Novemba 5, 2022, Ndugu Cephas Kalinda, mshiriki wa Halmashauri ya Tawi ya Zambia, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika lugha ya Mbunda. Biblia hiyo ilitolewa wakati wa programu iliyorekodiwa mapema na kupeperushwa kwa wahudhuriaji zaidi ya 1,500. Muda mfupi baada ya tangazo la kutolewa kwa Biblia hiyo, nakala za kidijitali zilipatikana ili wote waweze kuzipakua. Nakala zilizochapishwa zitapatikana kuanzia Januari 2023.

Lugha ya Mbunda inazungumzwa hasa nchini Angola na Zambia. Mashahidi wa Yehova waliwahubiria kwa mara ya kwanza watu wanaozungumza lugha ya Mbunda katika miaka ya 1930, katika Rodeshia Kaskazini (sasa ni Zambia). Mwaka wa 2014, kikundi cha utafsiri cha lugha ya Mbunda kilianzishwa. Ofisi ya utafsiri iko katika mkoa wa Mongu ulio upande wa Magharibi mwa Zambia.

Kabla ya kutolewa kwa Tafsiri ya Ulimwengu Mpya ya Maandiko ya Kigiriki ya Kikristo, kulikuwa na toleo moja tu la Biblia lililopatikana katika lugha ya Mbunda. Hata hivyo, Biblia hiyo ni bei ghali sana na haieleweki kwa urahisi. Kwa sababu hiyo, kabla ya Biblia hii mpya kutolewa, Mashahidi wa Yehova wanaozungumza lugha ya Mbunda walitumia Tafsiri ya Ulimwengu Mpya ya lugha zingine.

Akizungumzia toleo hilo jipya mtafsiri mmoja alisema hivi: “Tafsiri hii inatumia lugha ya kawaida, iko wazi, ni rahisi kuisoma, na jambo muhimu zaidi, imetafsiri ujumbe wa Biblia kwa usahihi.”

Akizungumzia changamoto za kutumia tafsiri ya awali ili kuwahubiria wengine ujumbe wa Biblia, mtafsiri mwingine alisema: “Jina Yehova halikupatikana katika mstari wowote katika tafsiri hiyo ya awali. Badala yake ilitumia jina la cheo ‘Mungu Wetu Mkuu’ ili kumrejelea Yehova. Hilo lilifanya iwe vigumu kwa watu kujua jina la Mungu. Lakini toleo jipya la Maandiko ya Kigiriki ya Kikristo linatumia jina Yehova mara 237.”

Tuna uhakika kwamba toleo hili jipya litawasaidia ndugu na dada zetu wanaotumia lugha ya Mbunda kumkaribia zaidi Yehova, na kusitawisha imani yenye nguvu kumwelekea.​—Yakobo 4:8.