OKTOBA 28, 2021
URUSI

Mwalimu Aliyestaafu Mwenye Umri wa Miaka Themanini Anakabili Mashtaka kwa Sababu ya Kuzungumzia Biblia

CHEZA

HABARI ZA KARIBUNI | Mahakama ya Urusi Yakataa Ombi la Rufaa la Dada Yelena Savelyeva

Februari 14, 2022, Mahakama ya Eneo la Tomsk ilikataa ombi la rufaa la Dada Yelena Savelyeva. Hatahitaji kwenda gerezani wakati huu.

Mfuatano wa Matukio

Novemba 17,2021

Mahakama ya Jiji la Severskiy ya Eneo la Tomsk ilimhukumu Dada Yelena Savelyeva kifungo cha nje cha miaka minne. Hatahitaji kwenda gerezani wakati huu. Hapo awali, mwendesha-mashtaka aliomba mahakama impige Yelena mwenye umri wa miaka 80, faini ya rubo 500,000 (dola 7,198 za Marekani)
Julai 22,2021

Mahakama ilisikiliza kesi kwa mara ya kwanza
Machi 25, 2021

Mwendesha-mashtaka nchini Urusi alimfungulia Yelena kesi ya uhalifu. Anashtakiwa kwa “kumshawishi, na kumshirikisha mtu katika utendaji wa shirika lenye msimamo mkali” chini ya Kifungu cha 282.2 cha Sheria ya Uhalifu ya Shirikisho la Urusi.

Mashtaka hayo yanategemea ushahidi wa wanawake wawili ambao Yelena alizungumza nao kuhusu Biblia: mmoja wao alikuwa ofisa wa FSB na mwingine alikuwa mfanyakazi wa Jeshi la Taifa la Urusi. Wanawake hao walijifanya kwamba wanapendezwa na ujumbe wa Biblia, ilihali walikuwa wakirekodi kwa siri mazungumzo yao pamoja na Yelena. Kisha, wakawasilisha habari kumhusu Yelena na za waamini wenzake kwa wenye mamlaka

Maelezo Mafupi Kumhusu

Yelena Savelyeva

Alizaliwa: 1941 (Katka, Jamhuri ya Belarus)

Maisha Yake: Alilelewa katika familia maskini na waliteseka kwa sababu ya madhara ya Vita vya Pili vya Ulimwengu. Alisomea fizikia na hesabu katika chuo kikuu na alikuwa mwalimu kwa zaidi ya miaka 40, kisha akastaafu. Mwaka 1963, aliolewa na Leonid, mwanafizikia wa nyuklia. Waliwalea wana wao wawili kwa pamoja

Alipenda kujua mengi zaidi kumhusu Mungu tangu alipokuwa kijana. Mara nyingi alimuuliza Mungu hivi katika sala: “Maisha yangu yana kusudi gani? Ni nini ambacho ninaweza kukufanyia?” Alipata majibu ya maswali hayo kwenye Biblia. Mwaka wa 2002 alibatizwa na kuwa Shahidi wa Yehova

Maelezo ya Kibinafsi

Umewezaje kukabiliana na mateso hayo bila kuvunjika moyo?

Niliposoma mashtaka niliyofunguliwa, nilishtuka. Ilinivuruga sana! Niliumia sana kuitwa “mhalifu.” Ingekuwa rahisi sana kuvunjika moyo baada ya kusoma mashtaka hayo. Hata hivyo, lazima tukumbuke maneno haya: “Yule atakayevumilia mpaka mwisho ndiye atakayeokolewa.”——Mathayo 10:22.

Ndugu na dada zako wamekusaidiaje katika kipindi hiki?

Kesi inaposikilizwa mahakamani, kwa kawaida ni dada zetu wanaokuja mahakamani. Mara nyingi, watu 12 hadi 18 huja ili kuwaunga mkono wale ambao wameshtakiwa. Walikuja kuniunga mkono pia. Waliongea nami, wakanitia moyo, na tukazungumzia mistari ya Biblia. Kwa ufupi, waliniambia kwamba nisiogope, wapo pamoja nami, na wangesali kwa ajili yangu. Ilinifurahisha sana kutambua kwamba wananipenda na kwamba wanamwomba Mungu anisaidie nibaki mwaminifu. Ninathamini sana msaada huo.

Tunapata ujasiri tunapoona jinsi Yelena alivyoazimia kubaki imara licha ya mateso. Tuna uhakika kwamba Yehova anawaona wale wote ‘wanaojitahidi pamoja kwa ajili ya imani ya habari njema, bila kuogopeshwa kamwe na wapinzani wao.’—Wafilipi 1:27, 28.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI