MEI 6, 2024 | HABARI ZIMEONGEZWA: JULAI 11, 2024
URUSI

HABARI ZA KARIBUNI—VIFUNGO VYA GEREZANI | “Yehova Anaweza Kutusaidia Kuvumilia Hali Yoyote”

CHEZA

Julai 10, 2024, Mahakama ya Wilaya ya Khorolskiy iliyo katika Eneo la Primorye iliwahukumu Ndugu Boris Andreyev, Ndugu Anatoliy Li, na Dada Nataliya Sharapova. Boris alihukumiwa miaka sita gerezani, Anatoliy alihukumiwa miaka sita na miezi sita gerezani, na Nataliya alihukumiwa miaka mitatu gerezani. Tayari wote watatu walikuwa mahabusu kwa hiyo, wataendelea kukaa kizuizini.

Maelezo Mafupi Kuwahusu

Boris Andreyev

Alizaliwa: 1951 (Monastyrishche, Eneo la Primorye)

Maisha Yake: Alifanya kazi na kikosi cha huduma za dharura

Kupata majibu ya maswali yake moja kwa moja kutoka katika Biblia kulimthibitishia kwamba amepata kweli. Alibatizwa mwaka wa 2004 na kuwa mmoja wa Mashahidi wa Yehova

Alifunga ndoa na Aleksandra mwaka wa 2020

Maelezo ya Kibinafsi Kutoka kwa Aleksandra, Mke wa Boris a

Mume wako amekusaidiaje kuvumilia katika pindi hii ngumu?

Siku ambayo ilikuwa ngumu zaidi kwangu ni siku ambayo Boris alikamatwa. Niliumizwa kihisia nami nikaanza kulia. Nilimwandikia Boris barua na kumweleza kilichokuwa kimetokea na jinsi nilivyohisi. Alijibu barua yangu na kunieleza kwamba alelewa jinsi nilivyohisi. Lakini jambo muhimu zaidi, alinikumbusha hali ngumu tulizopitia wakati uliopita na jinsi Yehova alivyotusaidia kuzishinda. Kwa kweli hicho ndicho nilichohitaji kwa wakati huo, na hilo lilinithibitishia hata zaidi kwamba Yehova hatatuacha.

Anatoliy Li

Alizaliwa: 1985 (Uzbekistan)

Maisha Yake: Alitembelea makanisa mbalimbali ili kutafuta majibu ya maswali yake lakini hakupata. Alianza kujifunza Biblia na Mashahidi wa Yehova na alifurahia sana kujifunza kweli kutoka katika Biblia. Alibatizwa mwaka wa 2010

Alifunga ndoa na Raisa mwaka wa 2011

Maelezo ya Kibinafsi Kutoka kwa Raisa, Mke wa Anatoliy b

Yehova amekusaidiaje wewe na mume wako?

Muda mfupi baada ya kupelekwa mahabusu, Anatoliy alinieleza kwamba alikuwa na wasiwasi sana kwa ajili yangu kwa sababu nilikuwa peke yangu. Kabla ya kukamatwa, kila siku tulishiriki utendaji wa kiroho pamoja. Lakini aliacha kuwa na wasiwasi alipotambua kwamba nilipata msaada kutoka kwa akina ndugu na kunipa kila kitu nilichohitaji. Sote tumejionea ukweli wa kwamba Yehova anatutunza na hatatuacha kamwe.

Nataliya Sharapova

Alizaliwa: 1972 (Kazakhstan)

Maisha Yake: Alikutana na Mashahidi wa Yehova mwaka wa 1995 na akakubali kujifunza Biblia. Akapata uthibitisho kwamba Biblia ni Neno la Mungu. Alibatizwa mwaka wa 2012

Maelezo ya Kibinafsi Kutoka kwa Nina, Mama ya Nataliya c

Ni nini kimemsaidia Nataliya kudumisha mtazamo mzuri alipokuwa mahabusu?

Binti yangu amekabiliana na magumu mbalimbali akiwa kizuizini. Huko kuna baridi kali sana. Pia, anakabiliana na maumivu ya kichwa ya mara kwa mara. Mara nyingi anapovunjika moyo anakumbuka kwamba Yehova ana uwezo wa kumsaidia kuvumilia matatizo yake yote. Anasema hivi: “Ninajua kwamba sitakaa hapa milele. Yehova ananipa subira, nami niko tayari kungoja.” Majaribu yamemsaidia Nataliya kumkaribia Yehova hata zaidi. Anahisi ni kana kwamba Yehova amembeba mikononi mwake.

Kama ilivyokuwa kwa Anatoliy, Boris, na Nataliya, tuna uhakika kwamba Yehova ataendelea kutujibu katika siku zetu za taabu na kutupatia nguvu za kuvumilia.—Zaburi 20:1.

Mfuatano wa Matukio

Julai 28, 2022

Kesi ya uhalifu ilifunguliwa
Oktoba 6, 2022

Nyumba kumi na mbili zilifanyiwa msako katika kijiji cha Yaroslavsky, Boris na Nataliya waliwekwa kizuizini
Oktoba 7, 2022

Boris na Nataliya walisafirishwa na kupelekwa mahabusu
Oktoba 12, 2022

Anatoliy aliwekwa mahabusu
Oktoba 13, 2022

Anatoliy alisafirishwa na kupelekwa mahabusu
Oktoba 5, 2023

Kesi ya uhalifu ilianza

a b c Makala hii ilipokuwa ikitayarishwa, Ndugu Andreyev, Ndugu Li, na Dada Sharapova walikuwa mahabusu na haikuwezekana kupata maelezo ya kibinafsi kutoka kwao.

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI