FEBRUARI 5, 2024
URUSI

“Mkabidhi Yehova Njia Yako”

CHEZA

Mahakama ya Wilaya ya Shadrinskiy iliyo katika Eneo la Kurgan itatangaza uamuzi wake hivi karibuni katika kesi inayomhusu Ndugu Aleksandr Lubin. Mwendesha-mashtaka bado hajatoa ombi la hukumu anayopendekeza.

Maelezo Mafupi Kumhusu

Aleksandr Lubin

Alizaliwa: 1956 (Ogonek, Eneo la Kurgan)

Maisha Yake: Alifanya kazi akiwa injinia wa usalama kwenye kiwanda cha nishati kabla ya kustaafu

Alifunga ndoa na Tatyana mwezi wa Agosti 2001. Wana watoto wawili

Tatyana alianza kujifunza Biblia na Mashahidi wa Yehova. Baada ya kupata kiharusi, Aleksandr alimsomea Biblia naye akaanza kupendezwa. Aleksandr, Tatyana, na watoto wao wawili walibatizwa mwaka wa 2003

Aleksandr alipatwa na maumivu makali kwenye miguu yake yote miwili, hali iliyofanya aanze kutembea kwa kutumia fimbo. Pia, aligunduliwa kuwa ana ugonjwa unaoathiri chembe za urithi

Maelezo ya Kibinafsi

Ni nini kilichokusaidia kukabiliana na hali ya kuvunjika moyo ulipokuwa mahabusu?

Kuwa mahabusu ilikuwa ni changamoto kubwa sana. Sikuruhusiwa kupata matibabu yoyote ya kunisaidia kutibu maumivu yangu ya miguu. Mwanzoni, nilisali kwa Yehova anisaidie niachiliwe mapema iwezekanavyo. Hata hivyo, baadaye, nilimwomba anisaidie kuwa na subira na utulivu moyoni. Pia, nilisali mara nyingi sana kwa ajili ya ndugu na dada wengine ambao walikuwa gerezani. Nilijikumbusha kwamba ‘Jaribu hili ni la muda.’ Kisha, nikaanza kukazia fikira baraka ambazo Yehova alikuwa akinipa. Kufanya hivyo kulinisaidia kudumisha shangwe yangu. Hatimaye, niliachiliwa kutoka kizuizini. Andiko la Zaburi 37:5 lilinifariji sana, linasema: “Mkabidhi Yehova njia yako; mtegemee yeye, naye atatenda kwa niaba yako.” Nina uhakika kwamba Yehova hawezi kuruhusu tujaribiwe kupita tunavyoweza kuhimili. Hatashindwa kutuandalia njia ya kutokea katika hali yoyote ikiwa tu tutaendelea kumtumaini na kumtegemea yeye.

Tuna uhakika kwamba kama Aleksandr, hata iwe tutakabili hali gani, tunaweza kuvumilia majaribu kwa uaminifu huku tukitegemea msaada wa Yehova.—Isaya 38:14.

Mfuatano wa Matukio

Julai 13, 2021

Kesi ya uhalifu ilianzishwa
Julai 14, 2021

Nyumba nane za Mashahidi wa Yehova zilifanyiwa msako. Aleksandr alikamatwa, akahojiwa, na kuwekwa kizuizini
Julai 16, 2021

Alisafirishwa na kupelekwa mahabusu
Julai 19, 2021

Alikata rufaa kwa sababu ya hali mbaya ya afya
Agosti 28, 2021

Baada ya Mahakama ya Umoja wa Ulaya ya Haki za Kibinadamu na mashirika ya haki za binadamu kuomba aachiliwe, Aleksandr aliachiliwa na kuwekewa vizuizi vya kusafiri
Julai 14, 2023

Kesi ya uhalifu ilianza
Septemba 7, 2023

Kesi iliahirishwa kwa sababu Aleksandr alikuwa amelazwa

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI