FEBRUARI 9, 2024
URUSI

Wanakabiliana na Majaribu Huku Wakimtumaini Yehova

CHEZA

Mahakama ya Jiji la Blagoveshchensk iliyo katika Eneo la Amur itatangaza uamuzi wake hivi karibuni katika kesi inayowahusu Dada Kristina Golik, Dada Yekaterina Olshevskaya, Dada Mariya Myasnikova, na Dada Valentina Yermilova. Mwendesha mashtaka bado hajatoa ombi la hukumu anayopendekeza.

Maelezo Mafupi Kuwahusu

Kristina Golik

Alizaliwa: 1992 (Ukrainia)

Maisha Yake: Alisomea kutengeneza tovuti

Yeye ni kizazi cha tano katika familia yake ya Mashahidi wa Yehova. Alibatizwa mwaka wa 2006

Alifunga ndoa na Dmitriy mwaka wa 2012. Juni 2021, Dmitriy alihukumiwa kifungo cha miaka sita na miezi miwili

Maelezo ya Kibinafsi

Je, kuna mstari wa Biblia ambao umekusaidia kudumisha shangwe yako?

Nilipotenganishwa na mume wangu kwa mara ya kwanza, sikujua nifanye nini ili nikabiliane na ukosefu huo wa haki. Kwa kweli, nilikosa msaada na faraja kutoka kwake. Nilimwomba Yehova anisaidie. Nilipokuwa nikiendelea na ratiba yangu ya usomaji wa Biblia, nilifika kwenye Zaburi ya 17. Niliguswa sana na mstari wa 15 unaosema: “Lakini mimi, nitauona uso wako kwa sababu ya uadilifu wangu; ninaridhika kuamka mbele zako.” Sasa, kila ninapoamka asubuhi, ninajikumbusha mimi mwenyewe jinsi ambavyo Mungu wangu, Yehova anajua kitia moyo na faraja ninayohitaji kuliko mtu mwingine yeyote. Licha ya magumu ninayokabili, kila mara ninakuwa na sababu ya kuwa na furaha.

Yekaterina Olshevskaya

Alizaliwa: 1984 (Blagoveshchensk)

Maisha Yake: Alifunga ndoa na Anton mwaka wa 2010. Wana mtoto wa kiume mwenye umri wa miaka minne

Desemba 2022, Anton na baba mkwe wake, Sergey Afanasiyev, walihukumiwa na kifungo cha zaidi ya miaka sita gerezani

Maelezo ya Kibinafsi

Uhusiano wako na Yehova umeimarikaje wakati ulipokabiliana na majaribu haya?

Katika miaka mitano iliyopita, nilichoshwa sana na kwenda mahakamani ili kusikiliza kesi ya uhalifu iliyokuwa ikimkabili baba yangu, mume wangu, na sasa kesi yangu mwenyewe. Kuna uwezekano wa kwamba nitafungwa gerezani na mwana wetu mwenye umri wa miaka minne atabaki bila wazazi wake. Licha ya hali hiyo ninahisi kama alivyohisi mwanamume mwadilifu Ayubu aliposema hivi kwenye Ayubu 42:5: “Masikio yangu yamesikia habari zako, lakini sasa ninakuona kwa macho yangu.” Ingawa ninakabili hali ngumu na mume wangu hawezi kuwa nami, ninahisi kwamba Yehova yuko karibu nami sasa kuliko wakati mwingine wowote. Wakati mmoja Anton aliniambia: “Hata ingawa nitaenda gerezani na sitaweza kukutunza, utajionea jinsi ambavyo Yehova ni kichwa cha familia aliye bora zaidi. Atakutunza.” Na kwa kweli Yehova amenitendea kwa njia hiyo. Anafanya zaidi ya kunisikiliza tu na kunihurumia, anachukua hatua na kunisaidia kihisia na kimwili, hata kabla sijamwomba.

Mariya Myasnikova

Alizaliwa: 1994 (Chernigovka, Eneo la Amur)

Maisha Yake: Alifanya kazi akiwa meneja

Alifundishwa Biblia na mama yake. Alivutiwa na utimizo wa unabii mbalimbali wa Biblia na tumaini la uzima wa milele. Alibatizwa mwaka wa 2006

Alifunga ndoa na Nikolay mwaka wa 2021

Maelezo ya Kibinafsi

Ni nini kilichokusaidia kudumisha mtazamo mzuri licha ya kukabiliana na hali hizi ngumu?

Ninajaribu kuona majaribu si kama jambo baya bali kama fursa ya kuboresha sifa zangu za Kikristo. Dhahabu husafishwa katika moto. Majaribu ninayokabiliana nayo sasa yananisaidia kusitawisha utu ambao Yehova anauthamini na ambao utanisaidia wakati ujao. Pia, ninakumbuka kile ambacho andiko la 1 Yohana 2:17 linasema: “Ulimwengu unapitilia mbali na pia tamaa yake, lakini yule anayefanya mapenzi ya Mungu anadumu milele.” Mambo yote yanayotukia sasa ni ya muda tu. Kujua hilo kunanipa nguvu za kuendelea kusonga mbele.

Valentina Yermilova

Alizaliwa: 1970 (Shimanovsk, Eneo la Amur)

Maisha Yake: Alifanya kazi katika maabara

Alifunga ndoa na Sergey mwaka wa 1995. Wana mwana mmoja

Alifurahi sana kujifunza kuhusu tumaini la ufufuo. Alibatizwa mwaka wa 2009

Desemba 2022, Sergey alihukumiwa kifungo cha miaka sita na miezi mitatu gerezani

Maelezo ya Kibinafsi

Ni masomo gani ambayo umejifunza kwa sababu ya kupitia hali hii ngumu?

Nimejionea umuhimu wa kuepuka kukazia fikira kupita kiasi hali ninazopitia. Badala yake, ninajikumbusha kwamba jambo muhimu zaidi ni kutakaswa kwa jina la Yehova. Watu wengi wanaona fahari kutoa uhai wao kwa ajili ya nchi yao. Lakini mimi naona fahari hata zaidi kutetea jina la Yehova. Ninatamani kumpa Yehova kilicho bora zaidi na kumtukuza yeye. Nami ninajua kwamba hataniacha kamwe.

Tunamshukuru Yehova kwa vielelezo ambavyo dada hawa wanatuwekea. Na tunajua kwamba Yehova ataendelea kuwatunza na kuwabariki.—Zaburi 27:3.

Mfuatano wa Matukio

Julai 20, 2018

Nyumba zilifanyiwa msako
Julai 22, 2021

Dada wote wanne walishtakiwa kuwa wahalifu
Julai 27, 2021

Kristina na Mariya waliwekewa vizuizi vya kusafiri
Agosti 3, 2021

Yekaterina aliwekewa vizuizi vya kusafiri
Agosti 4, 2021

Valentina aliwekewa vizuizi vya kusafiri
Mei 26, 2023

Kesi ya uhalifu ilianza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI