New York—Kwa sababu ya tisho la kupigwa marufuku nchini Urusi, Mashahidi wa Yehova wanaitikia kwa kutoa ombi la moja kwa moja la kuomba kusitishwa kwa uonevu kupitia kampeni ya ulimwenguni pote ya kuwaandika barua maofisa wa Kremlin na Mahakama Kuu. Baraza Linaloongoza la Mashahidi wa Yehova linawaomba Mashahidi zaidi ya 8,000,000 ulimwenguni pote washiriki.

Machi 15, 2017, Wizara ya Haki ya Urusi iliwasilisha kesi kwenye Mahakama Kuu ya Shirikisho la Urusi iliyokusudia kwamba Kituo cha Usimamizi cha Mashahidi wa Yehova nchini Urusi kitangazwe kuwa cha msimamo mkali na kifungwe. Dai hilo pia lilikusudia kupiga marufuku utendaji wa Kituo cha Usimamizi. Ikiwa Mahakama Kuu itakubali dai hilo, makao makuu ya Mashahidi yaliyo karibu na St. Petersburg yatafungwa. Kufuatia hilo, mashirika 400 ya kidini ya Mashahidi wa Yehova (LRO) yaliyoandikishwa yatafungwa, na hivyo kupiga marufuku huduma zinazotolewa na makutaniko zaidi ya 2,300 ya Mashahidi wa Yehova nchini Urusi. Jengo la ofisi ya tawi, kutia ndani majengo mengine ya ibada yanayotumiwa na Mashahidi nchini kote, yanaweza kuchukuliwa na Serikali. Isitoshe, kila Shahidi wa Yehova anaweza kufunguliwa mashtaka kwa kufanya utendaji wa ibada. Mahakama Kuu inatazamiwa kutoa uamuzi wake mnamo Aprili 5.

David A. Semonian, msemaji katika makao makuu ya ulimwenguni pote ya Mashahidi anasema hivi: “Baraza Linaloongoza la Mashahidi wa Yehova lingependa hali hii hatari ikaziwe fikira. Ni wazi kwamba kuwafungulia mashtaka raia wasio na jeuri na wanaotii sheria kana kwamba wao ni magaidi ni kutumia vibaya sheria inayohusu msimamo mkali. Mashtaka hayo yanategemea msingi wa uwongo kabisa.”

Hii si mara ya kwanza kwa Mashahidi kufanya kampeni ya ulimwenguni pote kama hii. Miaka 20 hivi iliyopita, Mashahidi waliandika ili kuwatetea waabudu wenzao nchini Urusi na kujibu kampeni ya kuwachafulia jina iliyokuwa ikiendeshwa na washiriki fulani katika serikali iliyokuwa ikitawala wakati huo. Isitoshe, Mashahidi wamefanya mipango kama hii ya kuandika barua ili kuchochea maofisa wa serikali kukomesha mateso ya Mashahidi katika nchi nyingine kama vile Jordan, Korea, na Malawi.

Bw. Semonian anaongezea hivi: “Ni wazi kwamba kusoma Biblia, kuimba, na kusali pamoja na waabudu wenzetu si matendo ya uhalifu. Tunatumaini kwamba kampeni yetu ya ulimwenguni pote itawachochea maofisa wa Urusi wakomeshe utendaji huu unaokiuka sheria dhidi ya waabudu wenzetu.”

Wanahabari Wanaweza Kuwasiliana na:

David A. Semonian, Ofisi ya Habari za Umma, +1-845-524-3000

Urusi: Yaroslav Sivulskiy, +7-812-702-2691