AGOSTI 3, 2021
URUSI

Ndugu Andrey Okhrimchuk Anategemea Nguvu za Yehova

CHEZA

Mfuatano wa Matukio

Oktoba 4, 2021

Mahakama ya Eneo la Rostov ilikataa ombi la rufaa la Andrey. Hukumu yake ya awali itaendelea kutumika. Hahitaji kwenda gerezani wakati huu
Agosti 2, 2021

Mahakama ya Wilaya ya Leninskiy iliyoko Rostov-on-Don ilimhukumu Ndugu Andrey Okhrimchuk kifungo cha nje cha miaka minne.
Aprili 5, 2021

Kesi ya uhalifu ilianza kusikilizwa
Oktoba 29, 2020

Kesi ya uhalifu ilifunguliwa. Alishtakiwa kushiriki mikutano ya kidini kinyume cha sheria na kuunga mkono utendaji wa shirika lenye msimamo mkali
Mei 22, 2019

Maofisa wa usalama walifanya upekuzi mapema asubuhi katika nyumba na gari la Andrey

Maelezo Mafupi Kumhusu

Andrey Okhrimchuk

Alizaliwa: 1979 (Korosten, Ukrainia)

Maisha Yake: Alisomea kazi ya uinjinia. Alitumikia jeshini kabla ya kuwa Shahidi wa Yehova

Utimizo sahihi wa unabii wa Biblia ulimpendeza yeye na mke wake Yekaterina. Walifunga ndoa mwaka wa 2006. Walibatizwa mwaka wa 2007. Wana binti mmoja mchanga

Maelezo ya Kibinafsi

Uhusiano wako na Yehova umeimarikaje katika kipindi hiki cha majaribu?

Sidhani ningeweza kuvumilia majaribu haya bila msaada wa Yehova. Sijawahi kusali mara nyingi kama wakati huu. Nilizungumza na Yehova kuhusu wasiwasi wangu na kumwomba anipe imani na ujasiri, ili nisiogope chochote wala nisimwogope mtu yeyote. Nilitambua kwamba Yehova alikuwa akinisikiliza na kwamba alikuwa akiongoza kila kitu.

Ni nini kinachokuchochea uendelee kuwa mwaminifu kwa Yehova wakati wa majaribu haya?

Ninakumbuka kile ambacho Yohana 6:67, 68 inasema. Hapo, Yesu aliwauliza mitume ikiwa wao pia walitaka kumwacha, naye Petro akajibu: ‘Tutaenda kwa nani?’ Hivyo ndivyo ninavyohisi. Nitaenda kwa nani? Neno la Yehova peke yake ndilo lenye maneno ya uzima wa milele, naye peke yake ndiye anayeweza kurudisha haki ya kweli. Pia Isaya 30:15 imenisaidia. Ninapokabili hali zenye kuvunja moyo ambazo sina uwezo wowote wa kuzidhibiti, mstari huo hunisaidia kuendelea kuwa mtulivu na kumtumaini Yehova.

Ungewapa wengine mapendekezo gani ambao wanajitayarisha kwa ajili ya mateso wakati ujao?

Usitegemee nguvu zako mwenyewe. Badala yake, mwombe Yehova akupe imani zaidi, ujasiri zaidi, na uhodari zaidi. Imarisha urafiki wako na ndugu na dada zako ili uwe na mtu wa kumweleza mahangaiko yako wakati ambapo hali zitakuwa ngumu.

Imani yenye nguvu ambayo ndugu na dada zetu nchini Urusi wanaonyesha ni mfano mzuri kwetu sote. Tunajua kwamba Andrey na familia yake watafaulu kuvumilia jaribu hili wanapoendelea kumtegemea Baba yetu wa mbinguni, Yehova.—Zaburi 37:5.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI