Michezo inayomsaidia mtoto kuwa mbunifu, inamfanya kuwa mdadisi na kuchochea uwezo wake wa kuwazia na hivyo kumwezesha kuwa na ustadi wa kufanya kazi kwa mikono yake.

 Ustadi huo unatia ndani:

•   Kuchora

•   Kuoka

•   Kuigiza

•   Kuimba

•   Kujenga magari na midoli

•   Kucheza kwa kutumia vifaa vya kawaida (hata boksi linaweza kuchochea uwezo wa kuwazia)

 Katika nchi nyingi, badala ya kucheza michezo inayowasaidia watoto kuwa wabunifu, watoto hupenda kutazama burudani na kufanya mambo ambayo watu wengine wamewapangia.

 Je, unapaswa kuwa na wasiwasi?

•   Unachopaswa kujua

•   Unachoweza kufanya

•   Michezo yenye ubunifu inaweza kusaidia ukuzi wa mtoto. Inaweza kuchangia afya ya kimwili na kiakili, ubunifu, na uwezo wa kushirikiana na wengine. Inaweza pia kuwafundisha watoto kuwa wenye subira, kuboresha uwezo wao wa kufanya maamuzi yanayofaa, kudhibiti hisia zao, na kuwasaidia kushirikiana na wengine katika kikundi. Kwa ufupi, michezo yenye ubunifu inaweza kuwatayarisha watoto kwa ajili ya wakati watakapokuwa watu wazima.

•   Kutumia vifaa vya kielektroni kupita kiasi kunaweza kuwa na madhara. Kutumia vifaa vya kielektroni kupita kiasi kunaweza kuwafanya watoto wawe waraibu wa vifaa hivyo, na kuvitumia kupita kiasi kumehusianishwa na watoto kuwa wanene kupita kiasi na kuwa wenye jeuri. Hilo ni onyo kwa wazazi wanaotumia vifaa vya kielektroni kuwa walezi wa watoto wao ambao hawajaanza shule.

•   Utendaji uliopangwa una madhara fulani. Watoto wanapolazimika kufanya shughuli moja baada ya nyingine ambayo wamepangiwa, wanakosa nafasi muhimu sana ya kucheza bila kusimamiwa, jambo ambalo lingewachochea kuwa wadadisi na wabunifu.

•   Andaa wakati wa kuwa na michezo yenye ubunifu. Kulingana na hali, waruhusu watoto wacheze nje na wafurahie mazingira. Waruhusu wafanye mambo wanayopenda na wacheze na vifaa vya kuchezea vitakavyowachochea wawe wabunifu. a

   Jambo la kufikiria: Michezo yenye ubunifu inaweza kuwasaidia watoto wangu wasitawishe sifa na ustadi upi, na hilo litamsaidiaje baadaye maishani mwake?

   Kanuni ya Biblia: “Mazoezi ya kimwili ni yenye faida.”—1 Timotheo 4:8.

•   Wawekee mipaka ya kutumia vifaa vya kielektroni. Fikiria kwa makini kabla ya kuruhusu simu, tablet, au televisheni kuchukua muda mwingi wa mtoto wako. Madaktari wa watoto wanapendekeza kwamba watoto wenye umri chini ya miaka miwili wasitazame televisheni au vifaa vingine vya kielektroni kabisa na kwa watoto wenye umri kati ya miaka miwili na mitano, wasitazame kwa zaidi ya saa moja kwa siku. b

   Jambo la kufikiria: Ninaweza kumwekea mtoto wangu mipaka gani kuhusu kutazama televisheni au vifaa vingine vya kielektroni? Je, ninapaswa kutazama pamoja naye? Je, kuna burudani ya aina nyingine tofauti na burudani kupitia vifaa vya kielektroni?

   Kanuni ya Biblia: “Endeleeni kuangalia sana jinsi mnavyotembea, si kama watu wasio na hekima bali kama watu wenye hekima, mkiutumia vizuri kabisa wakati wenu.”—Waefeso 5:15, 16.

•   Chunguza jinsi utendaji uliopangwa utakavyomwathiri mtoto wako. Ni kweli kwamba utendaji huo unaweza kuboresha uwezo wa mtoto wako katika ustadi fulani au mchezo. Lakini, mara nyingi kuwa na utendaji mwingi sana uliopangwa huongeza mkazo, si tu kwa mtoto bali pia kwa mzazi ambaye atalazimika kumsafirisha mtoto. Bila shaka, kanuni inayopatikana katika Waefeso 5:15, 16 kuhusu kutumia wakati kwa hekima inatumika hapa pia.

   Jambo la kufikiria: Je, watoto wangu wamelemewa na ratiba iliyojaa shughuli nyingi zilizopangwa? Ikiwa wamelemewa tunaweza kufanya mabadiliko gani?

   Kanuni ya Biblia: “Mhakikishe mambo muhimu zaidi.”—Wafilipi 1:10.