Oktoba 26, 2020, Mahakama ya Wilaya ya Lgov imekataa tena kumwachilia huru mapema Ndugu Dennis Christensen, ambaye kufikia sasa ametumikia kifungo cha zaidi ya miaka mitatu gerezani. Ana siku kumi za kukata rufaa. Kifungo cha Ndugu Christensen kinatarajiwa kuisha Mei 2022. Tarehe hiyo inapatikana kwa kufikiria muda ambao tayari alitumia mahabusu. Hata hivyo, mwezi uliopita, tume ya gereza ilimwita kuwa “mtu hatari anayekiuka taratibu za gereza.” Hivyo, muda aliotumia akiwa mahabusu huenda usihesabiwe na hilo linaweza kusababisha aendelee kukaa gerezani hata baada ya Mei 2022.

Ndugu Christensen na mke wake, Irina, wamevumilia matatizo mengi ya kimwili, kiakili, na kihisia tangu alipokamatwa Mei 25, 2017. Hata hivyo, wote wawili wanadumisha shangwe na wameazimia kuvumilia jaribu hilo la imani, kwa kiasi fulani wakiweza kufanya hivyo kwa sababu ya sala nyingi zinazoendelea kutolewa na mamilioni ya ndugu na dada ulimwenguni pote.