Ndugu Sergey Klimov aliachiliwa huru Julai 26, 2023, baada ya kutumikia kifungo cha miaka mitano gerezani katika jiji la Astrakhan. Alikamatwa na kuwekwa kizuizini Juni 3, 2018, na baadaye alipelekwa mahabusu. Novemba 5, 2019, alihukumiwa na kupelekwa gerezani.

Alipokuwa gerezani, Sergey alinyimwa ruhusu ya kumwona mke wake, Yuliya, kwa miezi tisa. Kwa kuongezea, hakupewa barua nyingi kati ya barua alizokuwa akitumiwa. Chumba cha gereza alichoishi kilikuwa na hali mbaya na hivyo afya ya Sergey imeathiriwa kwa kiasi kikubwa. Licha ya mambo hayo yote, Sergey alidumisha mtazamo mzuri kwa kuendelea na ratiba ya mambo ya kiroho iliyotia ndani sala na usomaji wa Biblia.

Wenye mamlaka walimshtaki Sergey kuwa ‘mwenye msimamo mkali’ kwa sababu ya imani yake ya kidini. Hata hivyo, kesi yake ilipokuwa ikisikilizwa, Sergey alizungumza kwa ujasiri na kueleza sababu yake ya kushiriki ujumbe wa Biblia na wengine. Alisema: “Mungu wangu, Yehova, ni mwenye upendo naye hutenda kwa haki. Jambo linalonichochea kutenda na kusaidia wengine ni upendo, si chuki au msimamo mkali.”

Tunashangilia pamoja na Sergey na Yuliya kwa kuwa sasa wako pamoja tena. Nasi tunamshukuru Yehova kwa kuwa amebariki jitihada za Sergey za kudumisha utimilifu wake.​—Yoshua 24:14.