Mei 21, 2021, Mahakama ya Wilaya ya Leninskiy huko Novosibirsk ilimhukumu Ndugu Vitaliy Popov kifungo cha nje cha miaka mitatu. Hatahitaji kwenda mahakamani wakati huu.

Vitaliy Popov

• Alizaliwa: 1967 (Novosibirsk)

• Maisha Yake: Amefanya kazi akiwa fundi umeme na wa vyuma. Amewahi kutumikia katika Jeshi la Sovieti. Anapenda kuteleza kwenye barafu, kucheza mpira wa miguu, mpira wa wavu, na kuimba. Alilelewa na ndugu wawili na dada wawili. Vitaliy alipokuwa kijana, kaka yake na dada yake walikufa kifo kibaya. Hivyo Vitaliy, alikuwa na maswali mengi kuhusu kifo na wakati ujao

  Alianza kujifunza Biblia pamoja na Mashahidi wa Yehova mwaka wa 1990 hivi. Alipata majibu yanayoridhisha ya maswali yake kuhusu kifo. Pia aliguswa moyo kuona jinsi Mashahidi wanavyoonyeshana upendo, heshima, na kusaidiana. Alibatizwa mwaka wa 1994. Akafunga ndoa na Natalya mwaka wa 2011

Juni 27, 2019, wenye mamlaka walifungua kesi ya uhalifu dhidi ya Vitaliy. Aprili 9, 2020, polisi walivamia nyumba yake na kumkamata ili wakamhoji. Alihojiwa kwa zaidi ya saa nne.

Vitaliy aliwekwa kwenye orodha ya watu wenye msimamo mkali. Kwa sababu hiyo, akaunti yake ya benki ilifungwa. Baada ya miezi miwili, Vitaliy alilazimishwa kujiuzulu kazini. Hali hii imefanya iwe vigumu kwa familia yake kupata pesa za matumizi ya kila siku.

Yehova anaendelea kuiandalia familia ya Vitaliy mahitaji yao. Vitaliy anasema hivi: “Ametupatia mahitaji yetu yote ya kiroho, kimwili, na kihisia. Familia yangu yote inathamini msaada wa Yehova na hilo limetusaidia kukabiliana na matatizo yote na kudumisha mtazamo mzuri.”

Vitaliy anaeleza siri ya kuvumilia majaribu hayo. Anasema hivi: “Kupitia ratiba yangu ya kiroho nilijenga uhusiano wa karibu na Yehova. Akawa halisi hata zaidi kwangu. Nilijifunza kumtegemea katika hali zote.” Ratiba ya Vitaliy ya kiroho inatia ndani ibada ya familia, kuhudhuria na kushiriki katika mikutano ya kutaniko, kushiriki kwa ukawaida katika utumishi, na kutoa sala zinazotoka moyoni. Anasema hivi: “Ikiwa nisingekuwa na ratiba hii, nisingeweza kumtegemea Yehova na kushinda majaribu yote.”

Tunapoendelea kusubiri hukumu ya kesi ya Vitaliy, tunaendelea kusali kwa ajili yake. Tunajua kwamba Yehova, ‘yule anayetupa nguvu,’ ataendelea kuwaimarisha ndugu na dada zetu nchini Urusi ambao wanaendelea kuvumilia kwa ujasiri mateso wanayokabili.—Wafilipi 4:13.