Unapofungua Biblia utaona kwamba ina maneno mengi. Usiogopeshwe na jambo hilo! Badala yake, unapofikiria Biblia ione kama meza kubwa hotelini iliyo na vyakula vingi sana vya aina mbalimbali. Huwezi kula kila kitu unachokiona. Lakini unaweza kuchukua kiasi utakachokula na kushiba.

 Vivyo hivyo, ili unufaike kikamili kutokana na usomaji wako wa Biblia, unahitaji kukazia fikira mambo unayosoma. Makala hii itakusaidia kufanya hivyo.

Katika makala hii

•  Kwa nini ukazie fikira mambo unayosoma katika Biblia?

•  Unawezaje kunufaika kikamili na usomaji wa Biblia?

•  Vijana wenzako wanasema nini

 Manufaa unayopata katika usomaji wako wa Biblia yanategemea kiwango cha jitihada unazotia katika usomaji wako. Fikiria mfano huu: Ukitia majani ya chai ndani ya maji moto kwa muda mfupi sana utapata ladha hafifu. Lakini ukiyaacha kwa muda mrefu utapata ladha zaidi.

 Hivyo ndivyo ilivyo na kusoma Biblia. Badala ya kusoma haraka haraka, ruhusu akili na moyo wako ukazie fikira kile unachosoma. Hivyo ndivyo mwandikaji wa Zaburi 119 alivyofanya. Alisema hivi kuhusu Sheria ya Mungu: “Ninaitafakari mchana kutwa.”​—Zaburi 119:97.

 Lakini hilo halimaanishi kwamba unahitaji kusoma na kufikiria kuhusu Biblia siku nzima. Wazo ni hili: Mtunga-zaburi alitenga wakati kulifikiria Neno la Mungu. Kufanya hivyo kulimsaidia afanye maamuzi mazuri.​—Zaburi 119:98-100.

 “Wakati fulani mama yangu aliniambia, ‘Una siku saba katika juma, na katika juma hilo unatumia muda mwingi kufanya mambo yako. Kwa nini usimpe Yehova muda fulani? Huoni inafaa kufanya hivyo?’”​—Melanie.

 Unapotafakari kanuni za Biblia, utakuwa na uwezo wa kufanya maamuzi mazuri—kwa mfano, unapochagua marafiki au unaposhawishiwa kufanya jambo fulani baya.

•   Panga mambo yako. Msichana anayeitwa Julia anasema: “Jipangie ratiba ya usomaji wa Biblia. Panga kile utakachosoma, wakati utakaposoma, na mahali utakaposoma.

•   Tafuta mazingira yanayofaa. Msichana anayeitwa Gianna anasema: “Tafuta mahali ambapo hakuna kelele. Pia, wajulishe watu wa familia yako kuhusu ratiba yako ya usomaji wa Biblia ili wasikukengeushe.”

   Ikiwa unatumia kifaa cha kielektroni, zima mfumo wa kuleta taarifa mpya. Huenda ikafaa kutumia Biblia iliyochapishwa. Utafiti unaonyesha kwamba inaweza kuwa rahisi zaidi kuelewa unachosoma unapotumia kitabu kilichochapishwa. Kwa upande mwingine, inaweza kuwa vigumu kukaza fikira unaposoma kwa kutumia kifaa cha kielektroni.

   “Nimegundua ninakengeuka kwa urahisi ninaposoma kwa kutumia kifaa cha kielektroni. Kifaa changu kinaleta taarifa mpya au betri inapungua chaji au mtandao wa Intaneti unapotea. Lakini ninapotumia kitabu kilichochapishwa, ninachohitaji tu ni mwangaza wa kutosha.”​—Elena.

•   Anza kwa sala. Mwombe Yehova akusaidie kuelewa, kukumbuka, na kunufaika na sehemu ya Biblia unayokusudia kusoma.​—Yakobo 1:5.

   Ili kutenda kulingana na sala yako, chimba zaidi kuhusu simulizi unalosoma. Unawezaje kufanya hivyo? Ikiwa unatumia programu ya JW Library au Biblia ya mtandaoni, unaweza kubofya mstari unaosoma ili kupata habari za utafiti na makala kuhusu mstari huo.

•   Jiulize maswali. Kwa mfano: ‘Simulizi hili linanifundisha nini kumhusu Yehova? Linaonyesha sifa gani ya Yehova ambayo ninaweza kuiga?’ (Waefeso 5:1) ‘Simulizi hili linanifundisha somo gani ninaloweza kutumia katika maisha yangu?’ (Zaburi 119:105) ‘Ninaweza kutumiaje jambo nililosoma kuwasaidia wengine?’​—Waroma 1:11.

   Pia jiulize, ‘Habari niliyosoma inahusianaje na mada kuu ya Biblia?’ Swali hilo ni muhimu sana. Kwa nini? Mambo yote—kuanzia Mwanzo hadi Ufunuo—yanahusiana kwa njia fulani na mada kuu ya Biblia: Jinsi Yehova atakavyolitakasa jina lake kupitia Ufalme wa mbinguni na kuthibitisha kwamba ana haki ya kutawala na kwamba njia yake ya kutawala ndiyo bora.