Ndugu Ivan Puyda ana kumbukumbu nzuri ya baba yake akirudi nyumbani saa za jioni na kumsomea yeye na ndugu zake saba Kitabu Changu cha Hadithi za Biblia. Anakumbuka vizuri pia akihubiri na baba yake, Grigoriy, katika kijiji kidogo cha Kvitok, ambamo alikuwa na kawaida ya kuzungumza na walimu na wanafunzi wenzake alipowatembelea katika nyumba zao. Akiwa kijana, Ndugu Puyda alihamia katika eneo lisilogawiwa kutaniko lolote pamoja na babu yake, Ndugu Pyotr Partsey, na kujionea bidii na roho ya kujidhabihu ya babu yake katika huduma.

Mara nyingi Ndugu Puyda aliona baba na babu yake wakisoma Biblia na machapisho yanayotegemea Biblia. Alijiwekea lengo la kufuata mfano wao.

Hata hivyo, Ndugu Puyda ambaye sasa ana umri wa miaka 41, anafuata hatua zao katika njia isiyotarajiwa, yaani, kwa kukamatwa na kufungwa gerezani kwa sababu ya kuwa mtumishi wa Yehova. Mei 30, 2018 maofisa wa Idara ya Usalama wa Taifa (FSB) walimkamata Ndugu Puyda. Alifungwa gerezani kwa miezi minne. Baada ya kuachiliwa, alipewa kifungo cha nyumbani kwa miezi sita. Babu yake, Ndugu Partsey, alikamatwa na kufungwa gerezani wakati wa utawala wa Nazi na Sovieti. Baba yake pia, Ndugu Grigoriy Puyda, alifungwa gerezani kipindi cha utawala wa Muungano wa Sovieti.

Ndugu Ivan Puyda anasema: “Mtume Paulo aliandika hivi katika 2 Timotheo 3:14, ‘Endelea kufuata mambo uliyojifunza na uliyoshawishiwa kuamini, ukijua ulijifunza mambo hayo kutoka kwa nani.’ Kuwafahamu walionifundisha kweli huniimarisha sana. Iwe ni mfumo wa siasa au gereza, hakuna kilichoweza kuwavunja moyo, na mateso si jambo linaloendelea milele. Sasa ninafuata njia hiyo nikiiga mfano wao. Nikiendelea kuwa mwaminifu nitapata thawabu.” Ndugu Puyda anasubiri uamuzi wa mahakama dhidi ya mashtaka yake.

Alisema kwamba kila mara baba na babu yake waliposimulia maisha ya gerezani, hawakuzungumzia jinsi hali zilivyokuwa. Badala yake, walisimulia mambo waliyofurahia walipohubiri habari njema.

Grigoriy ambaye sasa ana umri wa miaka 64, alibatizwa mwaka wa 1975 baada ya kutumikia mwaka mmoja katika kambi ya kazi ngumu ya utawala wa Sovieti kwa sababu ya kukataa utumishi wa kijeshi. Aliachiwa huru mwaka wa 1977. Mwaka wa 1986, alifungwa tena gerezani kwa mwaka mzima kwa sababu ya kosa la kuwa na machapisho ya Biblia yaliyopigwa marufuku. Baba yake pia aliyeitwa Ivan, alifungwa kwenye kambi ya kazi ngumu kuanzia mwaka wa 1944 hadi 1950, kwa sababu ya msimamo wake wa Kikristo wa kutounga mkono upande wowote.

Grigoriy anasema: “Kusitawisha imani yenye nguvu kulinisaidia kuvumilia mateso. Sikuwa na shaka hata kidogo kwamba ninaishi kulingana na kweli na kwamba Yehova ndiye Mungu wa kweli.”

Sasa mwana wake, Ivan, anakabili hali hiyo pia. Grigoriy anasema: “Ninaona jambo hilo likitokea tena kama wakati wa utawala wa Sovieti. Hivyo, ninasali kwamba Ivan aendelee kuwa mwaminifu wakati wa kesi yake na atakase jina la Yehova kupitia uvumilivu wake.”

Mwaka wa 1943, babu ya Ivan, Ndugu Partsey, ambaye tayari amekufa, alifungwa katika kambi ya Majdanek na baadaye Wanazi walimhamisha na kumpeleka katika kambi ya Ravensbrück kwa sababu ya kukataa kutia sahihi kwenye hati inayoonyesha kwamba amekana imani yake. Aliokolewa mwaka wa 1945 na majeshi ya Muungano. Mwaka wa 1952 alikamatwa tena na kuhukumiwa kifo kwa kunyongwa. Hata hivyo, adhabu hiyo ilibadilishwa na akaachiliwa huru mwaka wa 1956. Mwaka wa 1958, Ndugu Partsey alikamatwa mara nyingine tena kwa sababu ya imani yake kisha akaachiliwa mwaka wa 1964.

Ivan anasema: “Utimilifu wa babu yangu huniimarisha. Atakapofufuliwa, nitamweleza nilikabili majaribu kama yeye, na mfano wake ulinichochea kuendelea kuwa mwaminifu na jasiri.”

Ivan anasema: “Hakuna mtu anayeweza kuninyang’anya imani na upendo nilio nao kwa Mungu wangu, Yehova. Nimewaambia mara kadhaa wapelelezi: ‘Jambo kubwa mtakalofanya ni kunikamata na kunifunga gerezani, lakini vitisho vyenu vyote, havina nguvu yoyote.’”

Ni nini kilichowasaidia ndugu zetu kustahimili majaribu yao?

Ivan anasema hivi: “Kwenye Matendo 14:22 tunasomahivi, ‘Ni lazima tuingie katika Ufalme wa Mungu kupitia dhiki nyingi.’ Kila Mkristo atakabili majaribu. Si lazima iwe vifungo vya gereza. Tunaweza kupata ugonjwa au kufiwa na mpendwa wetu. Uvumilivu wetu utategemea mtazamo na hali yetu ya kiroho. Sikuzote Yehova yuko tayari kuwategemeza watu wake.”

Baba yake, Grigoriy anasema hivi: “Imarisha uhusiano wako na Yehova. Uwe rafiki yake wa kweli. Ni muhimu kujithibitishia kwamba tuna kweli kwa kuwa tutafanya lolote lile ili kuendelea kumtumikia Yehova. Jitihada zako zitathawabishwa.”

Inatia moyo sana kusoma masimulizi yanayoonyesha jinsi Yehova anavyowategemeza ndugu na dada wanaoteswa kwa sababu ya imani yao. Tunaendelea kusali kwa ajili ya ndugu zetu nchini Urusi ili waendelee kuwa jasiri na kuimarishwa na ahadi hii ya Yehova: “Usiogope . . . Thawabu yako itakuwa kubwa sana.”— Mwanzo 15:1.