SEPTEMBA 24, 2021
URUSI

Ratiba ya Kiroho ya Ndugu Maksim Beltikov Inampa Nguvu

CHEZA

Mfuatano wa Wakati

Mahakama ya Wilaya ya Pavlovskiy iliyo katika Eneo la Krasnodar itatangaza uamuzi wake hivi karibuni katika kesi inayomhusu Ndugu Maksim Beltikov. a Bado mwendesha-mashtaka hatajoa hukumu anayopendekeza
Juni 29, 2020

Anaagizwa asiondoke katika eneo hilo
Juni 23, 2020

Kesi ya uhalifu inafunguliwa dhidi yake. Shtaka: “alishiriki katika vipindi vya mafundisho ya kidini” tendo lililohusisha “kuongoza na kusikiliza hotuba zinazotegemea machapisho ya dini”
Aprili 29, 2020

Wenye mamlaka walifanya upekuzi katika nyumba ya Maksim. Baadaye, alihojiwa

Maelezo Mafupi Kumhusu

Maksim Beltikov

Alizaliwa: 1980 (Baltiysk, Eneo la Kaliningrad)

Maisha Yake: Alipokuwa mtoto alifurahia kupiga muziki wa kitamaduni. Alifanya kazi ya ujenzi. Binamu yake alimfundisha kwa mara ya kwanza kuhusu Biblia. Alifurahi sana kujifunza jina la Mungu, Yehova. Alivutiwa na unabii wa Biblia uliotimizwa na ushauri wake bora. Alibatizwa na kuwa Shahidi wa Yehova katika mwaka wa 2001. Alifunga ndoa na Mariya mwaka wa 2005. Wana watoto watatu wachanga

Maelezo ya Kibinafsi

Yehova amekutegemezaje wewe na familia yako wakati wa jaribu hili?

Yehova ameandaa kila kitu ambacho familia yangu inahitaji kiroho na pia kimwili. Mke wangu na watoto wangu wamejaribu sana kuelewa hisia zangu na kunikengeusha nisifikirie mambo yenye kuhuzunisha. Ndugu mmoja alinisaidia kufikiria Zaburi ya 23. Ndugu huyo alisema: “Usimzuie Yehova na tengenezo lake. Mruhusu Yehova akutunze.”

Ratiba yako ya kiroho imekusaidiaje kudumisha shangwe?

Kusoma Biblia kwa ukawaida na kuhudhuria matukio ya kiroho kumenisaidia kudumisha shangwe yangu na kuwa na imani kwamba Yehova anadhibiti kila kitu. Mimi na mke wangu tulifaulu kuhudhuria kusanyiko kule Seoul, Korea Kusini, mwaka wa 2018. Siku ya Jumapili, msemaji aligeukia upande wa lugha ya Kikorea na kuwaomba wote ambao waliwahi kufungwa kwa sababu ya imani yao wasimame. Maelfu ya akina ndugu walisimama. Nikikumbuka tukio hilo mimi hujiambia: ‘Ikiwa wao walifaulu, basi mimi pia nitafaulu.’

Uhusiano wako na Yehova umeimarikaje kutokana na mambo ambayo umepitia?

Mbali tu na kuimarika, uhusiano wetu umebadilika. Sala zangu zimekuwa hususa zaidi. Kwa kupendeza, si maombi ambayo yamekuwa hususa zaidi, bali ni shukrani zangu zimekuwa hususa zaidi. Nimeanza kusoma Biblia kwa njia tofauti, nikitafuta mifano inayopatana na hali zangu.

Tunasali kwamba ndugu na dada zetu nchini Urusi waendelee kuwa imara na kujengwa kupitia ratiba yao ya kiroho na upendo wao kuelekea waabudu wenzao. Tunajua kwamba “Mungu wa upendo na amani” ataendelea kuwa pamoja na ndugu na dada hao wapendwa.—2 Wakorintho 13:11.

a Tarehe ya hukumu haitolewi mapema sikuzote.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI