•  Marafiki wa karibu zaidi wanaokasirishana zaidi

•  Sababu mbili za kufanya amani

•  Vijana wenzako wanasema nini

 Inasemekana kwamba watoto wa familia moja ndio marafiki wa karibu zaidi wanaokasirishana zaidi. Unawapenda ndugu na dada zako, nao wanakupenda​—lakini nyakati fulani unaona ni vigumu kuelewana nao. Helena mwenye umri wa miaka 18 anasema hivi: “Ndugu yangu mdogo huniudhi sana, anajua ni mambo gani yanayoniudhi na ni wakati gani nitakasirika akiyafanya!”

 Baadhi ya ugomvi kati ya watoto wa familia moja unaweza kusuluhishwa kwa kujadiliana na kufikia mwafaka. Kwa mfano:

•   Ndugu wawili wanaoishi kwenye chumba kimoja wanaweza kubishana kwa sababu kila mmoja anataka faragha. Suluhisho ni nini? Wanahitaji kujifunza kusikilizana na kuruhusu kila mmoja awe na faragha. Tumia kanuni ya Biblia inayopatikana kwenye Luka 6:​31.

•   Akina dada wawili wanaweza kuwa na kawaida ya kuvaa nguo za mwenzake bila kuomba. Suluhisho ni nini? Wanapaswa kuzungumzia jambo hilo na kuweka mipaka inayofaa. Tumia kanuni ya Biblia inayopatikana kwenye 2 Timotheo 2:​24.

 Katika visa vingine, matatizo kati ya ndugu au dada yanaweza kuwa mazito sana na kusababisha matokeo mabaya. Fikiria mifano miwili ya Biblia:

•   Miriamu na Haruni walimwonea wivu Musa ndugu yao, na matokeo yalikuwa yenye kuhuzunisha. Soma simulizi hilo kwenye Hesabu 12:​1-​15. Kisha jiulize hivi: ‘Ninawezaje kuepuka kumwonea wivu ndugu au dada yangu?’

•   Kaini alipandwa na hasira hivi kwamba akamuua Abeli, ndugu yake. Soma simulizi hilo kwenye Mwanzo 4:​1-​12. Kisha jiulize hivi: ‘Ninawezaje kudhibiti hasira yangu ninaposhughulika na ndugu au dada yangu?’

 Hata kama si rahisi kusuluhisha ugomvi kati yako na ndugu au dada zako, kuna angalau sababu mbili zinazoonyesha kwa nini ujitahidi kufanya hivyo.

1.   Ni ishara ya ukomavu. “Nilikuwa nikikasirika haraka niliposhughulika na dada zangu wawili wadogo,” anasema kijana anayeitwa Alex. “Sasa nimekuwa mtulivu na mwenye subira ninaposhughulika nao. Unaweza kusema kwamba sasa nimekomaa.”

    Biblia inasema hivi: “Yule ambaye si mwepesi wa hasira ana utambuzi mwingi, lakini anayekosa subira anainua upumbavu.”​—Methali 14:29.

2.   Ni mazoezi mazuri kwa ajili ya wakati ujao. Ikiwa huwezi kuvumilia kutokamilika kwa ndugu au dada zako, utawezaje kushirikiana na mwenzi wako, mfanyakazi mwenzako, mwajiri wako, au mtu mwingine unayekutana naye?

    Ukweli wa maisha: Mafanikio yako ya wakati ujao katika mahusiano na wengine yanategemea uwezo wa kuwasiliana na kujadili jambo, na hakuna mahali panapofaa pa kusitawisha ujuzi huo kama unaposhughulika na watu wa familia yako.

    Biblia inasema hivi: “Kwa kadiri inavyowategemea ninyi, iweni wenye kufanya amani na watu wote.”​—Waroma 12:18.

 Ungependa kupata msaada wa kusuluhisha matatizo na ndugu au dada yako? Soma “Vijana Wenzako Wanasema Nini,” kisha ungalie daftari linalohusiana na habari hii lenye kichwa, “Kuwa na Uhusiano Mzuri na Ndugu au Dada Zangu.”