Ndugu na dada zetu nchini Venezuela wanaendelea kukabili majaribu mengi, kama vile msukosuko wa kiuchumi na kijamii, mbali na ugonjwa wa virusi vya corona (COVID-19). Hata hivyo, walitafuta njia mbalimbali za kuadhimisha Ukumbusho wa kifo cha Kristo na pia za kuwaalika wengine kwenye tukio hilo.

Kwa mfano, majuma mawili kabla ya Ukumbusho, vita vilitokea katika eneo la La Victoria, Jimbo la Apure, karibu na mpaka wa Kolombia. Wahubiri wote katika kutaniko la eneo hilo walilazimika kukimbilia nchini Kolombia. Ndugu na dada wa Kutaniko la Arauquita nchini Kolombia waliwasaidia ndugu hao kutoka Venezuela kuunganishwa kwenye Ukumbusho kupitia mtandao.

Kutaniko moja katika Jimbo la Falcón liko katika eneo ambalo haliwezi kupata mtandao wa simu wala wa Intaneti. Kwa hiyo, kutaniko hilo liliwasilisha hotuba ya Ukumbusho kupitia aina ya redio za mkononi kama zinazotumiwa na maaskari.

Dada mmoja alisema hivi: “Ingawa hatuwezi kukumbatiana au kuonana, tunaweza kusikia sauti za ndugu zetu. Tunahisi ni kana kwamba tuko pamoja.”

Siku kadhaa kabla ya Ukumbusho, makutaniko yalitia jitihada ya pekee kuwakaribisha watu katika maeneo ya mbali nchini ili kusikiliza programu hiyo. Njia mbalimbali za kusikiliza hotuba ya Ukumbusho zilitumiwa. Zaidi ya mialiko 3,000 ilitumwa. Jitihada hizo zilikuwa na matokeo. Kwa mfano, katika mji wa pwani wa Araya zaidi ya watu mia moja walisikiliza hotuba ya Ukumbusho kupitia simu.

Pia, ofisi ya tawi ya Venezuela ilipanga hotuba ya Ukumbusho ipeperushwe kwenye vituo 82 vya redio na vituo tisa vya televisheni. Ndugu 8,000 hivi pamoja na wageni walioalikwa waliadhimisha Ukumbusho katika njia hiyo. Programu hiyo ilipeperushwa pia katika lugha kadhaa za kienyeji kama vile, Guahibo, Pemon, Piaroa, Pumé, Warao, Wayuunaiki, na Yekuana.

Katika Guasipati, Jimbo la Bolívar, hotuba ya Ukumbusho ilipaswa kurushwa mara moja tu saa 12:30 jioni kwenye kituo kimoja cha redio. Kwa kusikitisha, umeme katika eneo hilo hukatika mara nyingi kwa kipindi fulani. Hilo lilimaanisha kwamba wengine wangekosa kusikiliza hotuba yote ya Ukumbusho. Hata hiyo, kwa sababu ya matatizo ya kiufundi kwenye kituo cha habari, hotuba hiyo ilirushwa tena na tena zaidi ya mara kumi usiku huo. Kwa sababu hiyo, wasikilizaji walifaulu kusikiliza hotuba yote ya Ukumbusho katika pindi tofauti. Ripoti zinaonyesha kwamba zaidi ya watu 600 walisikiliza hotuba hiyo. Ndugu mmoja alisema hivi: “Yehova hakutaka yeyote akose hotuba hiyo ya pekee!”

Licha ya kwamba ndugu zetu ‘wamehuzunishwa kwa majaribu mbalimbali,’ wao ‘wanashangilia sana,’ kwa kuwa wameona Yehova alibariki jitihada zao za kuadhimisha Ukumbusho na za kuwaalika wengine.—1 Petro 1:6, 7.