Mwanzoni mwa mwaka huu, ofisi ya tawi ya Zimbabwe ilipokea barua za shukurani kutoka kwa mashirika mawili ya serikali: Dorothy Duncan Centre for the Blind and Physically Handicapped (kituo cha vipofu na walemavu) na Chuo Kikuu cha Zimbabwe. Barua hizo zilitumwa ili kuishukuru ofisi ya tawi kwa kuwapatia nakala za Tafsiri ya Ulimwengu Mpya na za machapisho mengine yanayotegemea Biblia yaliyo katika maandishi ya vipofu. Barua iliyotoka kwenye Chuo Kikuu cha Zimbabwe inasema hivi kwa sehemu: “Mchango wenu utawasaidia wanafunzi wetu wawe na maadili mazuri. Mnasaidia watu kwa njia kubwa sana nasi tunathamini hilo.”

Mchango huo wa machapisho ni sehemu ya jitihada ya ofisi hiyo ya tawi ya kuwafikia zaidi ya watu 10,000 ambao ni vipofu au ambao wana matatizo ya kuona nchini Zimbabwe. Katika mwaka wa 2017, ofisi ya tawi ilipanga kampeni ya pekee ya kuwahubiria watu hao. Katika kampeni hiyo, mapainia wa pekee wanne walipewa mgawo wa kuwasaidia wahubiri waweze kuwahubiria watu wenye matatizo ya aina hiyo. Matokeo ni kwamba kufikia sasa, mafunzo 46 yalianzishwa na watatu wamebatizwa.

Miongoni mwa wale waliobatizwa ni Dada Mavies Chaya. Alihubiriwa kupitia simu mwaka wa 2021. Hapo awali, Mavies alienda kwa wanadini ambao waliahidi kumponya lakini alivunjika moyo waliposhindwa kufanya hivyo. Alipojifunza kuhusu ahadi ya Biblia ya kwamba vipofu watakuwa na uwezo wa kuona tena katika ulimwengu mpya, hilo lilimtia moyo. Alianza kujifunza Biblia mara mbili kwa juma na alibatizwa Aprili 2022.

Kadiri tunavyoendelea kusubiri wakati ambapo Yehova atafungua macho ya vipofu, tunafurahi kuona jinsi anavyowapa ‘nuru na uelewaji’ sasa, wale wote wanaomtafuta.​—Zaburi 119:130.