JULAI 25, 2023
URUSI

Kusali na Kuwa na Mtazamo Mzuri Kumewasaidia Mashahidi Walio Vladivostok

CHEZA

Mahakama ya Wilaya ya Pervorechenskiy iliyo Vladivostok itatangaza hivi karibuni hukumu yake katika kesi inayowahusu Dada Nina Astvatsaturova, Dada Yelena Barmakina, Dada Ludviga Katanaeva, Dada Yekaterina Treguba, Dada Yelena Tsorn, Ndugu Igor Lonchakov na Ndugu Yuriy Redozubov. Mwendesha-mashtaka bado hajatoa ombi la hukumu anayopendekeza.

Maelezo Mafupi Kuwahusu

Yelena Barmakina

Alizaliwa: 1967 (Cherepanovo, Eneo la Novosibirsk)

Maisha Yake: Ni mpiga-picha

Alifahamiana na Mashahidi wa Yehova kupitia mama yake na kaka yake walipoanza kujifunza Biblia. Alibatizwa mwaka wa 2000

Alifunga ndoa na Dmitriy mwaka wa 2006. Dmitriy alihukumiwa kifungo cha miaka nane gerezani mwaka wa 2023

Maelezo ya Kibinafsi

Ni nini kilichokusaidia kukabiliana na hisia mbalimbali unapopitia changamoto hizi?

Baada tu ya msako uliofanywa nyumbani mwetu, mimi na mume wangu tulikamatwa, na Dmitriy aliwekwa kizuizini. Nilichanganyikiwa kwa sababu sikujua ningeweza kuishije bila mume wangu na wakati huohuo nilitamani kumsaidia. Katika siku za mwanzoni, ilikuwa vigumu kwangu kusali kwa sababu nilikuwa na hisia nyingi. Lakini nilikumbuka kwamba ninapohisi nimelemewa na hata sijui nisali kuhusu nini, Yehova atakubali sala zilizoongozwa na roho za watumishi wake wa kale zilizo katika Biblia kuwa maombi yanayotoka kwangu. (Waroma 8:26) Hilo lilinifariji sana katika kipindi kigumu sana maishani mwangu.

Igor Lonchakov

Alizaliwa: 1977 (Saratov, Eneo la Saratov)

Maisha Yake: Anafanya kazi kwenye mapokezi ya posta

Mama yake alibatizwa na kuwa Shahidi wa Yehova Igor alipokuwa chuoni. Alichochewa kujifunza Biblia alipoona shangwe ya mama yake. Alibatizwa mwaka wa 2008

Maelezo ya Kibinafsi

Ni mstari gani katika Biblia uliokutia moyo?

Nimepata athari za kimwili, kihisia, na za kifedha kwa sababu ya kesi yangu ya uhalifu na hilo limenifanya nikumbuke jinsi maisha yangu yalivyokuwa mazuri hapo awali. Nilimweleza Yehova jinsi nilivyohisi katika sala. Na baadaye, nilitafakari andiko la Mhubiri 7:10, inayosema: “Usiulize: ‘Mbona siku za zamani zilikuwa bora kuliko hizi?’ kwa maana hukuuliza hivyo kwa hekima.” Mstari huo umenisaidia kutua na kufikiria baraka maishani mwangu: mama yangu, mchumba wangu, na ndugu na dada zangu kutanikoni. Hao wote wananiunga mkono. Na jambo la muhimu hata zaidi ni kwamba ninajua Yehova yupo pamoja na mimi. Sasa, ninamshukuru Yehova katika sala mara kwa mara kwa baraka zote hizi badala ya kumweleza matatizo yangu tu.

Yuriy Redozubov

Alizaliwa: 1972 (Komsomolsk-on-Amur, Eneo la Khabarovsk)

Maisha Yake: Alijifunza kipaji cha kuchora alipokuwa mtoto. Sasa ni mwalimu wa sanaa hiyo

Alifunga ndoa na Anastasiya mwaka wa 1998. Wana mabinti watatu

Yeye na mke wake walianza kujisomea Biblia kisha wakakutana na Mashahidi wa Yehova. Walifurahi kuona maswali waliyokuwa nayo yakijibiwa kupitia Biblia. Anastasiya alibatizwa mwaka wa 2003 na Yuriy alibatizwa mwaka wa 2004

Maelezo ya Kibinafsi

Sala imekusaidiaje kuwa na uvumilivu?

Tangu tulipoanza kuteswa, nimekuwa nikisali kuhusu mambo hususa zaidi. Nimeazimia kwamba nitaendelea na mwenendo huu hata hali ziweje. Jambo moja ambalo ninasali kulihusu ni kuwa na moyo mtulivu. Matokeo ni kwamba mimi na familia yangu hatuvunjiki moyo au kuwa na wasiwasi. Badala yake, ninapotafakari hali tunayopitia, ninahisi ni pendeleo kumtumikia Yehova. Uhusiano wangu na Yehova umekuwa imara kuliko wakati mwingine wowote.

Yekaterina Treguba

Alizaliwa: 1991 (Vladivostok, Eneo la Primorye)

Maisha Yake: Ni mwalimu wa lugha ya Kiingereza

Nyanya yake alikuwa akimsomea Kitabu Changu cha Hadithi za Biblia alipokuwa mtoto. Alianza kujifunza Biblia kibinafsi alipokuwa na umri wa miaka 15. Alibatizwa mwaka wa 2008

Maelezo ya Kibinafsi

Umejifunza somo gani kupitia hali unayopitia?

Changamoto kubwa zaidi niliyokabili ni kudumisha shangwe yangu licha ya kupitia hali ngumu. Nilisoma kuhusu ndugu na dada ambao walikuwa kizuizini na gerezani na ni kana kwamba walipokabili hali ngumu zaidi ndipo walipokuwa na shangwe nyingi hata zaidi lakini sikuelewa nilipaswa kushangilia nini. Kwa hiyo, nilipotafakari maneno ya wimbo namba 111, wenye kichwa “Sababu za Kuwa na Shangwe,” nilielewa. Mstari mmoja unasema: “Tunashangilia moyoni,/ Neno linaeleweka.” Hapo nilianza kufikiria jinsi ya kujilisha vizuri zaidi mambo ya kiroho kutoka katika Neno la Mungu, Biblia, na kuomba shangwe katika sala zangu. Mambo ambayo ninafanya sasa kwa ukawaida.

Tunafarijika kujua kwamba Yehova anaendelea kuwabariki na kuwatunza watumishi wake waadilifu na ‘kuwazunguka kwa kibali.’—Zaburi 5:12.

Mfuatano wa Matukio

Agosti 6, 2019

Yelena Barmakina ashtakiwa kuwa mhalifu
Juni 8, 2020

Kesi ya uhalifu yafunguliwa dhidi ya Nina, Ludviga, na Yelena Tsorn
Juni 17, 2020

Kesi ya uhalifu dhidi ya Yelena Barmakina yaanza
Julai 9, 2020

Msako wafanywa kwenye nyumba za Nina, Ludviga, Yelena Tsorn, na Yuriy. Yuriy anachukuliwa ili kuhojiwa. Nina, Ludviga, na Yelena Tsorn wanawekewa vizuizi vya kusafiri
Septemba 4, 2020

Igor ashtakiwa kuwa mhalifu
Septemba 8, 2020

Yekaterina ashtakiwa kuwa mhalifu
Septemba 29, 2020

Kesi ya Yelena Barmakina ilirudishwa kwa mwendesha-mashtaka kwa kuwa hakukuwa na ushahidi wa kutosha wa kuwa mwenye msimamo mkali
Agosti 11, 2021

Yuriy ashtakiwa kuwa mhalifu. Kesi ya Yelena Barmakina yafunguliwa upya, kisha kesi zao zinaunganishwa na kusikilizwa kwa pamoja
Septemba 28, 2022

Kesi ya uhalifu yaanza kusikilizwa

a b Hatukuweza kupata maelezo ya kibinafsi ya Dada Astvatsaturova na Dada Katanaeva.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI