AGOSTI 10, 2023
URUSI

Wameazimia Kuwa na Shangwe Licha ya Mateso

CHEZA

Mahakama ya Jiji la Syktyvkarskiy iliyo katika Jamhuri ya Komi itatangaza hivi karibuni uamuzi wake katika kesi inayowahusu Ndugu Aleksandr Ketov, Ndugu Andrey Kharlamov, Ndugu Aleksandr Kruglyakov, Dada Lidiya Nekrasova, na Ndugu Sergey Ushakhin. Mwendesha-mashtaka bado hajatoa ombi la hukumu anayopendekeza.

Maelezo Mafupi Kuwahusu

Andrey Kharlamov

Alizaliwa: 1971 (Syktyvkar)

Maisha Yake: Ni mhandisi wa mifumo ya kupasha joto

Alifunga ndoa na Larisa mwaka wa 1990

Andrey alihubiriwa na mfanyakazi mwenzake. Alijionea mwenyewe faida za kutumia kanuni za Biblia maishani. Yeye na Larisa walibatizwa pamoja mwaka wa 1994

Maelezo ya Kibinafsi

Ni nini kinachokusaidia kuendelea kuvumilia?

Kila jaribu ninalopata ni fursa ya kumkaribia zaidi Yehova. Baada ya kushtakiwa kuwa mhalifu, kuna wakati ambapo nilihisi sitaweza kuvumilia tena. Lakini kadiri muda ulivyozidi kusonga nilijionea Yehova akinisaidia kwa njia ya pekee sana. Yehova alitumia watu mbalimbali kunipa kitia moyo nilipokihitaji. Nina uhakika kwamba Yehova yuko pamoja nami na ananibeba mikononi mwake. Na bila shaka, ninakubaliana na maneno ya andiko la Yakobo 5:11 linalosema: “Tunawaona wale ambao wamevumilia kuwa wenye furaha. Mmesikia kuhusu uvumilivu wa Ayubu na mmeona matokeo ambayo Yehova alileta, kwamba Yehova ni mwenye upendo mwororo sana na mwenye rehema.” Yehova amenitendea kwa wororo sana na hilo linanichochea kuendelea kumwonyesha kwamba ninampenda. Isitoshe, nimeazimia kubaki mwaminifu.

Aleksandr Kruglyakov

Alizaliwa: 1979 (Ukhta, Jamhuri ya Komi)

Maisha Yake: Ni dalali anayeuza nyumba na viwanja.

Alianza kusoma Biblia akiwa tineja. Kujifunza Biblia na Mashahidi wa Yehova kulimsaidia kuacha kutumia dawa za kulevya na pia kuacha kutumia kileo kupita kiasi. Alibatizwa mwaka 2000.

Aleksandr alifunga ndoa na Tatyana mwaka 2005

Maelezo ya Kibinafsi

Ni nini kinachokusaidia kuendelea kuhubiri licha ya mateso?

Andiko la Luka 21:12, 13 linaonyesha kwamba Yesu alitabiri wafuasi wake wangeteswa, wangefungwa gerezani, na kupelekwa mbele ya wenye mamlaka. Lakini pia alitaja kwamba “mtapata nafasi ya kutoa ushahidi.” Iwapo nitaenda gerezani sitaki kujutia kwamba nimepoteza nafasi yoyote niliyokuwa nayo ya kuhubiri. Kwa hiyo, nimejiwekea mradi wa kuzungumza na maofisa wengi wa serikali kadiri niwezavyo. Ninapenda kuwaambia jinsi kazi yao na kazi yetu zinavyofanana. Sote tunajaribu kuisaidia jamii yetu. Wao wanaisaidia jamii kwa kuwafunga wahalifu gerezani ili wasiumize watu wengine. Tatizo ni kwamba wahalifu wakitoka tu gerezani wanarudia tena mwenendo wao mbaya. Sisi tunatumia Biblia kuwasaidia watu kufanya mabadiliko maishani ili wawe watu wenye amani na wenye manufaa katika jamii.

Sergey Ushakhin

Alizaliwa: 1961 (Pinyug, Eneo la Kirov)

Maisha Yake: Anafanya kazi kwenye kiwanda cha kutengeneza karatasi

Yeye na Nataliya walifunga ndoa mwaka wa 1987. Wana mwana mmoja na binti mmoja

Aliwafahamu Mashahidi wa Yehova mama yake alipoanza kujifunza Biblia. Alipouliza maswali alijibiwa moja kwa moja kutoka kwa Biblia na hilo lilimsadikisha kwamba amepata kweli. Sergey alibatizwa mwaka wa 1999 na mke wake alibatizwa mwaka wa 2005

Maelezo ya Kibinafsi

Ni nini kimekusaidia kuendelea kuwa na mtazamo mzuri?

Kwa kawaida, mtu anapovunjika moyo anakosa nguvu na mtazamo wake unaathiriwa. Ninapovunjika moyo, ninasali, ninasoma Biblia, na ninashirikiana na ndugu na dada zangu. Mambo hayo hunisaidia kudumisha mtazamo mzuri. Kihususa, ninamwomba Yehova anisaidie kuwatia moyo wengine, hasa ndugu na dada wenye umri mkubwa. Ninawasaidia kuona baraka walizo nazo hata katika mfumo huu na hilo linaniletea shangwe tele. Ninahisi ni pendeleo kubwa kutumiwa na Yehova katika njia hii.

Kama tulivyoona kwenye masimulizi haya Yehova huwapa ndugu na dada zetu “uwezo kamili” ili waweze kuvumilia majaribu na kubaki waaminifu.— Isaya 40:29.

Mfuatano wa Matukio

Machi 2, 2021

Nyumba 14 za Mashahidi wa Yehova zilifanyiwa msako jijini Syktyvkar. Aleksandr Ketov, Andrey Kharlamov, na Aleksandr Kruglyakov walipelekwa kizuizini. Lidiya Nekrasova na Sergey Ushakhin waliwekewa vizuizi vya kusafiri
Machi 3, 2021

Aleksandr Ketov na Andrey Kharlamov waliachiliwa kutoka kizuizini na kuwekwa chini ya kifungo cha nyumbani. Aleksandr Kruglyakov alipelekwa mahabusu
Aprili 27, 2021

Andrey Kharlamov aondolewa kifungo cha nyumbani
Aprili 28, 2021

Aleksandr Ketov aondolewa kifungo cha nyumbani, na Aleksandr Kruglyakov aachiliwa kutoka mahabusu
Aprili 19, 2022

Kesi ya uhalifu yaanza
Juni 9, 2022

Hakimu alisema kesi hiyo haina ushahidi wa kutosha na akairudisha kwa mwendesha-mashtaka
Februari 14, 2023

Kesi hiyo yaanza kusikilizwa tena na hakimu mwingine

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI