Juni 26, 2020, wenye mamlaka katika gereza la Lgov walimfungia Ndugu Dennis Christensen kinyume na sheria katika jela ya adhabu ya pekee iliyokusudiwa hasa wahalifu sugu (EPKT). Kwa kuwa afya ya Ndugu Christensen imezorota, ni kama lengo la kumhamishia katika jela hiyo ni kuvunja imani yake. Ofisi ya mwendesha-mashtaka inaweza kuwa ikitumia mashtaka mapya yaliyopandikizwa dhidi ya Ndugu Christensen ili kuzuia kuachiliwa kwake mapema, ingawa ofisi hiyo ilikuwa imekubali uamuzi huo wa mahakama siku chache mapema.

Ndugu Christensen ameshatumikia zaidi ya nusu ya kifungo chake cha miaka sita. Na kwa zaidi ya mwaka sasa, amekuwa akistahili kupewa msamaha kwa sababu ya kuwa na mwenendo mzuri au kupunguziwa muda wa kukaa gerezani. Baada ya kutuma ombi mara tatu, ombi lake la nne likachukuliwa kwa uzito. Juni 23, 2020, Mahakama ya Wilaya ya Lgov ikaamua kwamba badala ya kumalizia kifungo chake gerezani, anaweza kulipa faini tu. Mwendesha mashtaka huyo, Bw.Artem Kofanov, alikubali ombi lake na kumpunguzia muda wa kukaa gerezani

Lakini baada ya siku mbili, mwendesha-mashtaka mwingine, Bw. Aleksei Shatunov, alidai kwamba uamuzi wa mahakama hiyo ulikuwa kinyume na sheria, akasisitiza ufutwe na kuomba kesi ifunguliwe katika mahakama hiyohiyo, lakini iendeshwe na mwendesha-mashtaka mwingine. Bw. Shatunov alisema hivyo kwa kutegemea ripoti mbaya iliyotolewa na wenye mamlaka katika gereza la Lgov ambao wamedai kwamba Ndugu Christensen hakuwa na “mazoea ya kufanya kazi kwa bidii na alikuwa na mwenendo mbaya.”

Juni 23, kesi ya Ndugu Christensen ilipokuwa ikisikilizwa, wawakilishi wa gereza walijaribu kusema hivyo tena, lakini hakimu aligundua kwamba maoni hayo hayakuwa sahihi. Wakili wa Ndugu Christensen alionyesha mahakama vyeti vya hospitalini vilivyothibitisha kwamba Ndugu Christensen alikuwa na matatizo ya kiafya na hivyo hangeweza kufanya kazi ngumu akiwa gerezani. Na hata mwakilishi mmoja wa gereza alisema kwamba hakukuwa na kazi yoyote gerezani ambayo angeweza kufanya kwa sababu ya matatizo yake ya kiafya.

Huku ofisi ya mwendesha-mashtaka ikikata rufaa ya Ndugu ili asiachiliwe mapema, na wenye mamlaka gerezani wakafikisha madai yao ya uwongo dhidi ya Ndugu Christensen mara mbili. Dai la kwanza ni kwamba alikuwa katika chumba cha kulia chakula muda ambao haukuwa wa chakula na dai la pili ni kwamba alikuwa katika nyumba ya gereza na T-shati tu bila kuvaa koti. Na kutokana na sababu hizo mbili, wenye mamlaka waliamua kumweka katika jela ya adhabu ya pekee iliyokusudiwa hasa wahalifu sugu (EPKT) kwa siku kumi. Kulingana na sheria ya Urusi, wenye mamlaka wanaweza kumweka mtu huko ikiwa mfungwa amevunja sheria za gerezani mara nyingi, na bado anapaswa kupimwa na daktari kwanza. Hivyo, kutokana na hayo Ndugu Christensen hakupaswa kupelekwa EPKT.

Ndugu Christensen alimwambia wakili wake kwamba hata makosa wanayosema alifanya, hakufanya akiwa peke yake, lakini ni yeye peke yake aliyepelekwa EPKT. Wakili wa Ndugu Christensen alisema hivi, “Kutokana na hilo, tunaona kwamba hii ilikuwa njama iliyopangwa ili Dennis asiachiliwe huru.”

Wenye mamlaka nchini Urusi wanapoendelea kupanga njia nyingine mpya na za kikatili zaidi dhidi ya ndugu zetu wanaoishi nchini Urusi, tunaendelea kuwa na uhakika kwamba Yehova atakuwa kimbilio letu salama. Na acha sote tuendelee kusali kwamba Yehova ampe Ndugu Christensen na pia mke wake, Irina, yale wanayohitaji ili kudumu wakiwa washikamanifu katika pindi hii ya majaribu.—Zaburi 94:13, 21, 22.