Februari 9, 2024, Ndugu Vilen Avanesov aliachiliwa kutoka gerezani baada ya kufungwa kwa karibu miaka mitano. Mnamo Mei 2019, Vilen alikamatwa na kuzuiliwa. Julai 29, 2021 alihukumiwa kifungo cha miaka sita gerezani. Kwa sababu ya muda aliotumia akiwa mahabusu, hakuhitaji kutumikia kifungo chake chote. Mwana wake Arsen pia alikamatwa na kufungwa wakati huohuo. Bado Arsen yuko gerezani.

Muda mfupi kabla ya Vilen kuachiliwa, mke wake, Dada Stella Avanesova, alisema hivi: “Miaka miwili na nusu ya kwanza Vilen alipokuwa mahabusu ilikuwa migumu sana kwetu. Nilikuwa na wasiwasi sana. Hatukuruhusiwa kuwasiliana na Vilen, hata kupitia barua. Isitoshe, kwa kuwa wote wawili, mume wangu na mwana wangu, walikuwa gerezani, nilijiuliza jinsi ambavyo ningeshughulikia mahitaji ya kiuchumi ya familia yetu nikiwa peke yangu.”

Licha ya changamoto hizo, sikuzote Vilen na Stella wamehisi Yehova akiwategemeza. Stella anasema hivi: “Vilen aliniambia kwamba kila wakati aliposafirishwa kwenda mahakamani wakati wa kesi yake ya uhalifu, angewaona ndugu na dada mahakamani. Kwa maoni yake, huo ulikuwa uthitibisho wa kwamba Yehova anamjali. Kwa upande wangu, sikuzote Yehova amehakikisha nina kila kitu ninachohitaji. Ninasadiki kwa asilimia 100 kwamba Yehova anawategemeza wale wanaomtumaini.”

Tunashangilia pamoja na Vilen na Stella kwa kuwa sasa wameunganishwa tena. Na tutaendelea kusali kwa ajili ya mwana wao, Arsen, na kwa ajili ya ndugu na dada wote ambao bado wako gerezani. Tuna uhakika Yehova ataendelea kujithibitisha kuwa nuru, wokovu, na ngome kwa wale walio waaminifu kwake.​—Zaburi 27:1.