NOVEMBA 29, 2023
URUSI

Ndugu Watano Nchini Urusi Wahukumiwa Katika Eneo la Saratov

CHEZA

Novemba 23, 2023, Mahakama ya Wilaya ya Balakovskiy iliyo katika Eneo la Saratov ilitangaza uamuzi wake katika kesi inayowahusu Ndugu Aleksey Bogatov, Ndugu Yevgeniy Fomashin, Ndugu Vladimir Mavrin, Ndugu Andrey Murych, na Ndugu Sergey Tyurin. Ndugu wote watano walitangazwa kuwa na hatia. Aleksey na Vladimir walihukumiwa kifungo cha nyumbani cha miaka sita kila mmoja wao. Andrey, Sergey, na Yevgeniy walitozwa faini ya rubo 300,000 (dola 3,362 za Marekani). Wote hawahitaji kwenda gerezani wakati huu.

Maelezo Mafupi Kuwahusu

Aleksey Bogatov

Alizaliwa: 1960 (Baklushi, Eneo la Ulyanovsk)

Maisha Yake: Alifanya kazi akiwa dereva wa ambulansi

Alifunga ndoa na Lyubov mwaka wa 1982. Walipata wana watatu

Kujifunza Biblia na Mashahidi wa Yehova kulimsaidia kuelewa jinsi Ufalme wa Mungu utakavyowaletea haki wanadamu wote. Alibatizwa mwaka wa 1994

Maelezo ya Kibinafsi

Ulihisije utegemezo wa Yehova ulipokuwa mahabusu?

Sikuwa na Biblia katika mwezi wa kwanza ambao nilikuwa mahabusu, lakini nilikuwa na kalamu na daftari. Nilisali kwa Yehova kila siku anisaidie kukumbuka Maandiko. Kufikia mwishoni mwa mwezi huo, nilikuwa nimekumbuka mistari 112. Hilo lilinihakikishia kwamba ikiwa ninasoma Biblia kwa ukawaida na kutafakari, Yehova atatumia roho yake takatifu kunisaidia kukumbuka. Nilimshukuru sana Yehova kwa msaada wake.

Yevgeniy Fomashin

Alizaliwa: 1977 (Balakovo)

Maisha Yake: Alifanya kazi akiwa fundi umeme

Alipendezwa na ahadi ya Biblia kwamba kutakuwa na amani na upatano duniani pote. Alibatizwa mwaka wa 2013. Alijifunza lugha ya ishara ili kuwasaidia viziwi katika jamii yake

Maelezo ya Kibinafsi

Mifano ya akina ndugu ambao walifungwa wakati uliopita imekusaidiaje?

Nilipokuwa mahabusu, nilifikiria kuwahusu Konstantin Bazhenov, Ndugu Aleksey Budenchuk, Ndugu Gennadiy German, Ndugu Roman Gridasov, Ndugu Feliks Makhammadiyev, na Ndugu Aleksey Miretskiy ambao walikuwa wamezuiliwa katika eneo hilohilo mwaka wa 2018-2019. Mifano yao ya imani iliniimarisha sana. Na ninaendelea kutiwa moyo sana na ndugu na dada wengi ulimwenguni pote ambao wanaendelea kudumisha utimilifu wao licha ya kukabiliana na changamoto mbalimbali. Nahisi ni kana kwamba sisi sote tunapitia majaribu haya pamoja.

Andrey Murych

Alizaliwa: 1991 (Balakovo)

Maisha Yake: Anafanya kazi ya kufua chuma

Alijifunza Biblia kwa mara ya kwanza kutoka kwa nyanya yake. Alistaajabishwa na jinsi unabii wa Biblia ulivyotimizwa. Alibatizwa mwaka wa 2007

Alifunga ndoa na Anastasiya mwaka wa 2009. Wana binti mmoja

Maelezo ya Kibinafsi

Ni nini kilichokusaidia kukabiliana na changamoto ulipokuwa mahabusu?

Jambo gumu zaidi kwangu nilipokuwa mahabusu ni kudumisha shangwe yangu, hasa katika miezi miwili ya kwanza. Jambo moja lililonisaidia ni kufikiria jinsi mtazamo wangu unavyomwonyesha Yehova kwamba ninathamini mambo aliyonitendea, licha ya hali ngumu nilizokuwa nikikabili. Kudumisha utimilifu wangu nikiwa na shangwe ndiyo njia bora zaidi ya kuonyesha shukrani zangu. Pia, nilisadiki hata zaidi kwamba kwa msaada wa Yehova ningeweza kukabiliana na jambo lolote. Yehova anaweza kunipatia amani chini ya hali yoyote.

Sergey Tyurin

Alizaliwa: 1994 (Balakovo)

Maisha Yake: Alifanya kazi akiwa fundi umeme

Alifundishwa Biblia na nyanya yake. Aliamini kwamba siri ya kufanikiwa maishani ni kutumia kanuni za Biblia. Alibatizwa mwaka wa 2012

Alifunga ndoa na Yelizaveta mwaka wa 2018

Maelezo ya Kibinafsi

Umejifunza masomo gani kwa kuteswa kwa sababu ya imani yako?

Nimejifunza mambo matatu. Jambo la kwanza, sikuzote Yehova yuko ili kunisaidia. Anajua ninachohitaji zaidi, na anajua wakati unaofaa zaidi wa kunipa vitu hivyo. Jambo la pili, kuamini ahadi za Yehova ni muhimu sana ili kudumisha amani moyoni. Ingawa si rahisi kukabiliana na mateso, mateso hayo ni ya muda tu yanapolinganishwa na baraka za milele zilizo mbele yetu. Hivi karibuni, hata sitakumbuka magumu yoyote niliyokabili. Na jambo la tatu, umoja tulio nao katika undugu wetu ni hazina. Umoja huo unatusaidia kuvumilia majaribu, na tunapaswa kuutunza.

Mifano ya uaminifu ya ndugu hawa watano inatukumbusha kwamba tunaweza kuvumilia magumu kwa ajili ya habari njema tunapotegemea nguvu za Mungu.—2 Timotheo 1:8.

Mfuatano wa Matukio

Februari 11, 2022

Kesi ya uhalifu ilianzishwa
Machi 23, 2022

Maofisa wa FSB walifanya msako kwenye nyumba za ndugu hao watano. Kila mmoja alihojiwa na kuzuiliwa katika eneo la muda
Machi 25, 2022

Ndugu hao waliwekwa mahabusu
Januari 23, 2023

Ndugu hao waliachiliwa kutoka mahabusu na wakawekewa vizuizi vya kusafiri
Julai 21, 2023

Kesi ya uhalifu ilianza
Novemba 23, 2023

Hukumu ilitolewa

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI