1 Samweli 21:1-15
21 Baadaye Daudi akafika Nobu+ kwa Ahimeleki+ kuhani; naye Ahimeleki akaanza kutetemeka alipokutana na Daudi, kisha akamwambia: “Kwa nini uko peke yako, wala hakuna yeyote aliye pamoja nawe?”+
2 Ndipo Daudi akamwambia Ahimeleki kuhani: “Mfalme mwenyewe aliniamuru kuhusu habari fulani,+ naye akaniambia, ‘Usiache yeyote ajue lolote kuhusu habari ninayokutuma na kuhusu yale ambayo nimekuamuru.’ Nami nimefanya mapatano ya kukutana mahali fulani pamoja na vijana.
3 Basi sasa, ikiwa kuna mikate mitano pamoja nawe, nipe mkononi mwangu, au chochote kinachoweza kupatikana.”+
4 Lakini yule kuhani akamjibu Daudi na kusema: “Hakuna mkate wa kawaida mkononi mwangu, lakini kuna mkate mtakatifu;+ ikiwa tu hao vijana wamejiepusha na wanawake.”+
5 Kwa hiyo Daudi akamjibu kuhani na kumwambia: “Wanawake wamekaa mbali nasi kama ilivyokuwa hapo mwanzoni nilipotoka,+ na viungo vya hao vijana vingali ni vitakatifu, ingawa utume wenyewe ni wa kawaida. Na je, si zaidi leo, mtu anapokuwa mtakatifu katika kiungo chake?”
6 Basi kuhani akampa kilicho kitakatifu,+ kwa sababu hakukuwa na mkate mwingine hapo isipokuwa mkate wa wonyesho uliokuwa umeondolewa mbele za Yehova+ ili kuweka mkate mpya hapo, siku ambayo uliondolewa.
7 Basi mmoja wa watumishi wa Sauli alikuwa hapo siku hiyo, akiwa amezuiliwa+ mbele za Yehova, na jina lake lilikuwa Doegi+ Mwedomu,+ mkuu wa wachungaji wa Sauli.+
8 Na Daudi akamwambia tena Ahimeleki: “Je, hakuna chochote hapa kwako, mkuki au upanga? Kwa kuwa sikuchukua mkononi mwangu upanga wangu wala silaha zangu, kwa sababu jambo hili la mfalme lilikuwa la haraka.”
9 Ndipo kuhani akasema: “Upanga wa Goliathi+ yule Mfilisti, uliyempiga katika nchi tambarare ya chini ya Ela+—huu hapa, umefungwa katika nguo ya kujitanda, nyuma ya efodi.+ Ikiwa unataka kuuchukua, uchukue, kwa sababu hakuna silaha nyingine yoyote isipokuwa upanga huu.” Naye Daudi akasema tena: “Hakuna upanga mwingine kama huo. Unipe huo.”
10 Kisha Daudi akaondoka, akaendelea kukimbia+ kwa sababu ya Sauli siku hiyo, mwishowe akafika kwa Akishi mfalme wa Gathi.+
11 Nao watumishi wa Akishi wakaanza kumwambia: “Je, huyu si Daudi mfalme+ wa ile nchi? Je, haikuwa kwa huyu ambaye waliendelea kuitikia kwa kucheza dansi,+ wakisema,
‘Sauli amepiga maelfu yake,
Na Daudi makumi ya maelfu yake’?”+
12 Na Daudi akaanza kuyaweka maneno hayo moyoni mwake, naye akaogopa+ sana kwa sababu ya Akishi mfalme wa Gathi.
13 Kwa hiyo akabadili+ utimamu wake wa akili machoni pao,+ akaanza kujifanya mwenda-wazimu mkononi mwao naye akawa akitia alama kwenye milango ya lango na kuyaacha mate yake yatiririke juu ya ndevu zake.
14 Mwishowe Akishi akawaambia watumishi wake: “Tazameni, mtu huyu anatenda kama mwenda-wazimu. Kwa nini mmemleta kwangu?
15 Je, nimekosa watu walio na wazimu, hivi kwamba mkamleta huyu atende kiwenda-wazimu mbele yangu? Je, huyu anapaswa kuingia nyumbani mwangu?”
