Watu wengi ambao wamekaribia kufa wanasema kwamba wanakumbuka wakitenganishwa na miili yao au wakiona mwangaza mzuri au sehemu maridadi sana. Kitabu Recollections of Death kinasema kwamba ‘Wengine wanaliona jambo hilo kuwa kama pendeleo la kuona makao mengine.’ Ingawa Biblia haizungumzii hisia za watu wanapokaribia kufa, ina kweli muhimu zinazoonyesha kwamba hisia hizo si maono kwamba kuna maisha baada ya kifo.

 Wafu hawajui jambo lolote.

Biblia inasema kwamba wafu “hawajui lolote kamwe.” (Mhubiri 9:5) Tunapokufa, hatuendi sehemu nyingine yoyote ile, badala yake tunakoma kuwepo. Fundisho la kwamba tuna nafsi isiyokufa au sehemu fulani inaendelea kuwa hai halitokani na Maandiko. (Ezekieli 18:4) Hivyo, kumbukumbu zozote zinazotokea mtu anapokuwa karibu kufa si ishara za kwenda mbinguni, moto wa mateso au maisha baada ya kifo.

 Lazaro alisema nini kuhusu maisha baada ya kifo?

Maelezo ya Biblia kuhusu Lazaro yanafunua kabisa kinachotokea mtu anapokufa: Yesu alimfufua siku nne baada ya yeye kufa. (Yohana 11:38-​44) Ikiwa Lazaro alikuwa anafurahia aina fulani ya maisha baada ya kufa, halingekuwa jambo la fadhili kumfufua ili aishi tena duniani. Hata hivyo, hatusomi chochote kuhusu maisha ya Lazaro katika Biblia baada ya yeye kufa. Ikiwa kwa kweli Lazaro angeendelea kuwa hai baada ya kufa, angesema yale aliyoyaona. Inapendeza kwamba Yesu alifafanua kifo cha Lazaro kuwa ni kama usingizi akimaanisha kwamba alikuwa hajui lolote kamwe.​—Yohana 11:11-​14.