NOVEMBA 5, 2021
URUSI

Habari za Karibuni | Ratiba ya Kiroho ya Ndugu Aleksey Yershov Inamsaidia Asivunjike Moyo

CHEZA

Aprili 7, 2022, Mahakama ya Eneo la Tomsk ilibadili hukumu iliyokuwa imetolewa dhidi ya Ndugu Aleksey Yershov. Sasa amepewa kifungo cha nje cha miaka mitatu. Aliachiliwa mara moja kutoka gerezani.

Januari 19, 2022, Mahakama ya JIji la Severskiy katika Eneo la Tomsk ilimhukumu Aleksey kifungo cha miaka mitatu gerezani. Hukumu yake ilianza kutekelezwa mara moja.

Mfuatano wa Matukio

Mahakama ya Jiji la Severskiy itatangaza uamuzi wake hivi karibuni katika kesi inayomhusu Ndugu Aleksey Yershov. a Mwendesha-mashtaka aliomba Ndugu Aleksey afungwe kifungo cha miaka mitano.

Juni 22, 2021

Kesi hiyo ya uhalifu iliwasilishwa kwenye Mahakama ya Jiji la Severskiy iliyo katika Eneo la Tomsk
Machi 30, 2021

Aleksey alishtakiwa rasmi kwa kosa la uhalifu kwa kutegemea video zilizorekodiwa na mtu ambaye kwa zaidi ya mwaka mmoja alijifanya anapendezwa kujifunza Biblia
Julai 14, 2020

FSB (polisi wa siri wa Urusi) pamoja na maofisa wa Kamati ya Uchunguzi walivamia na kupekua nyumba ya Aleksey kwa saa saba. Walichukua kadi za benki, vifaa vya kielektroni, Biblia, pasipoti, na vifaa vya kuunganishia Intaneti (Wi-Fi)

Maelezo Mafupi Kumhusu

Aleksey Yershov

Alizaliwa: 1953 Seversk (Eneo la Tomsk)

Maisha Yake: Baba yake alikufa mwaka ambao Aleksey alizaliwa. Mama yake alimlea. Alifanya kazi ya uhandisi na alifundisha katika shule ya ufundi pia

Mwaka wa 1976, alifunga ndoa na Lyudmila. Wana watoto wawili wakubwa

Mmoja wa wanafunzi wake alimwalika kwenye mkutano wa Mashahidi wa Yehova na Aleksey akahisi kwamba angependa kujifunza Biblia. Alivutiwa na hekima inayotumika inayopatikana katika Biblia na tumaini la Ufalme. Alibatizwa na kuwa Shahidi wa Yehova mwaka wa 1994

Maelezo ya Kibinafsi

Ni nini ambacho kimekusaidia kuimarisha uhusiano wako na Yehova unapokabiliana na majaribu haya?

Mimi na mke wangu tunasali pamoja mara nyingi zaidi. Ninajua kwamba siwezi kuvumilia hali hii bila msaada wa Yehova. Kwa sababu hiyo, ninajitahidi kumkaribia Yehova kwa kujifunza Biblia kibinafsi na kusoma Biblia kila siku. Kila asubuhi, mimi na mke wangu huzungumzia andiko la siku na kusali pamoja kwa Yehova.

Umewezaje kushinda hisia za kuvunjika moyo?

Funzo la kibinafsi hunisaidia ninapovunjika moyo. Ninatafakari kuhusu watumishi waaminifu wa wakati uliopita. Kuna masimulizi mengi katika Biblia yanayoonyesha umuhimu wa kuendelea kuwa watulivu na kumtumaini Yehova. Ninapotafakari ninajaribu kuelewa kilichowasaidia watumishi wa Mungu kuendelea kuwa watulivu. Matendo 5:29 inasema hivi: “Lazima tumtii Mungu kuwa mtawala badala ya wanadamu.” Sanhedrini ilipowaamuru mitume waache kuhubiri, mitume hawakuingiwa na woga. Hata walipopigwa, hawakuingiwa na hofu. Mitume walijua kwamba Yehova alikuwa pamoja nao na alifurahishwa nao.

Kusoma Biblia kila siku pamoja na kusali kutaendelea kuwatia nguvu na kuwafariji ndugu na dada zetu nchini Urusi. Andiko la Zaburi 9:9 linatuthibitishia hivi: “Yehova atakuwa kimbilio salama kwa wanaokandamizwa, kimbilio salama katika nyakati za taabu.”

a Tarehe ya hukumu haitolewi mapema pindi zote.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI