MACHI 24, 2022
URUSI

HABARI ZA KARIBUNI | Yehova Anaendelea Kutegemeza Familia za Ndugu Sita Walio Mahabusu

CHEZA

Septemba 19, 2022, Mahakama ya Jiji la Gukovo iliyo katika Eneo la Rostov iliwahukumu Ndugu Aleksey Dyadkin, Ndugu Aleksey Goreliy, Ndugu Nikita Moiseyev, Ndugu Vladimir Popov, Ndugu Yevgeniy Razumov, na Ndugu Oleg Shidlovskiy. Ndugu Goreliy na Ndugu Shidlovskiy walihukumiwa kifungo cha miaka sita na nusu gerezani. Ndugu Dyadkin, Ndugu Moiseyev, Ndugu Popov, na Ndugu Razumov walihukumiwa kifungo cha miaka saba gerezani. Hukumu hizo zitatekelezwa mara moja.

Mfuatano wa Matukio

Agosti 8, 2020

Maofisa wa FSB walifanya msako katika nyumba 17 za Mashahidi wa Yehova katika majiji matatu katika Eneo la Rostov na katika jiji la Kursk. Ndugu Goreliy, Ndugu Moiseyev, Ndugu Razumov, na Ndugu Shidlovskiy walikamatwa na kisha siku iliyofuata walipelekwa mahabusu. Ndugu Popov aliwekwa kwenye orodha ya wahalifu nchini
Agosti 12, 2020

Maofisa wa FSB walimweka Ndugu Popov kizuizini. Kisha baada ya siku mbili alipelekwa mahabusu
Agosti 21, 2020

Baada ya Ndugu Dyadkin kuhojiwa na wenye mamlaka alipelekwa mahabusu
Juni 28, 2021

Wakili aliwatembelea ndugu hao sita wakiwa mahabusu. Walimweleza kuhusu hali ngumu wanazopitia, kama vile joto kali lililozidi nyuzi 40 Selsiasi, kuvu kwenye kuta, na kuwekwa pamoja na wafungwa walio na COVID-19
Julai 21, 2021

Ndugu Popov alikuwa na matatizo ya kupumua, basi alihamishwa na kupelekwa kwenye mahabusu nyingine yenye kituo cha matibabu. Baada ya muda alipelekwa hospitali
Septemba 30, 2021

Ndugu Popov alirudishwa mahabusu baada ya kuwa hospitali kwa zaidi ya miezi miwili
Novemba 17, 2021

Kesi ya uhalifu ilianza, na ndugu hao sita wakaongezewa muda wa kukaa mahabusu

Maelezo Mafupi Kuwahusu

Aleksey Goreliy

Alizaliwa: 1980 (Ryazan, Eneo la Ryazan)

Maisha Yake: Akiwa mtoto alifurahia kujifunza usanifu-majengo na historia, na kujenga mitumbwi midogo-midogo. Alifanya kazi akiwa mhasibu wa kampuni ya sabuni

Alijifunza kweli kutoka kwa mama yake na nyanya yake. Alibatizwa mwaka wa 1995. Alifunga ndoa na Inna mwaka wa 2011. Wana mwana mmoja

Maelezo ya Kibinafsi ya Inna, Mke wa Aleksey b

Je kuna mstari wowote wa Biblia ambao umekuimarisha?

Mara nyingi ninakumbuka maneno ya Mtume Paulo: “Kwa maana ninapokuwa dhaifu, ndipo ninapokuwa na nguvu.” (2 Wakorintho 12:10) . . . Walipokuja kufanya msako na kumkamata Aleksey, nilishtuka sana—nilihisi maisha yangu yameenda mrama. Mstari huo ulinihakikishia kwamba Yehova atanipa nguvu za kuvumilia na kubaki mtulivu katika njia itakayomletea utukufu.

Yevgeniy Razumov

Alizaliwa: 1979 (Gukovo, Eneo la Rostov)

Maisha Yake: Yeye ni fundi bomba

Aliacha kuvuta sigara na kutumia madawa ya kulevya baada ya kujifunza Biblia pamoja na Mashahidi wa Yehova. Alibatizwa mwaka wa 2002

Alifunga ndoa na Natalya mwaka wa 2005

Maelezo ya Kibinafsi ya Natalya, Mke wa Yevgeniy e

Yehova anawategemezaje wakati huu?

Mume wangu ndiye aliyefanya kazi ili kuandalia familia yetu mahitaji. Nimekuwa mlemavu tangu utotoni na sina uwezo wa kufanya kazi. Na sasa sina njia yoyote ya kupata pesa. [Hata hivyo], nimejionea jinsi Yehova anavyonisaidia licha ya hali yangu. Wakati mwingine msaada huo unakuja bila kutarajia na unanipa shangwe nyingi na nguvu, na ninatambua kabisa kwamba siko peke yangu. . . . Jambo hilo linanihakikishia kwamba Yehova anaelewa hali yangu na yuko tayari kunisaidia na kunitegemeza sikuzote.

Oleg Shidlovskiy

Alizaliwa: 1969 (Gornyatskiy, Eneo la Rostov)

Maisha Yake: Alipokuwa kijana alipenda michezo, hasa mpira wa kikapu. Alikuwa mwalimu wa michezo

Akiwa chuo kikuu alianza kujifunza Biblia pamoja na Mashahidi wa Yehova. Alibatizwa mwaka wa 1991

Alifunga ndoa na Natalya mwaka wa 1998. Wana mabinti wawili

Maelezo ya Kibinafsi ya Natalya, Mke wa Oleg f

Ni nini kinachokusadia kuwa na mtazamo mzuri pindi hii ambayo mume wako yuko mahabusu?

Nimetenga wakati zaidi kwa ajili ya funzo la kibinafsi na hilo limenisaidia kushughulika na maumivu ya kihisia. Kwa sababu ya janga, inakuwa vigumu kushirikiana na wengine, basi ili nisishuke moyo, ninafanya shughuli nyingi nyumbani.

Vilevile nina Baba [wa mbinguni] anayenijali na ndugu na dada wanaonipenda. Sijui hali zingekuwaje bila msaada huo. Akina ndugu walikuja mara moja na kuniuliza jinsi ambavyo wangeweza kunisaidia.

Tunaendelea kumwomba Yehova kwa bidii awasaidie ndugu hao na familia zao. Tuna uhakika kwamba Yehova atawapa imani na nguvu wanazohitaji.—Waroma 15:30.

a b c d e f Kwa sababu ndugu hao sita wako mahabusu kwa sasa, haikuwezekana kuzungumza nao ili kujua maoni yao.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI