala imekusaidia jinsi gani?

Nilihisi imani yangu imejaribiwa sana nilipohojiwa kwa mara ya kwanza. Nilikuwa na wasiwasi mwingi sana na nililemewa kihisia. Nilisali sana. Nilijua kwamba marafiki wangu wengi na washiriki wa familia, wote walikuwa wakisali kwa ajili yangu. Nakumbuka kwamba nilisali muda wote niliokuwa njiani nikienda kuhojiwa. Nilipofika ndani ya ofisi ya mpelelezi, nilihisi utulivu mwingi na nilikuwa na uhakika Yehova atanitegemeza. Kuhojiwa mara kwa mara kulinipa uhakika zaidi kwamba Yehova hataniacha.

Na tuwaige ndugu zetu wenye imani yenye nguvu. Kama Danieli na waandamani wake watatu, ndugu hao ‘wameazimia moyoni’ kubaki waaminifu kwa Yehova, licha ya kushinikizwa sana na wenye mamlaka.—Danieli 1:8.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI