Ndugu Oleg Danilov na Ndugu Vladimir Ermolaev, Jr., ni wawili kati ya Mashahidi wengi wa Yehova nchini Urusi wanaoendelea kubaki waaminifu kwa Yehova wakiwa na shangwe licha ya mateso. Ndugu hawa wenye ujasiri wameeleza kwamba wanaimarishwa na ujasiri na imani ambayo ilionyeshwa na watu wao wa ukoo zamani.

Fyodor na Yekaterina Rigel, babu na nyanya wa Oleg walibatizwa na kuwa Mashahidi wa Yehova mwaka wa 1958. Serikali ilipoanza kuwatesa Mashahidi wa Yehova, wenye mamlaka nchini Urusi walipekua nyumba yao, wakachukua mali zao, na kumtoza Fyodor faini. Licha ya mateso hayo, Fyodor alisaidia familia yake kuendelea kumwabudu Yehova kwa ukawaida.

Watoto wa Fyodor na Yekaterina, yaani, Alfred na Ella (mama ya Oleg), walidhihakiwa na kuteswa walipokuwa wakikua. Lakini wao pia walikuwa na imani yenye nguvu. Baadaye, Alfred alikataa kabisa kujiandikisha jeshini, kwa sababu hiyo akafungwa gerezani kwa miaka mitatu.

Oleg Danilov amefungwa kwa miaka mitatu gerezani kwa sababu ya imani yake kama tu mjomba wake, Alfred. Amekuwa gerezani tangu Machi 2021, na hivyo kutenganishwa na mke wake, Nataliya, na wana wao wawili, Ilya na Nikita. Familia ya Danilov inaamini kwamba Yehova atawasaidia kuvumilia kama alivyowasaidia babu, nyanya, na mjomba wa Oleg.

Oleg anasema hivi: “Mara nyingi mimi hufikiria jinsi watu wangu wa ukoo na akina ndugu na dada waliokuwa katika Muungano wa Sovieti walivyofaulu kuvumilia na kudumisha shangwe yao. Kwa maoni yangu, huo ni uthibitisho usioweza kupingwa wa nguvu za roho ya Yehova. Ninasadiki kwamba mimi na familia yangu tutavumilia mateso tunayokabili na kuendelea kuwa na shangwe.”

Nyanya ya Vladimir  Jr., Anna Ermolaeva alijifunza kweli mwaka wa 1953 katika kijiji cha Serebrovo, Eneo la Irkutsk. Alikuwa mwenyeji wa kwanza katika kijiji hicho kubatizwa na kuwa Shahidi wa Yehova. Anna alipingwa vikali na majirani na hata mama yake mwenyewe, ambaye alikataa kuzungumza naye baada ya hapo.

Wenye mamlaka walipogundua kwamba Anna alikuwa akihubiri, walimshtaki kwamba alikuwa akimhatarisha mwana wake, yaani, Vladimir, Sr., na wakatisha kuwa watamchukua.

Ndugu na dada katika kutaniko la Anna waliandika barua iliyosema wazi kwamba alikuwa mama mzuri. Ndugu mmoja alipeleka barua hiyo Moscow na kumkabidhi kiongozi wa wakati huo aliyeitwa Nikita Khrushchev. Kwa kupendeza, Khrushchev aliomba jambo hilo lichunguzwe. Anna aliondolewa mashtaka yote, na mwana wake hakuchukuliwa na wenye mamlaka.

Anna pia alikuwa na binti anayeitwa Nadezhda. Mwaka wa 1970, alilazwa kwa sababu ya maumivu makali tumboni. Madaktari walimfanyia upasuaji kabla ya kufahamu vizuri tatizo lake. Wakati wa upasuaji huo uliofanywa haraka haraka, madaktari walisisitiza kwamba alihitaji kutiwa damu mishipani. Anna na binti yake walishikilia imani yao kwa uthabiti na kukataa jambo hilo kabisa. Madaktari waliwapuuza na kumtia Nadezhda damu mishipani ambayo haikupatana na mwili wake. Kwa kusikitisha, alikufa muda mfupi baada ya hapo. Wenye mamlaka walijaribu kuficha kosa hilo kwa kumshutumu Anna katika gazeti liliosambazwa sana, lililoripoti kwa uwongo kwamba Anna “alimdhabihu mtoto wake.”

Tukio hilo lenye kusikitisha lilimwathiri Valentin, mume wa Anna. Sikuzote alimruhusu Anna awafundishe watoto wao kanuni za Biblia lakini yeye mwenyewe hakuzifuata. Alipoona jinsi Mashahidi wengine walivyoiunga mkono familia yao wakati wa kipindi hicho kigumu, aliamua kujifunza Biblia na kuwa Shahidi wa Yehova.

Anna na Valentin waliendelea kumzoeza mwana wao, Vladimir, Sr. kufuata kanuni za Biblia. Alipokuwa mtu mzima alifunga ndoa na dada mwaminifu aliyeitwa Lyubov. Vladimir na Lyubov, pia walimfundisha mwana wao, Vladimir, Jr., kumpenda Mungu na kufuata kanuni za Biblia.

Februari 2020, wenye mamlaka walivamia nyumba ya Vladimir, Jr., na mke wake, Valeriya. Vladimir, Jr., alikamatwa, akazuiliwa, kisha akawekwa chini ya kifungo cha nyumbani kwa karibu miezi miwili. Sasa anasubiri kuhukumiwa kwa shtaka la kupanga utendaji wa shirika lililopigwa marufuku. Anaweza kufungwa kwa miaka 15. Badala ya kukazia fikira kifungo hicho, Vladimir, Jr. anatafakari mfano wa ushikamanifu uliowekwa na babu, nyanya, na wazazi wake.

Vladimir, Jr., anasema: “Ni pendeleo kuteswa kwa ajili ya jina la Baba yetu, Yehova. Babu, nyanya, na wazazi wangu walivumilia hali ngumu na wakaendelea kuwa waaminifu. Mimi pia nitafaulu kufanya hivyo.”

Kama tu Oleg na Vladimir, Jr., Mashahidi wengi nchini Urusi, wanathamini sana mfano mzuri wa kiroho uliowekwa na watu wa familia ambao walikuwa Mashahidi washikamanifu. Sisi sote na tutafakari mifano ya wale ambao wamevumilia nyakati zilizopita na wale ambao sasa hivi wanavumilia mateso, kisha ‘tuige imani yao.’—Waebrania 13:7.