NOVEMBA 2, 2021
URUSI

HABARI ZA KARIBUNI | Waabudu Wenzetu Watano Walioshtakiwa Huko Sakhalin Wanategemezwa na Yehova

CHEZA

Mei 11, 2022, Mahakama ya Eneo la Sakhalin ilikataa ombi la rufaa ya Ndugu Vyacheslav Ivanov, Ndugu Aleksandr Kozlitin, Ndugu Sergey Kulakov, Dada Tatyana Kulakova, na Ndugu Yevgeniy Yelin. Hawahitaji kwenda gerezani wakati huu.

Januari 31, 2022, Mahakama ya Jiji la Nevelskiy lililo katika Eneo la Sakhalin iliwahukumu Vyacheslav, Aleksandr, Sergey, Tatyana, na Yevgeniy. Sergey na Yevgeniy walipewa vifungo vya nje vya miaka sita na miezi sita. Vyacheslav, Aleksandr, na Tatyana walipewa vifungo vya nje vya miaka miwili.

Mfuatano wa Matukio

Julai 2020

Vyacheslav, Aleksandr, Sergey, na Tatyana waliwekewa vizuizi vya kusafiri
Aprili 2020

Yevgeniy aliwekewa vizuizi vya kusafiri
Januari 20, 2019

Maofisa wa kitengo cha polisi wa siri wa Idara ya Usalama wa Taifa (FSB) walivamia nyumba 11 hivi za raia walioshukiwa kuwa Mashahidi wa Yehova. Maofisa hao walitumia nguvu na wakawahoji hata watoto wadogo katika familia hizo. Hilo lilifanyika punde baada ya Rais Vladimir Putin kuahidi kwamba atachunguza kuteswa kwa Mashahidi wa Yehova

Maelezo Mafupi Kuwahusu

Sergey Kulakov

Alizaliwa: 1961 (Nevelsk, Eneo la Sakhalin)

Maisha Yake: Aliishi katika shule ya bweni tangu alipokuwa na umri wa miaka 14. Alipokuwa mtoto alicheza mpira wa miguu na chesi. Alihitimu kwenye shule ya ufundi na kuzoezwa kufanya kazi ya kurekebisha meli. Sasa amestaafu

Yeye na Tatyana mke wake, walianza kujifunza Biblia baada ya mwaka wa 2000. Upendo alioona miongoni mwa Mashahidi wa Yehova ulimchochea abatizwe katika mwaka wa 2008. Wenzi hao wana watoto wawili wa kiume

Maelezo ya Kibinafsi

Yehova amekusaidia kuvumilia changamoto gani hususa?

Ilikuwa vigumu sana kuendelea kuwa mtulivu na mwenye shangwe. Kwa kuwa niliendelea kujifunza Biblia na kumwabudu Yehova, uhakika wangu katika maneno haya ya Mungu uliimarishwa: “Kwa mtu mshikamanifu unatenda kwa ushikamanifu.” (2 Samweli 22:26) Ninazidi kumpenda na kumtumaini Yehova. hilo hunisaidia nisiwe na wasiwasi kuhusu mambo yatakayotokea wakati ujao, kwa sababu ninajua hata nini kitokee, atanitunza.

Tatyana Kulakova

Alizaliwa: 1973 (Nevelsk, Eneo la Sakhalin)

Maisha Yake: Tangu alipokuwa mtoto, alipenda kusoma, kuchora, na muziki. Amefanya kazi ya kupiga plasta na kupaka rangi. Aliolewa na Sergey mwaka wa 1996, na wana watoto wawili wa kiume

Alithamini Biblia baada ya kujifunza mambo ambayo inafundisha kuhusu kusudi la Mungu kwa dunia na hali ya wafu. Alibatizwa na kuwa Shahidi wa Yehova mwaka wa 2003

Maelezo ya Kibinafsi

Ni andiko gani ambalo limekusaidia kuwa jasiri au kuvumilia kwa shangwe?

Walipovamia nyumba yetu na baadaye wakafungua kesi dhidi yangu na nikalazimika kufika kwenye ofisi za FSB, maneno ambayo Elisha alimwambia mtumishi wake yalinitia moyo: “Kwa maana wale walio pamoja nasi ni wengi kuliko wale walio pamoja nao.” Nilipiga picha akilini kwamba Mungu Mweza-Yote, Yehova, na pia Yesu pamoja na malaika wote walikuwa upande wangu. Utegemezo wao mkubwa ulinisaidia kufanya yale niliyohitaji kufanya badala ya kuwa na wasiwasi kupita kiasi.

Yevgeniy Yelin

Alizaliwa: 1974 (Yuzhno-Sakhalinsk, Eneo la Sakhalin)

Maisha Yake: Alipenda kuchora tangu alipokuwa kijana. Ni mtaalamu wa mapambo ya nyumba. Anamiliki kampuni ya kurekebisha nyumba upya. Vilevile, anabuni na kutengeneza vitu vya mbao

Alianza kujifunza Biblia alipokuwa shule ya sekondari. Katika mwaka wa 1990 hivi, alikutana na Mashahidi wa Yehova na aliwaheshimu sana kwa sababu walitumia kanuni za Biblia maishani mwao. Alibatizwa mwaka wa 1992. Alifunga ndoa na Anastasia mwaka wa 2017

Maelezo ya Kibinafsi

Ungewapa ushauri gani wengine ambao huenda wakakabili mateso?

Ningewashauri wengine kujaza mambo ya kiroho akilini na moyoni. Ni muhimu sana kufuata mwongozo wa tengenezo. Tunasubiri kwa hamu utimizo wa unabii kuhusu ulimwengu mpya, hata hivyo, mateso ni sehemu ya unabii huo na lazima yawepo. Kwa kweli, tunapokabiliana na mateso, tunashiriki katika utimizo wa unabii. Hilo ni pendeleo la pekee!

Tunajua kwamba Yehova ataendelea kuwatunza ndugu na dada zetu wapendwa wanaokubaliana na maneno ya nabii Isaya aliyesema: “Mungu ni wokovu wangu. Nitamtumaini nami sitaogopa.”—Isaya 12:2.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI