Kuanzia Agosti 28 hadi Septemba 2, 2023, Maonyesho ya Kilimo ya Zimbabwe yalifanyika jijini Harare, Zimbabwe. Maonyesho hayo ya kimataifa yalikuwa na zaidi ya vibanda 500 na zaidi ya watu 250,000 walihudhuria. Ndugu na dada wa eneo hilo waliweka banda lililokuwa na machapisho katika lugha ya Kiingereza, Kindebele (cha Zimbabwe), na Kishona. Karibu machapisho 6,300 yaligawanywa na ndugu na dada 79 walioshiriki katika mahubiri hayo, na watu 116 waliomba funzo la Biblia.

Tineja anayeitwa Tamuka alikaribia banda la machapisho. Alivutiwa na vitabu Maswali Ambayo Vijana Huuliza—Majibu Yafanyayo Kazi, Buku la 1 na la 2. Lakini alipotambua kwamba Mashahidi wa Yehova wanaongoza mafunzo ya Biblia bila malipo, aliuliza hivi kwa shauku, “Mnaweza kunieleza mengi zaidi kuhusu masomo hayo ya Biblia?” Baada ya kuona jinsi funzo la Biblia linavyoongozwa kwa kutumia broshua Furahia Maisha Milele! aliomba funzo la Biblia. Ndugu mmoja alifanya mipango ya kuendelea kujifunza na Tamuka.

Mwanamume mwingine alikaribia banda letu na kusema kwamba alikuwa amevutiwa kuona kwamba Mashahidi ni watu wanyenyekevu na wana bidii katika kazi ya kuhubiri. Ndugu mmoja katika banda hilo akamsomea mwanamume huyo andiko la Mathayo 28:19, 20 na kumfafanulia kwamba Mashahidi wa Yehova wanachukua kwa uzito amri ya Yesu ya kushiriki na wengine ujumbe wa Biblia. Mwanamume huyo alisema kwamba alitamani kuwa na bidii kama hiyo. Ndugu alimpendekezea mwanamume huyo funzo la Biblia, naye akakubali kwa shangwe kujifunza.

Mwanamke mmoja katika maonyesho hayo alieleza jinsi anavyovutiwa na mwenendo wa Mashahidi wa Yehova wenye kiasi na fadhili. Akina ndugu walimweleza kwamba kujifunza na kutumia Neno la Mungu maishani mwetu kunatusaidia kuonyesha sifa hizo. Kisha dada mmoja katika banda letu akamwonyesha jinsi funzo la Biblia linavyoongozwa kwa kutumia broshua Furahia Maisha Milele! Mwanamke huyo alishangaa sana kujua kwamba anaweza kupata machapisho yote hayo bila malipo, kutia ndani machapisho kwa ajili ya familia na vijana. Baada ya mazungumzo hayo alikubali kuchukua baadhi ya machapisho yanayotegemea Biblia, na akakubali kujifunza Biblia kisha akasema hivi, “Hii ndiyo zawadi bora zaidi ambayo nimewahi kupata!”

Ndugu na dada zetu pia walihubiri isivyo rasmi wakati wa maonyesho hayo. Ndugu mmoja alianzisha mazungumzo na mwanamke ambaye alikuwa katika kibanda chake. Baadaye siku hiyo, ndugu huyo alizungumza na mwanamke huyo kwa mara nyingine kisha akampa Biblia na baadhi ya machapisho. Mwanamke huyo alipokea machapisho hayo kwa furaha na akaeleza kwamba amefanya jitihada nyingi ili apate nakala yake ya Biblia lakini hakufanikiwa. Mwanamke huyo aliwapatia habari zake za mawasiliano ili dada amtembelee wakati ujao.

Dada anayeitwa Ranganai alieleza jinsi alivyohisi baada ya kushiriki katika kampeni hiyo ya kutoa ushahidi. Alisema hivi: “Mwaka uliopita afya yangu ilifanya iwe vigumu kwangu kushiriki kikamili katika huduma kama nilivyopenda. Lakini nimejifunza kukazia fikira baraka zangu licha ya changamoto ninazokabili. Fursa ya kushiriki katika kampeni hii ni moja kati ya baraka hizo. Imenipatia kitia moyo na ujasiri niliohitaji.”

Tunafurahi sana kusikia habari hizo na tunajivunia kutumikia bega kwa bega pamoja na ndugu na dada zetu nchini Zimbabwe tukiwa “wafanyakazi wenzi wa Mungu.”​—1 Wakorintho 3:9.