Juni 8, 2020, Mahakama ya Jiji la Pskov itatangaza uamuzi wake katika kesi inayomhusu Ndugu Gennady Shpakovskiy mwenye umri wa miaka 61. Anashtakiwa kuhusika katika utendaji unaoonwa kuwa “wenye msimamo mkali” kwa kufanya mikutano midogo ya Kikristo nyumbani mwake. Mwendeshamashtaka ameomba mahakama imhukumu Ndugu Shpakovskiy miaka saba na nusu gerezani.

Mwanzoni mwa mwaka 2018, Idara ya Usalama wa Taifa (FSB) iliweka vinasa sauti katika nyumba ya Shpakovskiy na kuanza kufuatilia mambo anayofanya kwa miezi kadhaa. Juni, 3, 2018, saa 6:45 mchana, maofisa wa FSB pamoja na wanajeshi wa Jeshi la Taifa wenye silaha walivunja mlango wa nyumba hiyo na kuingia ndani kulipokuwa na watu waliokuwa wakifanya mikutano kwa amani, kisha askari hao wakafanya msako katika nyumba hiyo kwa saa sita.

Maofisa wa FSB walichukua vifaa vya mkononi na kuwapeleka Mashahidi hao ili kuhojiwa. Huko waliwaibisha na kuwatishia kwa kusema kwamba watahakikisha wanafukuzwa kazi zao na watawafunga gerezani. Ndugu  Shpakovskiy alihojiwa hadi saa 4 usiku.

Machi 19, 2019, Ndugu Shpakovskiy alishitakiwa kwa kosa la kupanga shughuli za shirika “lenye msimamo mkali.” Miezi mitano baadaye, aliongezewa kosa lingine la “kutegemeza shughuli zenye msimamo mkali kupitia pesa.”

Siku ya hukumu inavyozidi kukaribia, tunasali tukiwa na uhakika kabisa kwamba Yehova ataisaidia familia ya Shpakovskiy iwe imara, wakiwa na uhakika kwamba watapata thawabu kadiri wanavyoendelea kuvumilia kwa uaminifu.—2 Mambo ya Nyakati 15:7.