Katika ulimwengu wa teknolojia, mwajiri wako, wafanyakazi wenzako, au hata wateja wanaweza kutarajia upatikane muda wote kwa ajili ya kazi. Jambo hilo linaweza kufanya upoteze usawaziko maishani, yaani, unakosa uwezo wa kutofautisha na kutanguliza mambo mengine, kutia ndani ndoa yako.

•  Unachopaswa kujua

•  Madokezo ya kuwa na usawaziko wa kazi

•  Wenzi wengine wa ndoa wanasema nini?

•  Mwongozo wa mazungumzo

•   Teknolojia inaweza kufanya utumie muda mwingi zaidi kazini kuliko muda unaotumia ukiwa na mwenzi wako. Matokeo ni kwamba unaweza kujikuta ukishughulikia kila simu, barua-pepe, au ujumbe unaoingia baada ya muda wa kazi kana kwamba ni moto unaohitaji kuzimwa mara moja.

   “Siku hizi inaonekana kwamba ni vigumu kurudi nyumbani kutoka kazini na kutumia muda pamoja na familia yako kama ilivyokuwa zamani kwa sababu unapopokea barua-pepe na simu, unaacha kumkazia fikira mwenzi wako.”—Jeanette

•   Ili kuwa na usawaziko kuhusu muda unaotumia kwa ajili ya kazi na familia yako, unahitaji kuchukua hatua ya kwanza. Ikiwa hutapanga ratiba nzuri, kuna uwezekano mkubwa kwamba kazi yako itaingilia ndoa yako.

   “Mara nyingi, mwenzi wako ndiye mtu wa kwanza kumpuuza kwa kufikiri, ‘Ah, ataelewa. Atanisamehe. Nitatumia muda pamoja naye baadaye.’”—Holly

•   Tanguliza ndoa yako. Biblia inasema hivi: “Kile ambacho Mungu ameunganisha mtu yeyote asikitenganishe.” (Mathayo 19:6) Ikiwa huwezi kumruhusu mtu yeyote ‘akutenganishe’ na mwenzi wako, kwa nini uruhusu kazi yako iwatenganishe?

   “Baadhi ya wateja hufikiri kwamba kwa kuwa tu wanakulipa, basi unapaswa kuwahudumia wakati wowote wanapokuhitaji. Kwa kuwa ninatambua kwamba mwenzi wangu ni muhimu zaidi kwangu, mimi huwaambia siwezi kuwahudumia siku ambazo si za kazi, lakini nitawasiliana nao upesi iwezekanavyo.”—Mark

   Jiulize, ‘Je, matendo yangu yanaonyesha kwamba ninaiona ndoa yangu kuwa muhimu kuliko kazi yangu?’

•   Ikiwezekana, usikubali kazi zaidi. Biblia inasema: “Wenye kiasi wana hekima.” (Methali 11:2) Kiasi kinaweza kukusaidia kujua kwamba ni jambo la hekima kukataa kazi fulani za ziada au kumpa mtu mwingine kazi hizo.

   “Mimi ni fundi bomba. Mara nyingi mtu anapohitaji msaada wa dharura, anakuwa na mfadhaiko. Ikiwa siwezi kufika kwa muda anaonihitaji ili kumhudumia, mimi humwelekeza kwa fundi mwingine anayeweza kumsaidia kwa wakati huo.”—Christopher.

   Jiulize: ‘Je, niko tayari kukataa kazi za ziada ikiwa kuzikubali kungefanya mwenzi wangu ahisi ninampuuza? Je, mwenzi wangu angekubaliana na jibu langu?’

•   Pangeni muda wa kuwa pamoja. Biblia inasema hivi: “Kuna wakati uliowekwa wa kila jambo.” (Mhubiri 3:1) Ni muhimu zaidi kuweka au kupanga muda wa kuwa na mwenzi wako hasa ikiwa una kazi nyingi sana za kufanya.

   Mara nyingi, ikiwa tuna mambo mengi sana ya kufanya, tunakubaliana muda wa kuwa pamoja—hata ikiwa ni wakati wa mlo au kutembea ufukweni—wakati ambao tutatumia pamoja bila kukengeushwa.”—Deborah

   Jiulize: ‘Je, ninapanga muda rasmi nitakaotumia kumkazia fikira mwenzi wangu bila kukengeushwa? Je, mwenzi wangu angekubaliana na jibu langu?’

•   Zima vifaa vyako vya kielektroni. Biblia inasema hivi: “Mhakikishe mambo muhimu zaidi.” (Wafilipi 1:10) Je, unaweza kuzima vifaa vyako mara kwa mara ili usikengeushwe na simu au jumbe zinazohusu kazi?

   “Ninajaribu sana kutofanya kazi baada ya muda fulani hususa. Muda huo unapofika, ninazima kabisa simu yangu.”—Jeremy

   Jiulize: Je, ninahisi ni lazima niwe hewani muda wote ili mwajiri wangu au wateja wangu wanipate wanaponihitaji? Je, mwenzi wangu angekubaliana na hilo?

•   Uwe tayari kubadilika. Biblia inasema hivi: “Usawaziko wenu na ujulikane kwa watu wote.” (Wafilipi 4:5) Ukweli ni kwamba mara kwa mara, kazi yako inaweza kuingilia ndoa yako. Kwa mfano, aina ya kazi ya mwenzi wako inaweza kudai kwamba apatikane baada ya muda rasmi wa kazi. Uwe na usawaziko kuhusu muda unaotaka mwenzi wako atumie pamoja nawe.

   “Mume wangu anaendesha biashara ndogo, na mara nyingi kunakuwa na dharura za baada ya kazi anazohitaji kushughulikia. Mara nyingine hilo huniudhi, lakini kwa kuwa bado anatumia muda mwingi pamoja nami, mimi sihangaikii sana jambo hilo.”—Beverly

   Jiulize: ‘Je, nina usawaziko kuhusu muda ninaohitaji mwenzi wangu atumie pamoja nami nikizingatia kiasi cha kazi alicho nacho? Je, mwenzi wangu angekubaliana na jibu hilo?’

 Kwanza, kila mmoja wenu anaweza kuchunguza maswali haya akiwa peke yake. Kisha, zungumzieni majibu pamoja.

•   Je, mwenzi wako amewahi kulalamika kwamba wewe hushughulikia kazi muda ambao unapaswa kutumia pamoja naye? Ikiwa, ndivyo, unakubaliana naye?

•   Unafikiri unaweza kufanya mabadiliko gani ili uwe na usawaziko kuhusiana na muda unaotumia katika kazi na familia?

•   Je, umewahi kuhisi kwamba mwenzi wako hawezi kuacha kazi “ibaki kazini”? Ikiwa ndivyo, ni pindi gani hususa ulizohisi hivyo?

•   Ungependa kuona mwenzi wako akifanya mabadiliko gani ili awe na usawaziko zaidi?