“Sikuzote mimi husikiliza muziki​— ninapoamka asubuhi, ninapokuwa ndani ya gari, ninapopumzika nyumbani, ninapofanya usafi, hata ninaposoma.”​—Carla.

 Je, wewe unapenda muziki kama Carla? Ikiwa hivyo, habari hii itakusaidia kuona faida za muziki, mambo ya kuepuka na jinsi ya kuchagua muziki kwa hekima.

•  Faida

•  Mambo ya kuepuka

•  Vijana wenzako wanasema nini

 Kusikiliza muziki kunaweza kulinganishwa na kula chakula. Katika visa vyote viwili, ni muhimu kuzingatia aina na kiasi kinachokufaa. Fikiria hili:

•   Muziki unaweza kuboresha hisia zako.

   “Ninapokuwa na siku mbaya, mimi husikiliza muziki ninaopenda na mara moja ninaanza kuhisi vizuri.”​—Mark.

•   Muziki unaweza kukumbusha mambo ya zamani.

   “Mara nyingi nyimbo hunikumbusha jambo fulani zuri, na hilo hunifanya nifurahi kila mara wimbo huo unapochezwa.”​—Sheila.

•   Muziki unaweza kujenga kifungo cha umoja chenye nguvu.

   “Nilihudhuria kusanyiko la kimataifa la Mashahidi wa Yehova, na wageni wote walipoimba wimbo wa mwisho, nilitokwa na machozi. Ingawa tulizungumza lugha tofauti-tofauti, muziki ulituunganisha.”​—Tammy.

•   Muziki unaweza kukusaidia kusitawisha sifa muhimu.

   “Kujifunza kucheza ala ya muziki hunisaidia kusitawisha nidhamu na subira. Ili ujue kupiga kifaa cha muziki lazima wakati upite. Njia bora ya kuboresha ustadi ni kufanya Mazoezi.”​—Anna.

 Je, wajua? Kitabu kikubwa zaidi katika Biblia​—Zaburi​—kina nyimbo 150.

 Aina fulani za muziki ni kama chakula kilichochafuliwa, yaani inaweza kuwa na sumu. Kwa njia gani?

•   Nyimbo nyingi zina mashairi yanayozungumzia mambo machafu ya kingono.

   “Inaonekana kwamba nyimbo zote maarufu zinazungumzia ngono. Siku hizi mambo hayo yanatajwa waziwazi.”​—Hannah.

   Biblia inasema hivi: “Uasherati na ukosefu wa usafi wa kila namna au pupa visitajwe hata kidogo katikati yenu.” (Waefeso 5:3) Jiulize, ‘Je, muziki ninaosikiliza unanizuia kutii himizo hilo?’

•   Aina fulani ya muziki inaweza kukufanya uwe na huzuni sana.

   “Wakati mwingine mimi husikiliza muziki nyakati za usiku unaonifanya nikumbuke mambo yanayofanya niwe na huzuni na kushuka moyo. Nyimbo zenye huzuni zinaweza kukumbusha mambo yenye kuhuzunisha.”​—Tammy.

   Biblia inasema hivi: “Linda moyo wako kuliko vitu vingine vyote vinavyopaswa kulindwa.” (Methali 4:​23) Jiulize hivi: ‘Je, muziki ninaosikiliza unanifanya niwe na huzuni?’

•   Baadhi ya muziki unaweza kukuchochea uwe na hasira.

   “Mtego hatari kwangu ni aina ya muziki unaochochea hasira, kujichukia au kuchukia wengine. Niligundua tofauti kubwa sana kuelekea jinsi nilivyohisi baada ya kusikiliza muziki wa aina hiyo. Hata washiriki wa familia yetu waliona tofauti hiyo.”​—John.

   Biblia inasema hivi: “Yaondoleeni mbali mambo haya yote kutoka kwenu, ghadhabu, hasira, ubaya, matukano, na maneno machafu kutoka kinywani mwenu.” (Wakolosai 3:8) Jiulize hivi: ‘Je, nyimbo ninazosikiliza zinanifanya niwe mwenye hasira kuelekea wengine bila kujali hisia zao?’

 Jambo la muhimu ni uwe mwenye kuchagua. Kijana anayeitwa Julie anafanya hivyo. Anasema hivi: “Kila mara mimi huchunguza muziki ninaosikiliza na kufuta aina yoyote ile ninayoona kwamba haifai. Ni kweli kwamba mara nyingi kufanya hivyo si jambo rahisi, lakini ninajua kwamba ni jambo linalofaa kufanywa.”

 Msichana anayeitwa Tara anajitahidi kuwa na mtazamo huo pia. Anasema: “Wakati mwingine mimi husikia wimbo wenye mdundo mzuri katika redio, lakini ninaposikiliza mashairi ninagundua kwamba ninapaswa kubadilisha kituo cha redio. Kufanya hivyo ni sawa na kukataa keki tamu baada tu ya kuionja! Hata hivyo, ninajua kwamba ikiwa nina uwezo wa kukataa kusikiliza wimbo unaozungumzia ngono, nitakuwa na uwezo mkubwa zaidi wa kukataa kufanya ngono kabla ya kufunga ndoa. Ninajua kwamba nisipokuwa mwangalifu ninaweza kuathiriwa vibaya na muziki usiofaa.”