FEBRUARI 13, 2023 | HABARI ZIMEONGEZWA: NOVEMBA 6, 2023
URUSI

HABARI ZA KARIBUNI—RUFAA | Familia Tatu Zateswa Jijini Yaroslavl

CHEZA

Oktoba 30, 2023, Mahakama ya Wilaya ya Dzerzhinsky iliyoko Yaroslavl ilikubali kwa sehemu rufaa ya Ndugu Pyotr Filiznov na Ndugu Andrey Vyushin. Hukumu yao ya kifungo cha nyumbani imepunguzwa kutoka miaka sita na nusu hadi miaka miwili na nusu. Hukumu ya Ndugu Aleksandr Kuznetsov na mke wake, Mariya, haijabadilishwa.

Agosti 3, 2023, Mahakama ya Wilaya ya Dzerzhinsky iliyoko Yaroslavl imewahukumu Ndugu Pyotr Filiznov; Ndugu Aleksandr Kuznetsov na mke wake, Dada Mariya Kuznetsova; na Ndugu Andrey Vyushin. Kila mmoja wao amehukumiwa kifungo cha nyumbani. Andrey na Pyotr wamehukumiwa miaka sita na nusu. Aleksandr na Mariya wamehukumiwa miaka miwili na nusu. Hawahitaji kwenda gerezani wakati huu.

Maelezo Mafupi Kuwahusu

Pyotr Filiznov

Alizaliwa: 1965 (Yaroslavl, Eneo la Yaroslavl)

Maisha Yake: Anafanya kazi ya kutunza jengo la ghorofa lenye nyumba za kupanga

Alifunga ndoa na Svetlana mwaka wa 1988. Wana mtoto mmoja wa kiume na mmoja wa kike. Alibatizwa na kuwa Shahidi wa Yehova mwaka wa 1997

Maelezo ya Kibinafsi

Ulihisije ulipokuwa mahabusu?

Muda niliokuwa mahabusu ulionekana kuwa mrefu na nilikuwa na mkazo sana. Wakati mwingine sikujua jambo ambalo ninapaswa kufanya au kutofanya na mara nyingi nilikuwa na wasiwasi kwamba ningefanya au kusema jambo ambalo si sahihi. Sasa, ninapofikiria kuhusu kipindi hicho, ninaona kwamba kilichohitajika tu ni kuonyesha tunda la roho na sikuzote kufanya hivyo kulikuwa na matokeo mazuri. Nimetambua pia kwamba sihitaji kuwa na wasiwasi kuhusu mambo ambayo huenda yakatukia. Yehova anadhibiti kila kitu.

Aleksandr Kuznetsov

Alizaliwa: 1982 (Moscow, Eneo la Moscow)

Maisha Yake: Alikuwa mwalimu wa Kiingereza na hesabu

Alianza kujifunza Biblia Aprili 2000. Alivutiwa sana na upendo miongoni mwa Mashahidi wa Yehova. Alibatizwa mwaka wa 2002

Alifunga ndoa na Mariya mwaka wa 2017. Baada ya kuachiliwa kutoka mahabusu alipatikana na ugonjwa wa kansa

Maelezo ya Kibinafsi

Ni nini kinachokusaidia kudumisha shangwe yako licha ya ugonjwa wako na mateso?

Wakati mwingine, mimi huvunjika moyo na ninahisi kwamba sina nguvu za kuvumilia. Hata hivyo, sikuzote Yehova huniandalia “njia ya kutokea.” (1 Wakorintho 10:13) Mimi husali kutoka moyoni na wakati mwingine ninamlilia Yehova, na sala hizo zimenisaidia. Vilevile, kuimba nyimbo za ufalme, kufanya funzo la kibinafsi, na kutafakari kuhusu tumaini letu, huniimarisha. Mimi na mke wangu hujitahidi kuwatia moyo ndugu na dada zetu. Kufanya hivyo kunatusaidia tusikazie fikira kupita kiasi matatizo yetu. Kuliko wakati mwingine wowote, tunathamini sana jinsi Yehova anavyotumia roho yake takatifu kutufariji na kutupatia amani ya moyoni tunayohitaji.

Andrey Vyushin

Alizaliwa: 1975 (Yaroslavl, Eneo la Yaroslavl)

Maisha Yake: Alilelewa na mama na nyanya. Anafanya kazi ya kudumisha mifumo ya kompyuta. Anamtunza mama yake ambaye ni mlemavu

Aliwafahamu Mashahidi wa Yehova kupitia rafiki yake wa karibu ambaye alianza kujifunza Biblia. Mashahidi walijibu maswali yake, naye alijionea kwamba wanaishi kulingana na mambo wanayofundisha. Alibatizwa mwaka wa 1995

Alifunga ndoa na Anastasiya mwaka wa 2013. Wana binti mmoja

Maelezo ya Kibinafsi

Wewe na mke wako mmetumiaje mambo ambayo mmepitia kuwatia moyo wengine?

Mimi na mke wangu tulitiwa moyo sana na jinsi ambavyo Dennis Christensen alivumilia majaribu ambayo alipata. Alikuwa miongoni mwa watu wa kwanza kufungwa gerezani, lakini sikuzote alibaki mtulivu na alijiendesha vizuri. Mfano wake ulitupatia uhakika kwamba sisi pia tunaweza kufanya hivyo. Sasa, tunapokutana na ndugu au dada ambaye anaogopa, tunafanya yote tuwezayo ili kumtia moyo na kumhakikishia kwamba mambo si mabaya kama yanavyoonekana. Tunawakumbusha ndugu na dada wasijitie woga kwa kuwazia jinsi mateso watakayopata yatakavyokuwa. Tunachoweza kufanya ni kuyaona mateso kuwa fursa ya kujua imani yetu ina nguvu kadiri gani.

Tuna uhakika kwamba kama tu watumishi hawa wanne wa Yehova ambao ni waaminifu, sisi pia tunaweza kuwa miongoni mwa wale ‘wanaomtumaini Yehova na ambao hawawezi kutikiswa.’—Zaburi 125:1.

Mfuatano wa Matukio

Aprili 13, 2021

Wawekwa kizuizini baada ya maofisa wa polisi kufanya msako katika nyumba zao
Aprili 15, 2021

Wapelekwa mahabusu
Julai 14, 2021

Waachiliwa kutoka mahabusu na kuwekewa vizuizi vya kusafiri
Septemba 9, 2022

Kesi ya uhalifu yaanza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI