JANUARI 20, 2022
URUSI

Ndugu Saba Nchini Urusi Wanamtegemea Yehova Anayewapa Nguvu

CHEZA

Mahakama ya Jiji la Pechora katika Jamhuri ya Komi itatangaza hivi karibuni uamuzi wake katika kesi inayohusu Ndugu Nikolay Anufriyev, Ndugu Eduard Merinkov, Ndugu Gennadiy Polyakevich, Ndugu Aleksandr Prilepskiy, Ndugu Viktor Shchannikov, Ndugu Gennadiy Skutelets, na Ndugu Aleksandr Vorontsov. Mwendesha-mashtaka bado hajatoa ombi la hukumu anayopendekeza.

Mfuatano wa Matukio

Januari 28, 2020

Wenye mamlaka walifanya msako katika nyumba za familia 12 za Mashahidi wa Yehova katika Jamhuri ya Komi. Kesi ya uhalifu dhidi ya Ndugu Polyakevich na Ndugu Skutelets ilianzishwa
Januari 30, 2020

Gennadiy Polyakevich alipelekwa mahabusu na Gennadiy Skutelets alifungwa kifungo cha nyumbani
May 20-25, 2020

Wenye mamlaka waliwahoji akina ndugu na dada wengine kutoka Pechora ili waone ikiwa wangewatumia kama mashahidi katika kesi hiyo ya uhalifu. Ndugu mmoja alipatwa na ugonjwa wa kiharusi baada ya kutishwa na mpelelezi mmoja. Sasa amepata nafuu
Juni 26, 2020

Muda wa Gennadiy Polyakevich kukaa mahabusu uliongezwa. Hakimu alisema kwamba Gennadiy Polyakevich anashtakiwa kwa “kutenda kimakusudi uhalifu mkubwa,” unaotia ndani kuzungumza kuhusu “umuhimu wa kuendelea kumtumikia Yehova licha ya kuteswa na wenye mamlaka.”
Agosti 24, 2020

Wenye mamlaka walifanya msako katika nyumba za familia nyingine 12 za Mashahidi
Novemba 10, 2020

Kesi ya uhalifu ilianzishwa dhidi ya Aleksandr Prilepskiy, Aleksandr Vorontsov, Eduard, Nikolay, na Viktor. Kesi hiyo iliunganishwa na kesi ya uhalifu dhidi ya Gennadiy Polyakevich na Gennadiy Skutelets
Novemba 25, 2020

Baada ya kukaa mahabusu siku 300, Gennadiy Polyakevich aliachiliwa kisha akafungwa kifungo cha nyumbani
Januari 27, 2021

Baada ya kuwa katika kifungo cha nyumbani kwa siku 363, Gennadiy Skutelets aliachiliwa

Maelezo Mafupi Kuwahusu

Eduard Merinkov

Alizaliwa: 1975 (Pechora)

Maisha Yake: Tangu utotoni anapenda shughuli za nje, kama vile kuendesha mashua kwenye Mto Pechora. Anafanya kazi katika kampuni ya reli. Alibatizwa mwaka wa 1993. Alifunga ndoa na mke wake, Valentina, mwaka wa 1997. Wana binti mmoja anayeitwa, Iolanta

Maelezo ya Kibinafsi

Ratiba yako ya kiroho inatia ndani mambo gani na yanakusaidiaje kuvumilia?

Jambo moja ninalofurahia . . . ni kukariri na kuimba nyimbo zilizotungwa kwenye [JW Broadcasting]. Zinanisaidia kuhisi kwamba Yehova ananitegemeza. Ninaimba nyimbo hizo kila mahali—nyumbani, ndani ya gari na hata nikiwa kazini. Pia ninapenda Zaburi 27 na ninaisoma mara nyingi.

Ni nini kinachokuchochea kuendelea kuvumilia?

Kujua kwamba Muumba Mkuu wa ulimwengu wote anataka niwe rafiki yake, kunafanya niwe na shangwe sana. Hata nipatwe na matatizo gani, mimi ningependa kumtumikia Yehova milele. Nimeazimia kabisa kubaki upande wa Yehova hadi mwisho!

Aleksandr Vorontsov

Alizaliwa: 1984 (Pechora)

Maisha Yake: Alipokuwa mchanga alijifunza kumhusu Yehova kutoka kwa familia yake na marafiki. Alifanya kazi akiwa seremala. Alibatizwa mwaka wa 2012. Alifunga ndoa na mke wake, Yelena, mwaka wa 2016

Maelezo ya Kibinafsi

Je, kuna jambo fulani uliloambiwa na ndugu au dada linalokusaidia kuvumilia?

Kesi ilipoanza kusikilizwa, ndugu mmoja aliniambia kwamba alikuwa akisali kwa ajili yangu kabla ya kesi kuanza na hata kesi ilipokuwa ikiendelea. Mfano wake ulinikumbusha Nehemia. Kesi yangu iliposikilizwa tena nilifuata mfano huo kwa kusali kimoyomoyo muda wote niliokuwa mahakamani.—Nehemia 2:4.

Je, kuna simulizi la Biblia lililokusaidia kuvumilia?

Esta ni mfano mzuri kwangu. Aliishi kipindi ambacho watu wake walikuwa wakiteswa. Alihitaji ujasiri mwingi kuwatetea. Ninajiwazia nikiwa katika hali ya Esta, na hilo hunisaidia ninapokuwa mbele ya mahakama nikitetea masilahi ya ndugu zangu.

Tuna uhakika kwamba ndugu zetu walio na imani katika wema wa Yehova watabarikiwa sasa na wakati ujao pia.— Zaburi 27:13.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI