Kuanzia Aprili 13 hadi Aprili 27, 2024, Mashahidi wa Yehova nchini Zimbabwe walishiriki katika kampeni ya pekee ya kuhubiri katika lugha ya Kichitonga. Raia wengi wa Zimbabwe wanaokaribia 300,000 wanazungumza Kichitonga na wanaishi maeneo ya vijijini upande Wa Kaskazini wa nchi katika Wilaya ya Binga. Si rahisi kuwafikia watu wote wanaoishi katika maeneo hayo, kwa kuwa kuna Mashahidi 300 hivi wanaotumikia katika makutaniko nane ya lugha ya Kichitonga nchini Zimbabwe.

Kampeni hiyo ilikuwa na matokeo mazuri sana. Katika mwisho juma wa kwanza wa kampeni hiyo watu 77 waliopendezwa walihudhuria mkutano katika kutaniko moja. Na katika mwisho juma uliofuata, watu 126 waliopendezwa walihudhuria. Kwa ujumla mafunzo zaidi ya 2,000 ya Biblia yalianzishwa wakati wa kampeni hiyo.

Katika kisa kimoja akina ndugu walitembelea nyumba iliyokuwa karibu, na mwanamke mmoja na watoto wake wakawasalimu akina ndugu. Akina ndugu waliomba kuzungumza na kichwa cha familia wa mwanamke huyo. Mume wa mwanamke huyo alipofika, alijitambulisha kuwa kiongozi wa kijiji hicho, alikuwa chifu wa kijiji hicho. Aliwashukuru sana akina ndugu kwa kuwa walimwonyesha heshima kwa kumsubiri na kuzungumza na yeye kwanza. Alisisimka sana na akatoa nakala ya Biblia yake ya Kichitonga (cha Zimbabwe), akina ndugu walimwonyesha jinsi tunavyowasaidia watu kujifunza Biblia. Mipango ilifanywa ili kuendelea kujifunza Biblia na mwanamume huyo. Mwanamume huyo pia aliwaruhusu akina ndugu kuhubiri kwenye nyumba zingine zilizo chini ya usimamizi wake.

Ndugu wawili walipohubiri katika eneo la mjini walikutana na mwanamume mmoja aliyejitambulisha kuwa mmoja wa Mashahidi wa Yehova. Mwanamume huyo alieleza kwamba Mashahidi walimhubiria baba yake mwaka wa 1993. Baba yake alianza kujifunza Biblia lakini akapoteza mawasiliano na Mashahidi wa Yehova kwa kuwa familia yao ilikuwa ikihama-hama. Akina ndugu walitamani sana kukutana na baba ya mwanamume huyo, basi siku iliyofuata, waliamua kutembea kwa muda wa saa moja na nusu ili kuitembelea familia hiyo. Baba huyo alifurahi sana kuwaona akina ndugu, na akasema kwamba yeye na mke wake walikuwa wakisali siku hiyo ili watembelewe na Mashahidi. Familia yote ilikubali kujifunza Biblia, na wote wakahudhuria mkutano wa kutaniko wa katikati ya juma. Hata walikuja na jirani yao kwenye mkutano.

Dada anayeitwa Alicia alizungumza na mwanamke mwenye umri mkubwa ambaye alikubali kuhudhuria mikutano pamoja naye. Alicia alipofika nyumbani kwa mwanamke huyo alimkuta akiwa tayari na amemwalika rafiki yake ajiunge naye. Baada ya mikutano, mwanamke huyo mwenye umri mkubwa alisema hivi: “Sina shaka yoyote kwamba Mungu yuko pamoja nanyi. Mmenionyesha fadhili na upendo mwingi na fadhili hivi kwamba ninatamani kuendelea kuhudhuria mikutano.”

Sisi pamoja na ndugu na dada zetu nchini Zimbabwe tunashangilia sana kwa sababu ya matokeo mazuri ya kampeni hiyo. Tunakumbushwa kwamba jitihada zetu za ‘kupanda mbegu’ kwa bidii katika dunia yote zitaendelea kufanikiwa—Mhubiri 11:6.