“Kwa mambo yote nina nguvu kupitia yule anayenipa nguvu.”—Wafilipi 4:13, Tafsiri ya Ulimwengu Mpya.

 “Ninaweza kufanya maneno yote katika Kristo anayenitia nguvu.”—Wafilipi 4:13, Zaire Swahili Bible.

 Maneno hayo yaliyoandikwa na mtume Paulo, yanawahakikishia wale wanaomwabudu Mungu kwamba watapata nguvu za kutimiza mapenzi ya Mungu.

 Tafsiri fulani za Biblia zinasema kwamba Kristo ndiye aliyempa Paulo nguvu hizo. Hata hivyo, katika hati za kale zaidi za Kigiriki, neno “Kristo” halipatikani hapa. Hivyo, tafsiri nyingi za kisasa zinatumia maneno kama vile “yule anayenipa nguvu” (Tafsiri ya Ulimwengu Mpya), na “yeye anitiaye nguvu” (Union Version). Kwa hiyo, Paulo alikuwa akizungumza kumhusu nani?

 Muktadha unaonyesha kwamba Paulo alikuwa akimrejelea Mungu. (Wafilipi 4:6, 7, 10) Mapema katika barua hiyohiyo, Paulo aliwaandikia Wafilipi hivi: “Mungu ndiye ambaye . . . anawachochea, na kuwapa . . . nguvu za kutenda.” (Wafilipi 2:13) Na kwenye 2 Wakorintho 4:7, aliandika kwamba Mungu ndiye aliyempa nguvu za kutimiza huduma yake. (Linganisha 2 Timotheo 1:8.) Hivyo, kuna sababu nzuri za kufika mkataa kwamba Paulo alikuwa akisema kwamba Mungu ndiye “yule anayenipa nguvu.”

 Paulo alimaanisha nini alipoandika angepokea nguvu “kwa mambo yote”? Inaonekana kwamba mambo ambayo Paulo alirejelea yalikuwa hali mbalimbali alizokabili alipokuwa akifanya mapenzi ya Mungu. Iwe alikuwa na vitu vingi vya kimwili au vichache, alimtegemea Mungu amtunze. Hivyo, Paulo alijifunza kuridhika licha ya hali yake.—2 Wakorintho 11:23-27; Wafilipi 4:11.

 Maneno ya Paulo yanaweza kuwahakikishia waabudu wa Mungu leo. Mungu atawapa nguvu wanazohitaji ili kuvumilia majaribu na kufanya mapenzi yake. Mungu anaweza kuwapa nguvu kupitia roho yake takatifu, au kani ya utendaji, na pia kupitia waabudu wenzao na Neno lake, Biblia.—Luka 11:13; Matendo 14:21, 22; Waebrania 4:12.

 Maneno hayo ni sehemu ya umalizio wa barua ya Paulo kwa Wakristo jijini Filipi. Aliandika barua hiyo mwaka wa 60-61 W.K. hivi, alipokuwa amefungwa Roma kwa mara ya kwanza. Kwa muda usiojulikana, Wakristo Wafilipi walikuwa wameshindwa kumtegemeza mtume Paulo kimwili. Hata hivyo, sasa walikuwa wakimtumia Paulo zawadi za kutosheleza mahitaji yake.—Wafilipi 4:10, 14.

 Paulo aliwapongeza Wakristo Wafilipi kwa ukarimu wao na kuwahakikishia kwamba alikuwa na kile alichohitaji. (Wafilipi 4:18) Pia, alitumia nafasi hiyo kuwaeleza siri ya maisha ya Mkristo: Wakristo wote, iwe ni matajiri au maskini, wanaweza kuridhika kikweli ikiwa watategemea msaada wa Mungu.—Wafilipi 4:12.