APRILI 1, 2019
URUSI

Shahidi Mwingine wa Yehova Ahukumiwa Nchini Urusi

CHEZA

Aprili 1, 2019, mahakama ileile iliyomhukumu Ndugu Dennis Christensen kifungo cha miaka sita, imemhukumu Sergey Skrynnikov mwenye umri wa miaka 56 kwa kutenda kupatana na imani yake akiwa Shahidi wa Yehova. Mahakama imemtoza faini kubwa ya dola 5,348.00 (RUB 350,000; EUR 4,758.95). Hakufungwa gerezani ingawa mwendesha-mashtaka alitaka apewe kifungo cha miaka mitatu gerezani.

Ndugu Skrynnikov na mke wake, Nina, wana binti mmoja. Wanamsaidia binti yao aliyeolewa na ana watoto watano. Pia, ndugu na dada Skrynnikov ndio wanaowatunza wazazi wa Nina waliozeeka.

Akiwa mahakamani, Ndugu Skrynnikov aliitetea imani yake kwa heshima. Kwa sehemu, alisema hivi: “Ukiangalia hali iliyopo sasa kwa maoni ya mtu asiye mwamini, unaweza kukata tamaa. . . . Lakini nikiwa Shahidi wa Yehova, ninaangalia hali hii kwa macho ya imani. Mungu akiniruhusu nihukumiwe, inamaanisha ninapaswa kuangalia miaka hii mitatu si kama adhabu bali kama mgawo wa pekee wa kutumikia katika eneo jipya! Hivyo, sikati tamaa. . . . Mungu ni yuleyule iwe tuko huru au gerezani. Hivyo, hatujaachwa. Yupo nasi kila mahali mradi tu tuwe waaminifu kwake.”

Tunatiwa moyo na imani yenye nguvu ya waabudu wenzetu, kama vile Ndugu Skrynnikov. Tunapofikiria majaribu makali wanayokabili, tunahisi kama mtume Paulo aliyesema maneno haya: “Mungu anayetoa tumaini na awajaze ninyi shangwe yote na amani kwa kumtegemea, ili tumaini lenu liongezeke kwa nguvu za roho takatifu.”—Waroma 15:13.

Maelezo ya Kumalizia ya Ndugu Skrynnikov

Yametafsiriwa kutoka Kirusi

Kwanza, ningependa kumshukuru Hakimu Gleb Borisovich Noskov kwa kutoniweka mahabusu, kwa hiyo nimekuwa pamoja na familia yangu muda wote huo. Pia ningependa kuwashukuru makarani kwa kazi yao.

Ningependa kutoa shukrani za pekee kwa mwendesha-mashtaka, Bi Nadezhda Gennadiyevna Naumova, kwa sababu sikushinikizwa kupita kiasi na nilihojiwa kwa njia inayofaa.

Pia, ningependa kuwashukuru mawakili wangu, Bi Irina Aleksandrovna Krasnikova na Bw. Anton Nikolayevich Bogdanov, kwa kazi kubwa ambayo wamefanya. Nilishangaa sana walipofaulu kuleta mtaalamu kutoka Chelyabinsk.

Asanteni marafiki wote wapendwa, kwa kuja kesi ilipokuwa ikiendelea ili kunitia moyo, ingawa ilijulikana kwamba watu hawangeruhusiwa kuingia mahakamani.

Asante sana mama kwa kuja kunitegemeza mahakamani licha ya matatizo ya kiafya.

Asante mke wangu mpendwa kwa kunitegemeza kwa miaka 37 hali zikiwa nzuri na hata zikiwa mbaya.

Bila shaka, ningependa kumshukuru Mungu wangu mpendwa, Yehova, ambaye ameujaza moyo wangu amani na shangwe. Huenda msiamini hili, lakini sina kinyongo au kutoridhika kwa sababu ya yale ambayo yamenipata, nina shangwe tu na amani.

Wakorintho ya Pili 4:8, 9 ni unabii wa Biblia unaotimizwa katika kisa changu: “Tunakandamizwa katika kila njia, lakini hatubanwi kupita kiasi cha kushindwa kusonga; tunafadhaishwa, lakini si bila njia ya kutokea kabisa; tunateswa, lakini hatuachwi bila msaada; tunaangushwa chini, lakini hatuangamizwi.”

Andiko hilo linatuambia kwamba watumishi wa Mungu wangekandamizwa na kuteswa, lakini pia kwamba kazi ambayo Bwana Yesu aliwakabidhi ingeendelea, ingeongezeka kwa kasi, na kupanuka. Maneno hayo yanatumika kwa wote wanaojiona kuwa wafuasi wa Kristo:

Mathayo 28:19, 20 inatuambia hivi: “Basi, nendeni mkafanye wanafunzi kutoka kwa watu wa mataifa yote, mkiwabatiza katika jina la Baba na la Mwana na la roho takatifu, na kuwafundisha kushika mambo yote niliyowaamuru. Na tazama! mimi nipo pamoja nanyi sikuzote mpaka umalizio wa mfumo wa mambo.”

Roho ya Yehova inaendelea kuwaongoza Wakristo, ikiwapa nguvu zinazopita zile za kawaida, na hivyo kuwasaidia kutimiza mgawo waliopewa na Mungu licha ya mikazo wanayokabili. Tunasadikishwa zaidi kuhusu hilo tunapofikiria historia yetu. Katika miaka ya 1930, watumishi wa Mungu walikuwa na kazi iliyoonekana kuwa haiwezekani kuitimiza, ya kupeleka ujumbe wa Ufalme wa Mungu katika eneo lote la Muungano wa Sovieti. Lakini kwa kuwa kazi ya kuhubiri inaelekezwa na Kristo, alipanga ili katika miaka ya mapema ya 1950 serikali ya Sovieti ipeleke maelfu ya familia za Mashahidi wa Yehova huko Siberia, maeneo ya mbali zaidi ya nchi hiyo bila malipo. Miaka zaidi ya 60 baadaye, matokeo yamekuwaje? Maofisa katika eneo lote la Siberia wameshangaa jinsi kazi ya kuhubiri ilivyoenea. Mchunguzi mmoja anayefahamu historia ya Mashahidi wa Yehova katika Muungano wa Sovieti, alisema hivi: “Kupigana na Mashahidi wa Yehova ni kama kupuliza magugu yanayoitwa dandelion. Kadiri unavyotumia nguvu nyingi zaidi kuyapuliza, ndivyo mbegu nyingi zaidi zinavyoruka na kusambaa mbali zaidi.”

Hali iko hivyo leo kuhusiana na Mashahidi wa Yehova. Tunakutana na nani tunapohubiri nyumba kwa nyumba? Akina mama ambao hawajaajiriwa na wazee waliostaafu. Ni vigumu kuwapata nyumbani watu wanaofanya kazi. Pia ni vigumu sana kuingia ndani ya majengo yenye ulinzi mkali, magereza, mahakama, na kambi za kazi. Lakini kampeni ya kuhubiri inaelekezwa na Kristo na yeye [Yehova] ameingiza akilini na moyoni mwa Wizara ya Haki kutimiza mapenzi Yake. Mwishowe, Wizara ya Haki, Kamati ya Uchunguzi ya Shirikisho la Urusi, ofisi ya mwendesha-mashtaka, na polisi wametimiza kusudi hilo kwa kujihusisha moja kwa moja katika kampeni ya kuhubiri ya Mashahidi wa Yehova. Jinsi gani? Kwa sababu ya matendo yao, kuanzia Kaliningrad hadi Sakhalin, na Visiwa vya Kuril; kuanzia Arkhangel’sk hadi Crimea, na Yalta; katika familia, kazini, magerezani, mahakamani, na katika kambi za kurekebisha tabia, jina la Mwenye Enzi Kuu, Yehova Mungu, linatangazwa. Sisi tukiwa Mashahidi wa Yehova hatungetarajia kamwe kwamba kampeni hii ingekuwa kubwa kadiri hii. Hivyo, mlango mpya umefunguliwa katika hali mpya na katika maeneo mapya. Ni heshima kubwa kwelikweli kwa Mashahidi wa Yehova kuhubiri habari njema katika maeneo mapya. Na ni ofisi ya mwendesha-mashtaka iliyofanya hilo liwezekane.

Acheni tuwazie kitakachotokea wakati ujao. Ikiwa kwa miaka kumi hivi serikali itaendelea kuwafunga gerezani Mashahidi wa Yehova na kuwaweka katika kambi za kurekebisha tabia, kutakuwa na Mashahidi 200 hivi katika kila gereza au kambi. Hebu wazia makutaniko manne ya Mashahidi wa Yehova katika gereza moja! Wasimamizi wa magereza wataisihi Wizara ya Haki iwaachilie Mashahidi wa Yehova. Lakini unafikiri Mashahidi wengi watasali wakisema nini? “Bwana, ufanye moyo wa msimamizi uwe mgumu; usimruhusu aniachilie. Nina wanafunzi wengi sana wa Biblia na watu wengi wanyoofu wa kuwahubiria.”

Ukiangalia hali iliyopo sasa kwa maoni ya mtu asiye mwamini, unaweza kukata tamaa. Huenda ukasema: “Sijamwua mtu, sijamwibia mtu. Sijagombana na mtu yeyote. Uthibitisho huo unapatikana katika ripoti kutoka kwa wenye mamlaka vijijini na mkaguzi wa wilaya. Hata hivyo, mwendesha-mashtaka ameomba nifungwe miaka mitatu gerezani.” Huu ungekuwa wakati wa kukata tamaa; lakini nikiwa Shahidi wa Yehova, ninaangalia hali hii kwa macho ya imani. Mungu akiniruhusu nihukumiwe, inamaanisha ninapaswa kuangalia miaka hii mitatu si kama adhabu bali kama mgawo wa pekee wa kutumikia katika eneo jipya! Hivyo, sikati tamaa. Badala yake, ninaliona kuwa pendeleo kubwa, pendeleo la kumtumikia Mungu mahali ambapo hakuna Shahidi wa Yehova. Vyombo vya habari vimelima eneo hili vizuri na kulitayarisha. Sasa ni wakati wa kupanda.

Mungu ni yuleyule iwe tuko huru au gerezani. Hivyo, hatujaachwa. Yupo nasi kila mahali mradi tu tuendelee kuwa waaminifu kwake. Katika kisa changu, nina uhakika kwamba Mungu amefikiria afya yangu ya kimwili na kiroho na, akipenda, ataliingiza akilini na moyoni mwa hakimu wazo la kukubali ombi lako kuhusiana na kifungo ulichopendekeza, Bi Naumova. Ninatazamia kwa hamu Aprili 1. Waebrania 13:6 linatuhakikishia: “Yehova ni msaidizi wangu; sitaogopa. Mwanadamu atanifanya nini?” Yehova Mungu mwenyewe atanisaidia. Ninapaswa kumwogopa nani?

Sergey Skrynnikov