FEBRUARI 20, 2023
URUSI

“Maadamu Yehova Yuko Pamoja Nami, Sikuzote Nitajihisi Nikiwa Nyumbani”

CHEZA

Februari 17, 2023, Mahakama ya Jiji la Gorno-Altayskiy iliyo katika Jamhuri ya Altai ilimhukumu Ndugu Aleksandr Kalistratov kifungo cha nje cha miaka sita na nusu. Hahitaji kwenda gerezani wakati huu.

Maelezo Mafupi Kumhusu

Aleksandr Kalistratov

Alizaliwa: 1976 (Biysk, Eneo la Altai)

Maisha Yake: Baba yake alikufa Aleksandr alipokuwa na umri wa miaka mitatu. Alikuwa mwanasaikolojia wa watoto

Aliamini nadharia ya mageuzi. Mama yake ndiye aliyeanza kujifunza Biblia na Mashahidi wa Yehova. Aleksandr alivutiwa na usahihi wa simulizi la uumbaji

Alibatizwa mwaka wa 1994. Alifunga ndoa na Yuliya mwaka wa 2020

Kabla ya kesi hii ya sasa, Aleksandr amewahi kushtakiwa kuwa mhalifu mara mbili. Mara ya kwanza alishtakiwa mwaka wa 2000 kwa sababu ya kukataa kujiunga na jeshi kisha katika mwaka wa 2010 alishtakiwa kwa madai kwamba alikuwa na msimamo mkali

Maelezo ya Kibinafsi

Ulijifunza mambo gani ulipowekwa mahabusu kwa mara ya kwanza?

Mara ya kwanza niliposhtakiwa kuwa mhalifu, niliwekwa mahabusu kwa siku 21 na sikuweza kuwasiliana na watu wengine. Wakati huo, nilijifunza kumtegemea kabisa Yehova. Nilitambua kwamba maadamu Yehova yuko pamoja nami, sikuzote nitajihisi nikiwa nyumbani. Sasa, mahangaiko yanaponilemea, ninajikumbusha kwamba Yehova alinitunza hapo awali. Hilo linanihakikishia kwamba Yehova anasimamia mambo yote.

Ni mistari gani ya Biblia inayowaimarisha wewe na mke wako?

Kitabu cha Pili cha Samweli sura ya 22 kimekuwa kikitutia moyo mimi na mke wangu mara nyingi. Mstari wa 3 unasema: “Mungu wangu ni mwamba wangu, ninayemkimbilia,ngao yangu . . . , kimbilio langu salama na mahali pangu pa kukimbilia, mwokozi wangu.” Kwa kawaida, kabla ya kwenda mahakamani mimi na mke wangu tunasoma mstari huu pamoja kwa kuwa unatukumbusha kwamba Yehova ndiye chanzo cha nguvu zetu.

Tuna uhakika kwamba Yehova ataendelea kusikiliza sauti za watumishi wake waaminifu wanapomwita katika nyakati za taabu.—2 Samweli 22:7.

Mfuatano wa Matukio

2000

Alikamatwa kwa sababu ya kukataa kujiunga na utumishi wa kijeshi. Alikaa mahabusu kwa siku 21. Baadaye mahakama iliamua kwamba hana hatia
2010

Alishtakiwa kwa madai kwamba alikuwa na msimamo mkali. Kesi yake ilisikilizwa mara mbili kisha ikapelekwa kwenye Mahakama Kuu ya Jamhuri ya Altai ambayo iliamua kwamba hana hatia
Desemba 16, 2021

Kesi ya uhalifu ilifunguliwa
Januari 16, 2022

Maofisa wa FSB walifanya msako katika nyumba tano za Mashahidi wa Yehova katika Jamhuri ya Altai. Maofisa hao walivamia nyumba ya Kalistratov na kumchukua Aleksandr ili kumhoji. Aliachiliwa siku hiyohiyo jioni na kuwekewa vizuizi vya kusafiri
Agosti 25, 2022

Kesi ya uhalifu ilianza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI