OKTOBA 1, 2021
URUSI

Ndugu Watano Wameazimia Kuvumilia Licha ya Mateso

CHEZA

Mfuatano wa Matukio

Mahakama ya Wilaya ya Industrialniy iliyoko Orenburg itatangaza hivi karibuni uamuzi katika kesi inayohusu Ndugu Vladimir Kochnev, Ndugu Vladislav Kolbanov, Ndugu Pavel Lekontsev, Ndugu Sergey Logunov, na Ndugu Nikolay Zhugin. a Mwendesha-mashtaka bado hajatoa ombi la hukumu anayopendekeza
Machi 1, 2021

Zaidi ya mwaka mmoja baada ya kesi hiyo kurudishwa kwenye ofisi ya mwendesha-mashtaka, kesi ilianza kusikilizwa katika Mahakama ya Wilaya ya Industrialniy iliyoko Orenburg
Januari 14, 2020

Kesi ya uhalifu ilirudishwa kwenye ofisi ya mwendesha-mashtaka kwa sababu mashtaka hayakuwa wazi
Agosti 3, 2018

Vladimir aliachiliwa kutoka mahabusu baada ya siku 79 na akawekwa chini ya kifungo cha nyumbani
Mei 16, 2018

Wenye mamlaka walifanya upekuzi katika nyumba za familia 19 katika Eneo la Orenburg. Vladimir na Vladislav walipelekwa mahabusu. Vladislav aliwekwa chini ya kifungo cha nyumbani siku tatu baadaye
Mei 14, 2018

Msimamizi wa Kamati ya Uchunguzi ya Shirikisho la Urusi katika Eneo la Orenburg alifungua kesi ya uhalifu dhidi ya ndugu wote watano

Maelezo Mafupi Kuwahusu

Vladimir Kochnev

Alizaliwa: 1979 (Orenburg)

Maisha Yake: Alipokuwa mtoto alipenda kuvua samaki na kucheza mpira. Alifanya kazi ya kuchomelea vyuma na ya kurekebisha televisheni na redio. Mwaka wa 1993 alibatizwa na kuwa Shahidi wa Yehova. Alifunga ndoa na Galina mwaka wa 2003

Maelezo ya Kibinafsi

Uhusiano wako na Yehova umeimarikaje katika kipindi hiki cha majaribu?

Ninaweza kusema kwamba niliboresha uhusiano wangu na Mungu katika kipindi ambacho nilikuwa mahabusu. Nilijifunza kumtegemea Yehova zaidi kwa sababu nilikuwa peke yangu na nisingeweza kufanya chochote ili kubadili hali yangu.

Ungewapa mapendekezo gani wale ambao wanajitayarisha kwa ajili ya mateso wakati ujao?

Ukweli ni kwamba mateso hayafanyi hali ya kiroho ya mtu kuwa nzuri zaidi au mbaya. Badala yake, yanaonyesha jinsi mtu alivyo kikweli. Tukidumisha ratiba nzuri ya kiroho na ikiwa tuna mazoea mazuri ya kiroho, imani yetu haitadhoofika. Hatupaswi kusubiri wakati fulani wa pekee eti ndipo tuanze kuimarisha hali yetu ya kiroho. Kwa mfano, hatuhitaji kusubiri tukio fulani la pekee litukie ndipo tuanze kusoma Biblia kila siku au tuanze kusali kwa ukawaida.

Vladislav Kolbanov

Alizaliwa: 1992 (Orenburg)

Maisha Yake: Mama yake alianza kujifunza Biblia Vladislav alipokuwa na umri wa miaka sita. Alibatizwa na kuwa Shahidi wa Yehova mwaka wa 2008. Alipokuwa na umri wa miaka 18 aliomba asiende jeshini, bali apewe utumishi wa badala. Alifanya utumishi wake wa kiraia kwa kuwatunza wazee katika makao ya kuwatunzia wazee

Maelezo ya Kibinafsi

Tukio hili limeimarishaje azimio lako la kumtumikia Yehova?

Mara nyingi wengine huniuliza, ikiwa ningepewa nafasi, je, ningependa kuepuka kushtakiwa kuwa mhalifu? Ninapochunguza hali yangu, ninatambua kwamba sijuti hata kidogo kuhusu mambo yanayonipata. . . . Nimejionea mkono wa Yehova maishani mwangu, na ninaweza kuona jinsi ndugu na dada wanavyonitegemeza.

Nimetambua kwamba tunapopata majaribu ndipo tunapositawisha uvumilivu, imani yetu katika Yehova inaimarishwa, na upendo wetu kwake unaongezeka.

Pavel Lekontsev

Alizaliwa: 1981 (Kytat, Eneo Krasnoyarsk)

Maisha Yake: Tangu utotoni, alivutiwa na uumbaji. Anapenda kwenda matembezi, kuvua samaki, na kutafuta uyoga. Amefanya kazi zinazohusiana na ujenzi. Alianza kujifunza Biblia na Mashahidi wa Yehova katika mwaka wa 1998 hivi. Alitambua kwamba siri ya kupata furaha ni kuishi kulingana na viwango vya Biblia. Alibatizwa katika mwaka wa 1999. Alifunga ndoa na Oksana mwaka wa 2017.

Maelezo ya Kibinafsi

Ulitendaje wakati wa upekuzi, mahojiano, na kesi ilipokuwa ikisikilizwa?

Maofisa wa usalama walipovamia nyumba yangu, nilishangazwa na jinsi Yehova alivyojibu sala fupi zaidi ambayo nimewahi kutoa maishani mwangu. Nilisali nipate utulivu. Ilijibiwa, si saa au dakika kadhaa baadaye, bali sekunde chache tu baadaye. Nilipata utulivu na ningeweza kufikiria mambo waziwazi.

Umeazimia kufanya nini licha ya uamuzi utakaotolewa katika kesi yako?

Hatuwezi kujua mahakama itatoa hukumu gani. Lakini nina uhakika kwamba Yehova ataendelea kunipa nguvu. Kwa sababu hata mahakama ifanye uamuzi upi, ushindi ni wetu! Hata jaribu liwe kali namna gani, Yehova huandaa roho takatifu kwa kiwango tunachohitaji. Nimesadikishwa tena na tena kuhusu jambo hilo wakati wa maisha yangu ya kumtumikia Yehova! Hivyo, nimeazimia kuendelea kukimbia mbio hizi mpaka mwisho.—2 Timotheo 4:7.

Sergey Logunov

Alizaliwa: 1962 (Orenburg)

Maisha Yake: Alipata mafunzo maalumu ya kuendesha mashine. Baada ya kutumikia jeshini, akawa mpiga-picha. Hivi karibuni alifanya kazi ya kutunza bustani. Anaendelea kupiga picha ili kujifurahisha tu. Pia anapiga gitaa. Alianza kujifunza Biblia na Mashahidi wa Yehova mapema katika mwaka wa 1990. Alibatizwa mwaka wa 1992. Alifunga ndoa na Larisa mwaka wa 1994

Maelezo ya Kibinafsi

Ungewapa mapendekezo gani wale ambao wanajitayarisha kwa ajili ya mateso wakati ujao?

Inajulikana wazi kwamba tunapopatwa na matatizo, ndipo inapoonekana ikiwa sisi ni waaminifu au la. Ili kujitayarisha kwa ajili ya hali hizo, tunahitaji kuwa tukiimarisha uhusiano wetu na Yehova na Yesu Kristo. Ni kama upanga. Watu wanaotengeneza panga huziimarisha ili zisivunjike zinapokuwa vitani. Askari anapokuwa na panga imara, anajihisi akiwa na uhakika zaidi wakati wa vita. Yesu alisema kwamba “mtu aliye mwaminifu katika lililo dogo ni mwaminifu katika lililo kubwa pia.” (Luka 16:10) Hivyo, mtu anapojizoeza kuwa mtiifu kwa Mungu katika mambo yote sasa, kuna uwezekano mkubwa wa kuendelea kuwa mwaminifu anapopatwa na mateso.

Nikolay Zhugin

Alizaliwa: 1976 (Kazakhstan)

Maisha Yake: Alipokuwa mtoto alipenda kucheza michezo mbalimbali. Anafanya kazi ya kuchomelea vyuma kwa gesi. Alianza kujifunza Biblia na Mashahidi wa Yehova katika mwaka wa 1995 hivi. Alibatizwa mwaka wa 1996. Ingawa Galina, mke wake si Shahidi wa Yehova, wana familia yenye furaha na wana mwana na binti

Maelezo ya Kibinafsi

Umemwomba Yehova jambo gani katika kipindi hiki?

Yehova hatatuondolea matatizo au mateso yetu yote. Anaruhusu watumishi wake wapatwe na mambo hayo. Hata hivyo, nimemwomba na ninaendelea kumwomba Yehova anipe roho yake takatifu ili nivumilie majaribu yote haya. Ninahisi kwamba tayari Yehova amekuwa akinisaidia kudumisha shangwe yangu wakati wa uchunguzi na wakati wa kesi. Ni wazi kwamba nisingeweza kukabiliana na hali hizi bila msaada wake!

Hata ingawa kesi dhidi ya imani yao imeendelea kwa zaidi ya miaka mitatu, ni wazi kwamba ndugu zetu wapendwa wameazimia kudumisha ushikamanifu wao kwa Yehova. Ni wazi pia kwamba Yehova anatenda kwa ushikamanifu kuwaelekea.—2 Samweli 22:26.

a Tarehe ya hukumu haitolewi mapema pindi zote

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI