AGOSTI 2, 2021
URUSI

Ndugu Waaminifu Wenye Umri Mkubwa Wadumisha Shangwe Licha ya Mateso

CHEZA

Tangu marufuku ilipotangazwa dhidi ya mashirika ya Mashahidi wa Yehova nchini Urusi, wenye mamlaka wamewatesa ndugu na dada nchini kote—kuanzia wenye umri wa miaka 18 hadi wenye umri mkubwa wa miaka 89. Kufikia Julai 2021, ndugu na dada 18 wenye umri wa miaka 60 au zaidi wamehukumiwa kwa sababu tu ya kuabudu kwa amani. Watatu kati yao sasa wako gerezani. a Ripoti ya 4 ya Baraza Linaloongoza ya 2021 ilikazia mashambulizi yenye kuchukiza dhidi ya ndugu na dada zetu wenye umri mkubwa.

Ndugu na dada zetu wenye umri mkubwa wamefauluje kuvumilia mateso hayo? Tunafurahi kushiriki pamoja nanyi maelezo ya baadhi ya waamini wenzetu ambao wamedumisha uaminifu.

Aleksandr Ganin

Alizaliwa: 1957

Hukumu: Kifungo cha nje cha miaka mitatu na vizuizi vya kusafiri vya miezi tisa

Alibatizwa: 1997

Maelezo ya Kibinafsi

Umefauluje kudumisha shangwe na mtazamo unaofaa wakati wa kipindi hiki kigumu?

Yehova anaandaa mwongozo wa wazi kupitia tengenezo lake wa jinsi ya kuepuka kushuka moyo unapokabili hali kama hizi na jinsi ya kudumisha mtazamo unaofaa. Mimi na mke wangu tulikuwa na matatizo ya afya kabla ya kukamatwa. Lakini tunaendelea kuwa watendaji, na hatukengeushwi tusahau kilicho muhimu zaidi, yaani, kutunza hali yetu ya kiroho kwa ukawaida.

Mateso haya yamekuwa na matokeo gani kwako na kwa familia yako?

Imani yetu imeimarishwa, nasi tumekuwa na uhusiano wa karibu zaidi. Ninasadiki kwamba unabii wa Biblia unatimia kama ulivyotabiriwa na kwamba tuko karibu sana na wakati ambapo mabadiliko makubwa yatatokea. Kujua hilo kunanipa nguvu za kuendelea kutumikia bila kukengeushwa fikira.

Yuriy Krutyakov

Alizaliwa: 1952

Hukumu: Kifungo cha nje cha miaka sita, kutia ndani miaka mitano chini ya uangalizi na vizuizi vya kusafiri vya mwaka mmoja

Alibatizwa: 1998

Maelezo ya Kibinafsi

Kifungo hiki cha nje kimekuathirije wewe na familia yako?

Kifungo cha nje ni afadhali zaidi kuliko kufungwa gerezani. Hata hivyo, si rahisi kupata kazi ukiwa na umri wangu na hasa ukiwa na rekodi ya uhalifu. Mbali na hilo malipo yangu ya uzeeni ni madogo sana kwa kulinganishwa na gharama za sasa za chakula, dawa, na matibabu.

Una matatizo gani ya afya, nawe unakabilianaje nayo?

Nina ugonjwa wa yabisi-baridi kwenye magoti yangu. Nilitoka mahabusu nikiwa na nimonia, kwa sababu wengine tuliofungwa nao walikuwa wakivuta sigara. Mapafu yangu yana matatizo. Mimi hujaribu kufuata mapendekezo ya daktari na kutafuta njia za kudumisha afya yangu kwa kadiri ninavyoweza ili niweze kuendelea kufanya mapenzi ya Yehova.

Yehova amekusaidia katika njia zipi hususa tangu kesi yako mahakamani ilipokwisha?

Ndugu na dada wamenisaidia sana. Maneno ya Zaburi 133:1 ni ya kweli kabisa. Kujionea upendo huo ni baraka ambayo inafunika makali ya kifungo changu. Hatungewahi kuwazia kwamba siku moja tutaanzisha urafiki na ndugu na dada wengi kadiri hiyo. Nimejionea jinsi Yehova alivyopanga kila kitu, jinsi anavyotujali kupitia undugu wetu, jinsi anavyoshughulika nasi kwa wororo, na baraka anazotupa tunapokabili hali ngumu sana. Baada ya kujionea yote hayo, ninawezaje kuacha kumtumikia Mungu mkuu na mwenye upendo kama huyo? Siwezi kuwazia kufanya kitu kingine.

Lyudmila Ponomarenko

Alizaliwa: 1950

Kifungo: Kifungo cha nje cha miaka miwili na mwaka mmoja chini ya uangalizi

Alibatizwa: 1998

Maelezo ya Kibinafsi

Vizuizi vyako vya sasa vinaathirije maisha yako ya kila siku?

Siwezi kuhama makao yangu bila kutoa taarifa kwa shirika la pekee la serikali linalodhibiti utendaji wa watu ambao wamepewa kifungo cha nje. Pia lazima nifike mbele ya shirika hilo kila mwezi.

Hilo limeathirije afya yako?

Nimeanza kupatwa na maumivu ya kichwa yanayoendelea kwa muda mrefu. Kinachonisaidia ni kusali niwe na usawaziko na kudumisha mtazamo unaofaa kuelekea mambo ambayo siwezi kubadili.

Yehova amekusaidiaje?

Yehova amenibariki sana tangu kesi yangu ilipokamilika. Ananipa nguvu za kuendelea kumtumikia, naye hajaniacha bila msaada. Waabudu wenzangu wananitegemeza, na wako tayari kuja kunisaidia hali ngumu zinapotokea. Hata wakati ambapo hali zilikuwa ngumu sana na nyingine zilionekana kuwa siwezi kuzishinda, Yehova alinibariki. Nimejifunza kumtegemea Yehova zaidi katika kila jambo. Ninashukuru sana kwamba Yehova alinikabidhi huduma hii ya pekee—kuzungumza mbele ya mahakama. Ni shangwe kwangu kufanya hivyo. Sina sababu ya kuvunjika moyo, nami nimeazima kabisa kukimbia mbio hadi mwisho na kuwasaidia wengine wafike kwenye mstari wa mwisho.

Gennady Shpakovskiy

Alizaliwa: 1958

Hukumu: Mwanzoni alihukumiwa miaka sita na nusu gerezani. Baada ya kukata rufaa, mahakama ilisitisha kifungo hicho na kumpa miaka miwili chini ya uangalizi

Alibatizwa: 1995

Maelezo ya Kibinafsi

Tangu kesi yako ilipokwisha, umewekewa vizuizi gani?

Sina haki ya kupanga au kushiriki utendaji wowote wa mashirika ya kidini ya umma kwa miaka mitatu. Nimezuiwa kutoka nyumbani kuanzia saa 5:00 usiku hadi saa 12:00 asubuhi. Siwezi kusafiri kwenda nje ya mji wetu wala kuhama makao yangu bila ruhusa. Pia lazima nifike mbele ya shirika la pekee la serikali mara mbili kila mwezi.

Ndugu na dada zako wamekusaidiaje wakati huu?

Ninasaidiwa kwa njia nyingi. Tangu siku ya kwanza kabisa nilipofungwa, mimi na familia yangu tulipokea barua, kadi, michoro, na ujumbe wa simu ulio na maneno ya kututegemeza, yenye kutia moyo, ya upendo, na yanayosema wako tayari kusaidia kwa njia yoyote.

Azimio lako la kuendelea kumtumikia Yehova limeimarishwaje?

Kila kitu ambacho kimenipata mimi na familia yangu katika miaka michache ambayo imepita kimeimarisha uhakika wangu kwamba ninamtumikia Mungu wa kweli, Yehova! Kusoma na kuhusika moja kwa moja katika matukio yanayofafanuliwa katika Biblia kuwa “siku za mwisho” kunanisadikisha kabisa kwamba niko katika barabara inayofaa—barabara inayoongoza kwenye ulimwengu mpya.

Valentina Suvorova

Alizaliwa: 1948

Hukumu: Kifungo cha nje cha miaka miwili

Alibatizwa: 1996

Maelezo ya Kibinafsi

Umeathiriwaje na mateso haya?

Kuhukumiwa kuwa mhalifu ni jambo lenye kuabisha na lenye kuchukiza, kwa kuwa mimi nimwamini Mungu mwenye upendo, shangwe, na rehema. Mara nyingi ninashikwa na wasiwasi. Kuna pindi ambazo siwezi kulala usiku, nina maumivu ya kichwa, shinikizo langu la damu linapanda, na ninapatwa na maumivu ya mgongo.

Ni nini ambacho kimekusaidia kudumisha mtazamo unaofaa?

Kilichonisaidia ni kuonyesha upendo, shukrani, na uthamini kumwelekea Mungu wetu, Yehova, kuelekea sheria na kanuni zake, na pia kuelekea tengenezo lake. Zamani, nilijua kuhusu upendo, rehema, faraja, na kitia-moyo ambacho Baba yetu mpendwa wa mbinguni, Yehova Mungu anatoa. Lakini sasa ninafahamu mambo hayo kwa kiwango kikubwa zaidi, kimwili na kiroho pia. Nimejionea mambo yote hayo kupitia waamini wenzangu, rafiki zangu wa karibu, ndugu wanaoongoza, kutaniko, na tengenezo letu lote. Asanteni ninyi nyote!

Tunashukuru sana kwa mfano bora ambao ndugu hao waaminifu wenye umri mkubwa nchini Urusi wanatuwekea. Msimamo wao wenye ujasiri wa kutetea uadilifu unastahili kuigwa, na muhimu zaidi ni maridadi machoni pa Mungu.—Methali 16:31.

a Dada Valentina Baranovskaya, mwenye umri wa miaka 70, anatumikia kifungo cha miaka miwili gerezani. Ndugu Aleksandr Ivshin, mwenye umri wa miaka 63, anatumikia kifungo cha miaka saba na nusu gerezani. Na Ndugu Yuriy Savelyev, mwenye umri wa miaka 68, anatumikia kifungo cha miaka sita gerezani.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI