Machi 1, 2024, Ndugu Oleg Danilov aliachiliwa kutoka gerezani baada ya kutumikia kifungo cha miaka mitatu.

Kabla ya hukumu hiyo kutolewa, Oleg alikuwa ameazimia jambo la kufanya ikiwa angepelekwa gerezani: “Nilitafakari maneno ya Paulo kwenye Wafilipi 4:4: ‘Shangilia sikuzote katika Bwana. Nitasema tena Shangilia!’ Paulo aliandika maneno hayo alipokuwa gerezani. Uhusiano wake na Yehova na tumaini lake kumwelekea lilikuwa imara hivi kwamba vifungo vya gereza havikuzuia furaha yake. Ninataka kufanya hivyo pia na sitaruhusu chochote kiondoe shangwe yangu.”

Azimio lake la kudumisha shangwe lilijaribiwa Oleg alipofungwa gerezani na kutenganishwa na familia yake. Ilikuwa vigumu kwake kuhudhuria harusi ya mwana wake mkubwa. Mke wa Oleg, Dada Nataliya Danilova, alieleza jambo lililomsaidia mume wake: “Oleg alitambua kwamba ikiwa ataendelea kufikiria kuhusu mambo aliyopoteza, hilo litadhoofisha imani yake na kumnyang’anya shangwe yake. Badala yake, aliendelea kujikumbusha kuhusu mambo aliyo nayo: yaani, uhusiano wake na Yehova, msaada wa roho Yake takatifu, familia inayompenda, na undugu wa ulimwenguni pote. Alipoacha kufikiria vitu alivyopoteza alihisi akiwa mtu mwenye utajiri mkubwa.”

Nataliya alisema kwamba mfano mzuri wa mume wake uliwasaidia wana wao pia. Alisema hivi: “Kuona mambo ambayo baba yao anapitia na jinsi Yehova alivyotutegemeza tukiwa familia kumeimarisha tumaini lao katika Yehova na upendo wao kwa ndugu na dada zao. Sasa wameazimia kuendelea kumtumikia Yehova kuliko wakati mwingine wowote maishani mwao.”

Tunashangilia kwamba sasa Oleg na familia yake wameungana tena. Na tunashukuru sana kwa kutukumbusha kwamba hata ikiwa tunakabili majaribu gani kwa sababu ya imani yetu, tunaweza kuendelea kudumisha shangwe yetu, tukiwa na uhakika kwamba roho ya Yehova itatulia juu yetu.​—1 Petro 4:14.