Septemba 2023, miaka 75 ilitimia tangu ofisi ya tawi ya Mashahidi wa Yehova nchini Zimbabwe ilipofunguliwa. Kwa sasa, ofisi ya tawi ipo Harare, mji mkuu wa Zimbabwe.

Mashahidi wa Yehova walipoanza kuhubiri nchini Zimbabwe, utendaji wa kutaniko ulisimamiwa na ofisi ya tawi nchini Afrika Kusini. Mwaka wa 1932, ofisi ya tawi ya Afrika Kusini iliwatuma mapainia wanne katika kampeni ya kuhubiri nchini Zimbabwe, ambayo wakati huo iliitwa Rhodesia Kusini. Upesi watu wengi wakaanza kukubali kweli.

Novemba 1940, kwa sababu ya kuongozwa na utaifa na kuunga mkono vita, wenye mamlaka walipiga marufuku machapisho yetu. Hawakuruhusu yaingizwe nchini wala yasambazwe. Ndugu zetu wengi walifungwa kwa sababu ya kudumisha msimamo wao wa kutounga mkono upande wowote wa mambo ya kisiasa yaliyokuwa yakiendelea katika miaka hiyo. Hata hivyo, ndugu zetu waliendelea kuhubiri habari njema kisiri na wakapata matokeo mazuri. Marufuku hiyo iliondolewa miaka sita baadaye. Muda mfupi baada ya hapo, idadi ya wahubiri iliongezeka na kufikia 3,500.

Ili kutegemeza kazi iliyokuwa ikipanuka, Septemba 1, 1948 ofisi ya tawi ilifunguliwa huko Bulawayo, ambalo ndilo jiji la pili kwa ukubwa nchini Zimbabwe. Ndugu Eric Cooke aliwekwa rasmi kuwa mtumishi wa kwanza wa ofisi ya tawi. Baadaye, wamishonari waliozoezwa katika Shule ya Gileadi, yaani, George na Ruby Bradley, Phyllis Kite, na Myrtle Taylor, walipewa mgawo wa kutumikia katika ofisi ya tawi ya Zimbabwe.

Katika miaka iliyofuata, idadi ya wahubiri nchini Zimbabwe iliendelea kuongezeka. Ili kushughulikia ongezeko hilo, majengo mengine mapya ya ofisi ya tawi yaliongezwa.

Ofisi ya tawi inayotumika sasa ilijengwa katika jiji la Harare na kuwekwa wakfu Desemba 1998. Ofisi hiyo ya tawi inasimamia kazi ya utafsiri katika lugha saba nchini humo, na inashughulikia makutaniko 960 katika eneo hilo. Zaidi ya ndugu na dada 46,000 wanahubiri habari njema kwa bidii nchini humo, na watu 120,702 walihudhuria Ukumbusho wa kifo cha Kristo katika mwaka wa 2023.

Tunafurahi kuona kwamba watu wengi zaidi wanaanza kumtumikia Yehova nchini Zimbabwe. Ongezeko hilo linathibitisha kwamba sikuzote macho na moyo wa Yehova utakuwa pamoja na wale ambao ni washikamanifu kwake.​—2 Mambo ya Nyakati 7:16.