JANUARI 20, 2022
URUSI

Kumtegemea Yehova Kumewasaidia Ndugu Zetu Katika Jiji la Karpinsk, Kuimarisha Imani Yao

CHEZA

Mahakama ya Jiji la Karpinsk katika Eneo la Sverdlovsk, hivi karibuni itatoa uamuzi wake katika kesi inayohusisha Dada Darya Dulova, Dada Venera Dulova, Ndugu Aleksandr Prianikov na mke wake, Dada Anastasiya Prianikova, na Dada Svetlana Zalyaeva. Mwendesha-mashtaka bado hajatoa ombi la hukumu anayopendekeza

Mfuatano wa Matukio

Januari 27, 2020

Mahakama iliwatangaza Aleksandr, Darya, na Venera kuwa na hatia katika kesi nyingine
Februari 2020

Kesi ya pili ya uhalifu ilianzishwa dhidi ya Aleksandr, Darya, na Venera
Machi 30, 2020

Wenye mamlaka walifanya msako kwenye nyumba za washukiwa na wakachukua vifaa vyao vya kielektroni
Mei 19, 2020

Anastasiya na Svetlana waliongezwa kwenye kesi ya uhalifu. Wote wawili walikatazwa kuondoka katika eneo hilo
Aprili 29, 2021

Kesi ya uhalifu ilianzishwa

Maelezo Mafupi Kuwahusu

Venera Dulova

Alizaliwa: 1968 (Karpinsk, Eneo la Sverdlovsk)

Maisha Yake: Mama yake na nyanya yake ndio waliomlea. Anapenda kufuma, kusoma, na kujifunza. Kabla hajatimia umri wa miaka 17, mama yake na nyanya yake walikufa. Alifunga ndoa mwaka wa 1990. Ana watoto watatu

Alijiuliza kwa nini tunakufa na jinsi maisha ya baadaye ya watoto wake yangekuwa. Alianza kujifunza na Mashahidi wa Yehova alipokuwa na umri wa miaka 28. Alibatizwa mwaka wa 1998

Maelezo ya Kibinafsi

Yehova amekusaidiaje katika kipindi hiki?

Washiriki wa familia ambao mwanzoni walitupinga mimi na mume wangu, sasa wanatuonyesha fadhili. Mume wangu hunisifu na kunitia moyo niendelee kuvumilia kwa uaminifu. . . Yehova pia anatusaidia kupitia maneno yenye fadhili ya ndugu na dada zetu wa kiroho.

Baada ya nyumba yetu kufanyiwa msako kwa mara ya kwanza, wazo la kwanza lililonijia akilini lilikuwa: ‘Eti nimeshtakiwa kuwa mhalifu, haiwezekani! Hiyo ni ndoto mbaya!’ Lakini rafiki mmoja akapendekeza badala ya kufikiri hivyo nianze kujiambia, ‘Mimi ni mshindi kama Yesu.’

Aleksandr Prianikov

Alizaliwa: 1987 (Udinsk, Eneo la Khabarovsk)

Maisha Yake: Anapenda muziki. Anacheza ala ya kodiani. Alifanya kazi akiwa fundi-umeme katika kiwanda. Kwa sasa anatengeneza vigae

Sikuzote aliamini kwamba Mungu yuko. Aliguswa moyo na ahadi ya Mungu kwamba wanadamu hawatakufa tena. Alibatizwa mwaka wa 2004. Alifunga ndoa na Anastasiya, mwaka wa 2011

Maelezo ya Kibinafsi

Akina ndugu wamewatiaje moyo katika kipindi hiki cha majaribu?

Ndugu mmoja alitusaidia kufikiria kuhusu Zaburi 139:1. Alisema kwamba “Yehova anawapenda sana hivi kwamba anatambua kila kitu mnachofikiri, mnachohisi, mnachosema, na mnachofanya. . . . Mfalme Daudi alijua kwamba Yehova anamjali sana kila mmoja wetu. . . . Yehova anaona mambo yote tunayopitia maishani yanayofinyanga utu wetu. Hatupaswi kuhisi kana kwamba tuko peke yetu.” Maneno hayo yalinigusa moyo sana. Kila siku ninahisi kwamba Yehova ananisaidia.

Anastasiya Prianikova

Alizaliwa: 1987 (Karpinsk, Eneo la Sverdlovsk)

Maisha Yake: Mama yake alimlea yeye na ndugu yake mkubwa. Anapenda kuimba na kushona

Alipenda ahadi ya Biblia kuhusu wakati ujao wenye amani. Alitambua kwamba Biblia ina ushauri mwingi wenye hekima. Alibatizwa mwaka wa 2002. Alifunga ndoa na Aleksandr mwaka wa 2011

Maelezo ya Kibinafsi

Uhusiano wako na Yehova umeimarikaje katika kipindi hiki cha majaribu?

Katika miaka mitatu ambayo kesi yetu ya uhalifu imekuwa ikiendelea, imani yangu imeimarika zaidi. Ninamtegemea Yehova zaidi. Ninaelewa kwamba sikuzote Yehova huwatunza watu wake. Wakati mwingine tunapohisi hatuwezi kuvumilia tena, anatusaidia kuendelea kuvumilia. Nimetambua kwamba kadiri mateso yanavyoongezeka, ndivyo ninavyohisi nataka kufanya mengi zaidi kwa ajili ya Yehova.

Hata ingawa ndugu na dada zetu wapendwa nchini Urusi wanaendelea kuteswa, imani yetu inaimarika tunapoona jinsi Yehova anavyowapenda na kuwatunza. Sifa iliyojaribiwa ya imani yao inatokeza “sifa na utukufu na heshima” kwa ajili ya jina la Yehova.—1 Petro 1:7.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI